4 ຫົວໜ່ວຍ ໄດ້ຮັບກາໜາຍສິນຄ້າ ໜຶ່ງເມືອງ ໜຶ່ງຜະລິດຕະພັນ

761 02 ພ.ພ. 2019 ຂ່າວໜ້າ​ໜຶ່ງ
4 ຫົວໜ່ວຍ ໄດ້ຮັບກາໜາຍສິນຄ້າ ໜຶ່ງເມືອງ ໜຶ່ງຜະລິດຕະພັນ

    ທ່ານ ສົມ​ປະ­ສົງ ສະ­ຫງວນ​ວົງ ຮອງ​ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ (ນວ) ໄດ້​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຊຸກ­ຍູ້-ສົ່ງ­ເສີມ​ຜະ­ລິດ​ສິນ­ຄ້າ ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ໂດຍ​ສະ­ເພາະ​ການ​ຄັດ​ເລືອກ​ຜະ­ລິດ​ຕະ​ພັນ​ສິນ­ຄ້າ ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ໃນ​ງານ​ວາງ­ສະ­ແດງ ແລະ ຈຳ­ໜ່າຍ​ສິນ­ຄ້າ​ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ແລະ ສິນ­ຄ້າ​ຄອບ­ຄົວ​ຕົວ​ແບບ​ຂອງ ນວ ວັນ​ທີ 29 ເມ­ສາ 2019 ວ່າ: ເພື່ອ​ຈັດ​ຕັ້ງ​ປະ­ຕິ­ບັດ​ລະ­ບຽບ​ການ​ນຳ​ໃຊ້​ກາ​ໝາຍ​ສິນ­ຄ້າ​ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ແຫ່ງ​ຊາດ ສະ­ບັບ​ເລກ​ທີ 2433/ອຄ.ສພຄ ລົງ​ວັນ​ທີ 26 ພະ­ຈິກ 2012 ເຈົ້າ​ຄອງ ນວ ໄດ້​ອອກ​ຂໍ້​ຕົກ­ລົງ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ ຄັດ​ເລືອກ​ເອົາ​ຜະ­ລິດ​ຕະ​ພັນ​ສິນ­ຄ້າ​ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ຕິດ​ພັນ​ກັບ​ການ​ຊຸກ­ຍູ້​ສົ່ງ­ເສີມ​ສິນ­ຄ້າ​ໜຶ່ງ​ບ້ານ​ໜຶ່ງ​ຜະ­ລິດ​ຕະ​ພັນ ແລະ ໜຶ່ງ​ເມືອງ​ບໍ່​ໃຫ້​ຫຼຸດ 5 ຜະ­ລິດ​ຕະ​ພັນ ຂັ້ນ ນວ ສະ­ບັບ​ເລກ​ທີ 092/ຈ​ນວ ລົງ​ວັນ​ທີ 3 ກຸມ­ພາ 2013 ແລະ ທຸກ​ເມືອງ​ຢູ່​ໃນ ນວ ກໍ​ໄດ້​ຈັດ​ຕັ້ງ​ຄະ­ນະ​ຮັບ­ຜິດ­ຊອບ​ຂຶ້ນ ເພື່ອ​ເຄື່ອນ​ໄຫວ​ຄັດ​ເລືອກ ແລະ ຊຸກ­ຍູ້​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ​ດັ່ງ­ກ່າວ ຕາມ​ມາດ­ຖານ​ເງື່ອນ­ໄຂ​ທີ່​ກະ­ຊວງ​ອຸດ​ສະ­ຫະ​ກຳ ແລະ ການ​ຄ້າ​ວາງ​ອອກ

