ຂ່າວຫຼ້າສຸດ

ນັກວິໄຈອັງກິດ ພັດທະນາເຕັກນິກໃໝ່ ພະຍາກອນ “ຫົວໃຈວາຍ” ລ່ວງໜ້າ

1.164 02 ພ.ພ. 2019 ຫົວຂໍ້ຂ່າວອື່ນໆ

    ມີ​ຄວາມ​ຫວັງ​ວ່າ​ເຕັກ​ໂນ​ໂລ​ຊີ​ໃໝ່ ຈະ​ຊ່ວຍ​ໃຫ້​ຜູ້​ເຈັບ​ປ່ວຍ​ສາ­ມາດ​ຫາ​ທາງ​ປ້ອງ​ກັນ​ຕົວ​ເອງ​ຈາກ​ໂຣກ​ຫົວ­ໃຈ ທີ່​ຄາດ​ວ່າ​ຈະ​ເກີດ​ຂຶ້ນ​ໃນ​ອະ­ນາ­ຄົດ​ໄດ້.

    ປົກ­ກະ­ຕິ​ແລ້ວ ພາບ​ສະ​ແກນ CT ຫົວ­ໃຈ​ນີ້ ຈະ​ຊ່ວຍ​ໃຫ້​ແພດ​ສາ­ມາດ​ລະ­ບຸ​ໄດ້​ວ່າ ຄົນ​ປ່ວຍ​ມີ​ຫຼອດ​ເລືອດ​ຫົວ­ໃຈ​ທີ່​ກຳ­ລັງ​ຕີບ​ຕັນ​ຢູ່​ຈຸດ​ໃດ​ແດ່​ເທົ່າ​ນັ້ນ.

    ທ່ານ ຄາ​ຣາ​ແລມ​ບອສ ແອນ​ໂຕ​ເນຍ​ເດ​ສ ນັກ​ວິ­ໄຈ​ໃນ​ອັງ­ກິດ ກ່າວ​ວ່າ ເຕັກ​ໂນ​ໂລ​ຊີ​ໃໝ່​ນີ້ ຊ່ວຍ​ໃຫ້​ແພດ​ວິ­ເຄາະ​ໄດ້​ຫຼາຍ​ກວ່າ​ນັ້ນ ໂດຍ​ສາ­ມາດ​ບອກ​ໄດ້​ວ່າ​ຜະ­ໜັງ​ຫຼອດ​ເລືອດ​ຍັງ​ບໍ່­ເກີດ​ການ​ຕີບ​ຕັນ​ຈົນ​ໜ້າ​ເປັນ​ຫ່ວງ ແຕ່​ຜະ­ໜັງ​ຫຼອດ​ເລືອດ​ມີ​ອາ­ການ​ອັກ­ເສບ ຊຶ່ງ​ເຮັດ​ໃຫ້​ຫຼອດ​ເລືອດ​ສ່ຽງ​ທີ່​ຈະ​ຕີບ ຫຼື​ອຸດ​ຕັນ​ໃນ​ອະ­ນາ­ຄົດ.

    ດັ່ງ­ນັ້ນ ຄົນ​ປ່ວຍ​ຈຶ່ງ​ຄວນ​ຫາ​ທາງ​ປິ່ນ­ປົວ​ໂຣກ ອາດ​ຈະ​ດ້ວຍ​ການ​ກິນ​ຢາ ຫຼື​ເພີ່ມ​ປະ­ລິ­ມານ​ຢາ​ເພື່ອ​ຫຼີກ​ລ່ຽງ​ບໍ່​ໃຫ້​ເກີດ​ການ​ກໍ່​ຕົວ​ຂອງ​ຄາບ​ໃນ​ຫຼອດ​ເລືອດ ຊຶ່ງ​ຈະ​ເຮັດ​ໃຫ້​ຫຼອດ​ເລືອດ​ຕີບ​ຕັນ ແລະ ເກີດ​ອາ­ການ​ຫົວ­ໃຈ​ວາຍ.

