ບົດບາດສື່ມວນຊົນໃນວຽກງານກວດກາ

2.539 29 ມ.ສ. 2019 ນານາສາລະ

    ມີ​ເພື່ອນ​ຜູ້​ອ່ານ​ຕັ້ງ​ບັນ­ຫາ​ຖາມ​ຄໍ​ລຳ​ພວກ​ເຮົາ​ວ່າ: ສື່​ມວນ​ຊົນ​ມີ​ບົດ­ບາດ​ຫຍັງ​ແດ່​ໃນ​ການ​ເຂົ້າ​ຮ່ວມ​ວຽກ​ງານ​ກວດ­ກາ ຜູ້​ຂຽນ​ໄດ້​ຊອກ​ຂໍ້​ມູນ ເຊິ່ງ​ຮູ້​ວ່າ​ມີ​ຄຳ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ເລກ​ທີ 419/ອກລ ລົງ​ວັນ​ທີ 04 ທັນ­ວາ 2018 ເຊິ່ງ​ມີ​ມາດ­ຕາ​ກຳ­ນົດ​ໃຫ້​ສື່​ມວນ​ຊົນ ເຂົ້າ​ຮ່ວມ​ໃນ​ວຽກ​ງານ​ກວດ­ກາ ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ.

    ກ່ອນ​ອື່ນ​ຂໍ​ສະ­ເໜີ​ຈຸດ­ປະ­ສົງ​ຂອງ​ຄຳ​ແນະ­ນຳ​ມີ​ດັ່ງ­ນີ້:

    - ເພື່ອ​ຜັນ​ຂະ­ຫຍາຍ​ເນື້ອ​ໃນ​ບາງ​ມາດ­ຕາ​ທີ່​ປັບ­ປຸງ ແລະ ສ້າງ​ໃໝ່​ຂອງ​ກົດ­ໝາຍ​ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ໃຫ້​ລະ­ອຽດ ຈະ­ແຈ້ງ ແລະ ຮັດ­ກຸມ​ກວ່າ​ເກົ່າ.

    - ເພື່ອ​ແນະ­ນຳ ອະ­ທິ­ບາຍ ແລະ ຍົກ​ຕົວ­ຢ່າງ​ໃຫ້​ຂະ­ແໜງ­ການ​ທ້ອງ­ຖິ່ນ ມີ​ຄວາມ​ເຂົ້າ­ໃຈ​ແຈ້ງ ແລະ ສະ­ດວກ​ໃນ​ການ­ຈັດ­ຕັ້ງ​ຕົວ​ຈິງ ແນ­ໃສ່​ເຮັດ​ໃຫ້​ການ­ເຄື່ອນ­ໄຫວ​ວຽກ​ງານ​ກວດ­ກາ​ລັດ​ຖືກ­ຕ້ອງ ຮັດ­ກຸມ ເຂັ້ມ​ງວດ ມີ​ຜົນ​ສັກ­ສິດ ຕາມ​ກົດ­ໝາຍ​ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ໄດ້​ກຳ­ນົດ​ໄວ້.

    - ເພື່ອ​ໃຫ້​ຄະ­ນະ​ນຳ​ກະ­ຊວງ-ອົງ­ການ ອົງ­ການ​ປົກ­ຄອງ​ທ້ອງ­ຖິ່ນ ແລະ ອົງ­ການ​ກວດ­ກາ​ລັດ​ແຕ່​ລະ​ຂັ້ນ ພະ­ນັກ­ງານ-ລັດ­ຖະ­ກອນ ທະ­ຫານ ຕຳ­ຫຼວດ ແລະ ພົນ­ລະ­ເມືອງ ມີ​ຄວາມ​ເຂົ້າ­ໃຈ​ທີ່​ເປັນ​ເອ­ກະ​ພາບ ແລະ ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ.

