ຂ່າວຫຼ້າສຸດ

ອາຊຽນ ຮ່ວມມືພັດທະນາດ້ານຢາພື້ນເມືອງ ຜະລິດຕະພັນເສີມສຸຂະພາບ

1.437 03 ພ.ພ. 2019 ຂ່າວໜ້າ​ໜຶ່ງ
ອາຊຽນ ຮ່ວມມືພັດທະນາດ້ານຢາພື້ນເມືອງ ຜະລິດຕະພັນເສີມສຸຂະພາບ

    ສປປ ລາວ ໄດ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ ຄັ້ງ​ທີ 31 ກ່ຽວ​ກັບ​ການ​ຄຸ້ມ​ຄອງ​ວຽກ​ງານ​ຢາ­ພື້ນ­ເມືອງ ແລະ ຜະ­ລິດ​ຕະ​ພັນ​ເສີມ​ສຸ­ຂະ­ພາບ ແລະ ບັນ­ດາ​ກອງ​ປະ­ຊຸມ​ກ່ຽວ­ຂ້ອງ ຂຶ້ນ​ວັນ​ທີ 2 ພຶດ­ສະ­ພາ 2019 ຢູ່​ໂຮງ­ແຮມ​ລາວ​ພລາ​ຊາ ໂດຍ​ເປັນ​ປະ­ທານ​ຂອງ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ກອງ​ເລ­ຂາ​ອາ​ຊຽນ ສະ­ມາ­ຄົມ​ເຄືອ​ຄ່າຍ​ຜູ້​ປະ­ກອບ​ການ​ຜະ­ລິດ​ຕະ​ພັນ​ເສີມ​ສຸ­ຂະ­ພາບ​ອາ​ຊຽນ ແລະ ຕົວ​ແທນ​ຈາກ​ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ.

    ກອງ​ປະ­ຊຸມ​ດັ່ງ­ກ່າວ ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ປີ 2004 ເປັນ­ຕົ້ນ​ມາ ແລະ ໄດ້​ຜັດ­ປ່ຽນ​ກັນ​ເປັນ​ເຈົ້າ­ພາບ ຈຸດ­ປະ­ສົງ​ເພື່ອ​ຮັບ​ຟັງ​ການ​ລາຍ​ງານ​ກ່ຽວ​ກັບ​ຜົນ​ຂອງ​ກອງ​ປະ­ຊຸມ​ອາ​ຊຽນ ຄັ້ງ​ທີ 30 ຂອງ​ໜ່ວຍ​ງານ​ວິ­ຊາ​ການ​ດ້ານ​ຢາ­ພື້ນ­ເມືອງ ແລະ ຜະ­ລິດ​ຕະ​ພັນ​ເສີມ​ສຸ­ຂະ­ພາບ ຢູ່​ປະ­ເທດ​ອິນ​ໂດ​ເນ​ເຊຍ ເພື່ອ​ສືບ­ຕໍ່​ປຶກ­ສາ​ຫາ­ລື​ຄວາມ​ເປັນ​ເອ­ກະ​ພາບ ໃນ​ການ​ສ້າງ​ເອ­ກະ­ສານ​ລະ­ບຽບ​ການ​ອາ​ຊຽນ ສ້າງ​ຄວາມ​ເຊື່ອມ​ສານ​ດ້ານ​ການ​ຄຸ້ມ​ຄອງ​ຢາ­ພື້ນ­ເມືອງ ແລະ ຜະ­ລິດ​ຕະ​ພັນ​ເສີມ​ສຸ­ຂະ­ພາບ​ໃນ​ຂົງ­ເຂດ ແລະ ຜັນ​ຂະ­ຫຍາຍ​ການ­ຈັດ­ຕັ້ງ​ປະ­ຕິ­ບັດ​ທິດ​ນຳ​ອາ​ຊຽນ​ຢ່າງ​ມີ​ປະ​ສິດ­ທິ​ຜົນ ເພື່ອ​ຄວາມ​ເປັນ​ເອ­ກະ​ພາບ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ.