    ທີມ​ນັກ​ວິ­ໄຈ​ກ່າວ​ວ່າ ການ​ລະ­ບຸ​ໄດ້​ແຕ່​ຕົ້ນໆ​ວ່າ​ເກີດ​ການ​ອັກ­ເສບ​ຂຶ້ນ​ບໍ­ລິ­ເວນ​ຫຼອດ​ເລືອດ​ຫົວ­ໃຈ ຖື​ເປັນ­ຄວາມ​ຄືບ​ໜ້າ​ຄັ້ງ​ສຳ­ຄັນ ໃນ​ການ​ປ້ອງ​ກັນ​ອາ­ການ​ຫົວ­ໃຈ​ວາຍ.

    ນັກ​ວິ­ໄຈ​ກ່າວ​ວ່າ ກຸນ­ແຈ​ສຳ­ຄັນ​ຂອງ​ການ​ວິ­ນິດ​ໄສ​ໂຣກ​ຫຼອດ​ເລືອດ ແລະ ຫົວ­ໃຈ ຄື​ການ​ກວດ​ຫາ​ອາ­ການ​ອັກ­ເສບ​ຂອງ​ຫຼອດ​ເລືອດ​ຫົວ­ໃຈ ເພາະ​ການ​ກວດ​ນີ້ ເປັນ​ສິ່ງ​ທີ່​ວົງ​ການ​ແພດ​ພະ­ຍາ­ຍາມ​ຄົ້ນ​ຫາ​ມາ​ນານ​ຕະ­ຫຼອດ 50 ປີ​ທີ່​ຜ່ານ​ມາ ແລະ ຫາກ​ສາ­ມາດ​ລະ­ບຸ​ໄດ້​ວ່າ​ມີ​ອາ­ການ​ອັກ­ເສບ​ໃນ​ຫຼອດ​ເລືອດ ແພດ​ກໍ​ຈະ​ສາ­ມາດ​ບອກ​ໄດ້​ວ່າ​ຫຼອດ​ເລືອດ​ຫົວ​ໃນ​ຈຸດ​ໃດ ທີ່​ອາດ​ຈະ​ກໍ່­ໃຫ້­ເກີດ​ຄາບ​ອຸດ​ຕັນ​ໃນ​ຫຼອດ​ເລືອດ ເກີດ​ໂຣກ​ຫົວ­ໃຈ ແລະ ຫຼອດ​ເລືອດ​ຫົວ­ໃຈ​ເສັ້ນ​ໃດ​ທີ່​ຈະ​ເປັນ​ສາ­ເຫດ​ໃຫ້​ເກີດ​ຫົວ­ໃຈ​ວາຍ.

    ທີມ​ນັກ​ວິ­ໄຈ​ມະ­ຫາ­ວິ­ທະ­ຍາ­ໄລ​ອັອກ​ຟອດ ເຊື່ອ​ວ່າ ຜົນ­ງານ​ການ​ວິ­ໄຈ​ຂອງ​ທີມ​ງານ​ນີ້ ຈະ​ສາ­ມາດ​ຊ່ວຍ​ວິ­ນິດ​ໄສ​ຄົນ​ມີ​ຄວາມ​ທີ່​ສ່ຽງ​ທີ່​ຈະ​ລົ້ມ​ປ່ວຍ​ດ້ວຍ​ອາ­ການ​ຫົວ­ໃຈ​ວາຍ​ໃນ​ອະ­ນາ­ຄົດ ໄດ້​ປະ­ມານ 30.000 ຄົນ​ຕໍ່​ປີ.

    ນັກ​ວິ­ໄຈ​ກ່າວ​ວ່າ ໃນ​ອັງ­ກິດ ມີ​ຄົນ​ເກີດ​ອາ­ການ​ຫົວ­ໃຈ​ວາຍ​ປີ​ລະ 100.000 ຄົນ ແລະ ເຕັກ​ໂນ​ໂລ​ຊີ​ໃໝ່​ນີ້ ມີ​ສັກ­ກະ​ຍະ​ພາບ​ໃນ​ການ​ຊ່ວຍ​ລະ­ບຸ​ໄດ້​ລ່ວງ​ໜ້າ​ປະ­ມານ 20%-30% ຂອງ​ຄົນ​ທີ່​ເຂົ້າ​ຮັບ​ການ​ກວດ​ວ່າ​ອາດ​ເກີດ​ອາ­ການ​ຫົວ­ໃຈ​ວາຍ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