    ສຳ­ລັບ​ການ​ເຂົ້າ​ຮ່ວມ​ໃນ​ວຽກ​ງານ​ກວດ­ກາ​ນັ້ນ ປະ­ກອບ​ມີ​ຫຼາຍ​ພາກ­ສ່ວນ ເຊິ່ງ​ໃນ​ນັ້ນ​ລວມ​ມີ​ສື່​ມວນ​ຊົນ ໂດຍ​ໄດ້​ກຳ­ນົດ​ໄວ້​ໃນ​ມາດ­ຕາ 4 ວັກ​ສອງ ດັ່ງ­ນີ້:

    ມາດ­ຕາ 4 ວັກ 2 ໄດ້​ກຳ­ນົດ​ວ່າ: ລັດ ຊຸກ­ຍູ້ ສົ່ງ­ເສີມ​ແນວ​ລາວ​ສ້າງ​ຊາດ ອົງ​ການ­ຈັດ­ຕັ້ງ​ມະ­ຫາ­ຊົນ ອົງ​ການ­ຈັດ­ຕັ້ງ​ສັງ­ຄົມ ສື່​ມວນ​ຊົນ ແລະ ພົນ­ລະ­ເມືອງ ເຂົ້າ​ຮ່ວມ​ໃນ​ວຽກ​ງານ​ກວດ­ກາ ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ໝາຍ​ຄວາມ​ວ່າ: ລັດ ຊຸກ­ຍູ້ ສົ່ງ­ເສີມ​ບັນ­ດາ​ອົງ​ການ­ຈັດ­ຕັ້ງ​ດັ່ງ­ກ່າວ ເຂົ້າ​ຮ່ວມ​ໃນ​ການ​ຕິດ­ຕາມ ກວດ­ກາ​ລັດ ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ຕໍ່​ກັບ​ບັນ­ດາ​ອົງ­ການ​ອຳ­ນາດ​ລັດ ໃນ​ການ​ປະ­ຕິ­ບັດ​ນະ­ໂຍ­ບາຍ ກົດ­ໝາຍ ລະ­ບຽບ​ການ ສິດ ໜ້າ­ທີ່ ແລະ ຄວາມ​ຮັບ­ຜິດ­ຊອບ​ຂອງ​ການ­ຈັດ­ຕັ້ງ ພະ­ນັກ­ງານ-ລັດ­ຖະ­ກອນ ທະ­ຫານ ຕຳ­ຫຼວດ ແລະ ພະ­ນັກ­ງານ​ວິ​ສາ​ຫະ​ກິດ​ຂອງ​ລັດ ນາຍ­ບ້ານ ແລະ ຜູ້​ໄດ້​ຮັບ​ມອບ​ສິດ​ຈາກ​ທາງ​ການ ທີ່​ປະ­ຕິ­ບັດ​ໜ້າ­ທີ່​ແຕ່​ສູນ​ກາງ​ລົງ​ຮອດ​ທ້ອງ­ຖິ່ນ ດ້ວຍ​ວິ­ທີ​ການ​ເຂົ້າ​ຮ່ວມ​ດັ່ງ­ນີ້:

    1. ອົງ­ການ​ກວດ­ກາ​ລັດ​ແຕ່​ລະ​ຂັ້ນ ຕ້ອງ​ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ ສ້າງ​ແຜນ­ການ ເພື່ອ​ກຳ­ນົດ​ໃຫ້​ແຕ່​ລະ​ການ­ຈັດ­ຕັ້ງ ແລະ ບຸກ­ຄົນ​ເຂົ້າ​ມາ​ລາຍ​ງານ​ສະ­ພາບ​ການ​ປະ­ຕິ­ບັດ​ໜ້າ­ທີ່​ວຽກ​ງານ ໃນ​ຄວາມ​ຮັບ­ຜິດ­ຊອບ​ຂອງ​ຕົນ​ເປັນ​ແຕ່​ລະ​ເດືອນ ຕາມ​ສະ­ພາບ​ຕົວ​ຈິງ ກໍ­ລະ­ນີ​ມີ​ຄວາມ​ຈຳ­ເປັນ ແລະ ຮີບ​ດ່ວນ ອາດ​ຈະ​ເຊີນ​ພາກ­ສ່ວນ​ກ່ຽວ­ຂ້ອງ​ເຂົ້າ​ມາ​ລາຍ​ງານ​ໂດຍ​ກົງ ຫຼື ສ້າງ​ແຜນ­ການ​ລົງ​ກຳ​ສະ­ພາບ ຂໍ້​ມູນ​ນຳ​ພາກ­ສ່ວນ​ກ່ຽວ­ຂ້ອງ​ເປັນ​ແຕ່​ລະ​ເປົ້າ​ໝາຍ.