    ກອງ​ປະ­ຊຸມ​ດັ່ງ­ກ່າວ ສປປ ລາວ ໄດ້​ຮັບ​ກຽດ​ເປັນ​ເຈົ້າ­ພາບ​ມາ​ແລ້ວ 2 ຄັ້ງ ຄັ້ງ​ນີ້​ເປັນ​ຄັ້ງ​ທີ 3 ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໜ່ວຍ​ງານ​ສະ­ເພາະ​ກິດ​ຂອງ​ອາ​ຊຽນ​ດ້ານ​ຢາ­ພື້ນ­ເມືອງ ທີ່​ໄດ້​ຮ່ວມ​ກັນ​ຈັດ​ຕັ້ງ​ປະ­ຕິ­ບັດ​ໄລ­ຍະ​ຜ່ານ​ມາ ກາຍ­ເປັນ​ເວ­ທີ​ສົນ­ທະ­ນາ ແຜນ­ການ​ອຳ­ນວຍ​ຄວາມ​ສະ­ດວກ​ໃຫ້​ພາກ​ພື້ນ​ໃນ​ການ​ສົ່ງ­ເສີມ ແລະ ເຊື່ອມ​ໂຍງ​ຜະ­ລິດ​ຕະ​ພັນ​ຢາ­ພື້ນ­ເມືອງ​ທີ່​ປອດ​ໄພ ປະ​ສິດ­ທິ​ຜົນ ແລະ ຄຸນ​ນະ​ພາບ ເຂົ້າ​ໃນ​ລະ­ບົບ​ຮັກ­ສາ​ສຸ­ຂະ­ພາບ​ຂອງ​ຊາດ ແຜນ​ງານ​ສົ່ງ­ເສີມ​ການ​ນຳ​ໃຊ້​ຢາ­ພື້ນ­ເມືອງ ເຂົ້າ​ໃນ​ຕາ​ໜ່າງ​ຮັກ­ສາ​ສຸ­ຂະ­ພາບ​ຂັ້ນ​ຕົ້ນ.

    ທ່ານ ບຸນ​ກອງ ສີ​ຫາ​ວົງ ກ່າວ​ວ່າ: ວຽກ​ງານ​ພັດ­ທະ­ນາ​ດ້ານ​ຢາ­ພື້ນ­ເມືອງ​ຢູ່ ສປປ ລາວ ໄດ້​ຮັບ​ການ​ເອົາ­ໃຈ­ໃສ່​ຈາກ​ລັດ­ຖະ­ບານ ໂດຍ​ສະ­ເພາະ ວຽກ​ງານ​ຢາ­ພື້ນ­ເມືອງ ໄດ້​ເປັນ​ອົງ​ປະ­ກອບ​ໜຶ່ງ ທີ່​ລະ­ບຸ​ໃນ​ນະ­ໂຍ­ບາຍ​ແຫ່ງ​ຊາດ​ດ້ານ​ຢາ ກະ­ຊວງ​ສາ­ທາ­ລະ­ນະ​ສຸກ ໄດ້​ກຳ­ນົດ​ຍຸດ​ທະ​ສາດ​ຍາວ​ນານ​ກ່ຽວ​ກັບ​ວຽກ​ງານ​ຢາ­ພື້ນ­ເມືອງ ໂດຍ​ສະ­ເພາະ ການ​ພັດ­ທະ­ນາ​ພັນ​ຢາ­ພື້ນ­ເມືອງ​ໃຫ້​ມີ​ຄຸນ​ນະ​ພາບ ປະ­ກອບ­ສ່ວນ​ໃນ​ຕາ​ໜ່າງ​ການ​ບໍ­ລິ­ການ​ສາ­ທາ­ລະ­ນະ​ສຸກ​ແຕ່​ລະ​ຂັ້ນ ພ້ອມ​ນີ້ ສປປ ລາວ ກໍ​ມີ​ຄວາມ​ພ້ອມ​ທີ່​ຈະ​ໃຫ້­ການ​ຮ່ວມ​ມື ເພື່ອ​ພັດ­ທະ­ນາ​ວຽກ​ງານ​ດັ່ງ­ກ່າວ ຄຽງ​ຄູ່​ກັບ​ບັນ­ດາ​ປະ­ເທດ​ໃນ​ອາ​ຊຽນ ເພື່ອ​ພ້ອມ​ກັນ​ພັດ­ທະ­ນາ​ວຽກ​ງານ​ດັ່ງ­ກ່າວ ເຂົ້າ​ສູ່​ລະ­ບຽບ​ການ​ສ້າງ​ຄວາມ​ເປັນ​ເອ­ກະ​ພາບ​ກັນ​ໃນ​ປະ­ເທດ​ສະ­ມາ­ຊິກ​ອາ​ຊຽນ.

ຂ່າວທີ່ກ່ຽວຂ້ອງ