    ມາ​ຮອດ​ປີ 2019 ມີ 48 ຫົວ­ໜ່ວຍ 210 ຜະ­ລິດ​ຕະ​ພັນ 3 ປະ­ເພດ​ສິນ­ຄ້າ ທີ່​ໄດ້​ຮັບ​ຄັດ​ເລືອກ​ໃຫ້​ເປັນ​ຜະ­ລິດ​ຕະ​ພັນ​ສິນ­ຄ້າ ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ຄື: ປະ­ເພດ​ຢາ­ພື້ນ­ເມືອງ ອາ­ຫານ-ເຄື່ອງ​ດື່ມ ແລະ ປະ­ເພດ​ເຄື່ອງ​ຫັດ­ຖະ­ກຳ​ລວມ​ມີ ແກະ­ສະ­ຫຼັກ​ໄມ້ ເຄື່ອງ​ເງິນ ກະ­ເປົາ ເສື້ອ ສິ້ນ ຜ້າ­ບ່ຽງ​ຝ້າຍ ແລະ ໄໝ ໃນ​ນີ້ ມີ 10 ກຸ່ມ​ການ​ຜະ­ລິດ 38 ຫົວ­ໜ່ວຍ​ການ​ຜະ­ລິດ​ທີ່​ຂຶ້ນ​ກັບ 9 ຕົວ​ເມືອງ.

    ການ​ສ້າງ​ຜະ­ລິດ​ຕະ​ພັນ​ສິນ­ຄ້າ​ຄອບ­ຄົວ​ຕົວ​ແບບ ທີ່​ເປັນ​ທ່າ­ແຮງ​ຂອງ​ແຕ່​ລະ​ເມືອງ ໄດ້​ກາຍ­ເປັນ​ຜະ­ລິດ​ຕະ​ພັນ​ສິນ­ຄ້າ​ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ອັນ​ເປັນ​ເອ­ກະ­ລັກ ເຊິ່ງ​ມີ​ທ່າ​ກ້າວ ແລະ ຂະ­ຫຍາຍ­ຕົວ​ຂຶ້ນ​ເລື້ອຍໆ ສຳ­ລັບ​ປີ 2019 ດ້ວຍ​ຄວາມ​ຮັບ­ຜິດ­ຊອບ​ສູງ​ຂອງ​ຄະ­ນະ​ຮັບ­ຜິດ­ຊອບ​ຂັ້ນ ນວ ຂັ້ນ​ເມືອງ ກໍ​ຄື ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ແລະ ຫ້ອງ­ການ​ອຸດ­ສາ­ຫະ­ກຳ ແລະ ການ​ຄ້າ​ເມືອງ ໄດ້​ສຸມ​ໃສ່​ຊຸກ­ຍູ້​ແນະ­ນຳ​ເງື່ອນ­ໄຂ​ຕ່າງໆ ແນະ­ນຳ​ດ້ານ​ວິ­ຊາ​ການ​ທີ່​ຕິດ​ພັນ​ກັບ​ການ​ຜະ­ລິດ ເປັນ­ຕົ້ນ ການ​ຈັດ​ວາງ​ລະ­ບົບ​ການ​ຜະ­ລິດ ການ​ຈັດ­ການ​ດ້ານ​ສຸ­ຂາ​ອະ­ນາ­ໄມ​ໃຫ້​ບັນ­ດາ​ເປົ້າ​ໝາຍ ເຊິ່ງ​ສາ­ມາດ​ໄດ້​ຮັບ​ກາ​ໝາຍ​ສິນ­ຄ້າ​ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ແຫ່ງ​ຊາດ 4 ຫົວ­ໜ່ວຍ ຄື: ຫັດ­ຖະ­ກຳ​ເຈ້ຍ 3 ມິ​ຕິ ບ້ານ​ນາ­ສາ​ລາ ກຸ່ມ​ຫັດ­ຖະ­ກຳ​ຕ່ຳ­ຫູກ​ບ້ານ​ຮ່ອງ​ງົວ ກຸ່ມ​ຜະ­ລິດ​ເຂົ້າ (ເຂົ້າ­ໜຽວ​ກາ​ດອກ​ຈຳ­ປາ­ຂາວ) ບ້ານ​ດອນ​ວັງ​ໂພ ແລະ ກຸ່ມ​ຫັດ­ຖະ­ກຳ​ຕ່ຳ­ຫູກ ບ້ານ​ປາກ​ແຖບ.

ຂ່າວທີ່ກ່ຽວຂ້ອງ