    2. ເຂົ້າ​ຮ່ວມ​ກອງ​ປະ­ຊຸມ​ວຽກ​ງານ​ກວດ­ກາ​ປະ­ຈຳ​ປີ ຕາມ​ການ​ເຊີນ​ຂອງ​ອົງ­ການ​ກວດ­ກາ​ລັດ​ແຕ່​ລະ​ຂັ້ນ ເພື່ອ​ລາຍ​ງານ​ຜົນ​ການ​ຕິດ­ຕາມ ກວດ­ກາ ແລະ ການ​ແກ້​ໄຂ​ຜົນ​ຂອງ​ການ​ກວດ­ກາ​ທີ່​ໄດ້​ປະ­ຕິ­ບັດ​ຜ່ານ​ມາ.

    3. ເຂົ້າ​ຮ່ວມ​ຕິດ­ຕາມ ກວດ­ກາ​ໂດຍ​ກົງ​ຕາມ​ການ​ສະ­ເໜີ ຫຼື ຕົກ­ລົງ​ຂອງ​ອົງ­ການ​ກວດ­ກາ​ລັດ​ແຕ່​ລະ​ຂັ້ນ ທີ່​ກ່ຽວ­ຂ້ອງ​ຕາມ​ແຕ່​ລະ​ກໍ­ລະ­ນີ.

    4. ສະ­ເໜີ​ເຂົ້າ​ພົບ ແລະ ລາຍ​ງານ​ໂດຍ​ກົງ​ເປັນ​ລາຍ​ລັກ​ອັກ­ສອນ ຫຼື ປາກ​ເປົ່າ​ກັບ​ອົງ­ການ​ກວດ­ກາ​ລັດ​ແຕ່​ລະ​ຂັ້ນ​ທີ່​ກ່ຽວ­ຂ້ອງ.

    5. ສົ່ງ​ຄຳ​ສະ­ເໜີ ຫຼື ຄຳ​ຮ້ອງ​ຟ້ອງ (ຕາມ​ມາດ­ຕາ 29 ຂອງ​ກົດ­ໝາຍ​ວ່າ​ດ້ວຍ​ການ​ຕ້ານ​ການ​ສໍ້​ລາດ​ບັງ​ຫຼວງ ສະ­ບັບ​ປັບ­ປຸງ) ກ່ຽວ​ກັບ​ການ​ປະ­ຕິ­ບັດ​ໜ້າ­ທີ່​ຂອງ​ພະ­ນັກ­ງານ-ລັດ­ຖະ­ກອນ ທະ­ຫານ ຕຳ­ຫຼວດ ທີ່​ມີ​ການ​ລະ­ເມີດ​ລະ­ບຽບ​ດ້ານ​ບໍ­ລິ­ຫານ ຫຼື ມີ​ພຶດ­ຕິ​ກຳ​ທີ່​ເປັນ​ການ​ສໍ້​ລາດ​ບັງ​ຫຼວງ ໃຫ້​ອົງ­ການ​ກວດ­ກາ​ລັດ​ແຕ່​ລະ​ຂັ້ນ​ໂດຍ​ກົງ ຫຼື ຜ່ານ​ທາງ​ໄປ­ສະ­ນີ ຕູ້​ຮັບ​ຈົດ­ໝາຍ ທີ່​ການ­ຈັດ­ຕັ້ງ​ກວດ­ກາ​ລັດ ຫຼື ການ­ຈັດ­ຕັ້ງ​ລັດ​ໄດ້​ຈັດ​ວາງ​ໄວ້​ແຕ່​ລະ​ບ່ອນ.

    6. ລາຍ​ງານ​ຜ່ານ​ໂທລະ­ສັບ​ສາຍ​ດ່ວນ ຕາມ​ອົງ­ການ​ທີ່​ກ່ຽວ­ຂ້ອງ​ໄດ້​ກຳ­ນົດ​ໄວ້ ແລະ ດ້ວຍ​ຮູບ​ການ​ອື່ນ.

    7. ສຳ­ລັບ​ສື່​ມວນ​ຊົນ ນອກ­ຈາກ​ການ​ເຂົ້າ​ຮ່ວມ​ຕິດ­ຕາມ ໂຄ­ສະ­ນາ​ເຜີຍ­ແຜ່​ນະ­ໂຍ­ບາຍ ກົດ­ໝາຍ ລະ­ບຽບ​ການ​ຂອງ​ລັດ​ກ່ຽວ​ກັບ​ວຽກ​ງານ​ກວດ­ກາ​ແລ້ວ ຍັງ​ຕ້ອງ​ເຂົ້າ​ຮ່ວມ​ເກັບ​ກຳ​ຂ່າວ ແລະ ອອກ​ຂ່າວ​ການ­ເຄື່ອນ­ໄຫວ​ຕ່າງໆ​ຂອງ​ອົງ­ການ​ກວດ­ກາ​ລັດ​ຂັ້ນ​ຂອງ​ຕົນ ເປັນ­ຕົ້ນ ການ​ເກັບ​ກຳ​ຂ່າວ ແລະ ອອກ​ຂ່າວ ກອງ​ປະ­ຊຸມ​ສະ­ຫຼຸບ​ວຽກ​ງານ​ກວດ­ກາ ການ​ຈັດ​ສຳ​ມະ​ນາ​ຕ່າງໆ ການ​ເປີດ­ເຜີຍ​ຜົນ​ຂອງ​ການ​ກວດ­ກາ ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ຄຳ​ພິ­ພາກ­ສາ​ຂອງ​ສານ​ທີ່​ໃຊ້​ໄດ້​ຢ່າງ​ເດັດ­ຂາດ ກ່ຽວ​ກັບ​ຄະ­ດີ​ສໍ້​ລາດ​ບັງ​ຫຼວງ ຕາມ​ການ​ຕົກ­ລົງ​ເຫັນ​ດີ​ຂອງ​ຂັ້ນ​ເທິງ ດ້ວຍ​ຮູບ​ການ​ຕ່າງໆ​ຕາມ​ກົດ­ໝາຍ​ໄດ້​ກຳ­ນົດ.

    ກົດ­ໝາຍ​ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ໄດ້​ຖືກ​ຮັບ­ຮອງ​ເອົາ​ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ເລກ​ທີ 073/ສພຊ ລົງ​ວັນ​ທີ 16 ພະ­ຈິກ 2017 ປະ­ທານ​ປະ­ເທດ​ອອກ​ລັດ​ຖະ​ດຳ­ລັດ​ປະ­ກາດ​ໃຊ້ ເລກ​ທີ 328/ປປທ ລົງ​ວັນ​ທີ 26 ທັນ­ວາ 2017 ກົດ­ໝາຍ​ນີ້​ປະ­ກອບ​ດ້ວຍ 10 ພາກ 06 ໝວດ ແລະ 80 ມາດ­ຕາ ເຊິ່ງ​ໄດ້​ກຳ­ນົດ​ຫຼັກ­ການ ລະ­ບຽບ​ການ ມາດ​ຕະ­ການ​ກ່ຽວ​ກັບ​ການ­ຈັດ­ຕັ້ງ ແລະ ການ­ເຄື່ອນ­ໄຫວ​ກວດ­ກາ​ລັດ​ຢ່າງ​ຄົບ​ຖ້ວນ ແລະ ຈະ­ແຈ້ງ.

ແນວ​ລາວ

ຂ່າວທີ່ກ່ຽວຂ້ອງ