ຂ່າວຫຼ້າສຸດ

ອານຸສອນ ເຮັດເວລາດີສຸດ ໃນແລ່ນ-ລານ ຊີງແຊັມອາຊີ 2019

1.020 29 ມ.ສ. 2019 ວົງຈອນກີລາ
ອານຸສອນ ເຮັດເວລາດີສຸດ ໃນແລ່ນ-ລານ ຊີງແຊັມອາຊີ 2019

    ການ​ແຂ່ງ­ຂັນ​ກີ­ລາ​ແລ່ນ-ລານ ຊີງ​ແຊັມ​ອາ­ຊີ ຄັ້ງ​ທີ 23 ຈັດ​ຂຶ້ນ​ວັນ​ທີ 21-24 ເມ­ສາ 2019 ທີ່​ນະ­ຄອນ­ຫຼວງ​ໂດ​ຮາ ປະ­ເທດ​ກາ​ຕາ ມີ​ການ​ຊີງ​ໄຊ​ທັງ​ໝົດ 43 ຫຼຽນ​ຄຳ ໃນ 43 ລາຍ­ການ ຍິງ 21 ລາຍ­ການ ຊາຍ 21 ລາຍ­ການ ແລະ ທີມ​ປະ­ສົມ 1 ລາຍ­ການ ໂດຍ​ມີ​ນັກ­ກີ­ລາ​ຈາກ 43 ປະ­ເທດ​ເຂົ້າ​ຮ່ວມ.

    ສະ­ເພາະ​ລາວ​ເຮົາ​ສົ່ງ​ນັກ­ກີ­ລາ​ເຂົ້າ​ຮ່ວມ 3 ຄົນ ຄື: ທ້າວ ອາ​ນຸ​ສອນ ໄຊ​ສາ ລົງ​ແຂ່ງ​ລາຍ­ການ​ແລ່ນ​ຂ້າມ​ຮົ້ວ 110 ແມັດ ເຮັດ​ເວ­ລາ​ໄດ້ 14,45 ວິ­ນາ­ທີ ເປັນ​ເວ­ລາ​ດີ​ສຸດ​ຂອງ​ອາ​ນຸ​ສອນ ໃນ​ລະ­ດູ​ການ​ນີ້ ໄດ້​ອັນ​ດັບ​ທີ 14 ຈາກ 20 ຄົນ​ເຂົ້າ​ຮ່ວມ ບໍ່​ຜ່ານ​ຮອບ​ຄັດ​ເລືອກ ຂະ­ນະ​ທີ່​ນາງ ມະ­ນີ​ວັນ ຈັນ­ທະ​ວົງ ລົງ​ແຂ່ງ​ລາຍ­ການ​ແລ່ນ​ຂ້າມ​ຮົ້ວ 100 ແມັດ ເຮັດ​ເວ­ລາ​ໄດ້ 14,79 ວິ­ນາ­ທີ ໄດ້​ອັນ​ດັບ​ທີ 12 ຈາກ 14 ຄົນ​ເຂົ້າ​ຮ່ວມ ບໍ່​ຜ່ານ​ຮອບ​ຄັດ​ເລືອກ ສ່ວນ​ນາງ ສີ​ລິ​ນາ ພະ​ອາ​ໄພ ລົງ​ແຂ່ງ​ລາຍ­ການ​ແລ່ນ 100 ແມັດ ເຮັດ​ເວ­ລາ​ໄດ້ 12,52 ວິ­ນາ­ທີ ໄດ້​ອັນ​ດັບ​ທີ 27 ຈາກ 30 ຄົນ​ເຂົ້າ​ຮ່ວມ ບໍ່​ຜ່ານ​ຮອບ​ຄັດ​ເລືອກ.

    ສຳ­ລັບ​ເຈົ້າ​ຄອງ​ຫຼຽນ​ຄຳ​ໃນ​ການ​ແຂ່ງ­ຂັນ​ຄັ້ງ​ນີ້ ເປັນ​ຂອງ​ນັກ­ກີ­ລາ​ຈາກ​ປະ­ເທດ​ບາ​ເຣນ ໄດ້ 11 ຫຼຽນ​ຄຳ 7 ຫຼຽນ​ເງິນ 4 ຫຼຽນ​ທອງ ລວມ 22 ຫຼຽນ ທີ 2 ສປ ຈີນ ອະ­ດີດ​ແຊັມ​ສູງ​ສຸດ 17 ສະ­ໄໝ ໄດ້ 9 ຫຼຽນ​ຄຳ 13 ຫຼຽນ​ເງິນ 7 ຫຼຽນ​ທອງ ທີ 3 ຍີ່­ປຸ່ນ ອະ­ດີດ​ແຊັມ 4 ສະ­ໄໝ ໄດ້ 5 ຫຼຽນ​ຄຳ 4 ຫຼຽນ​ເງິນ 9 ຫຼຽນ​ທອງ ທີ 4 ອິນ​ເດຍ ແຊັມ​ເກົ່າ ໄດ້ 3 ຫຼຽນ​ຄຳ 7 ຫຼຽນ​ເງິນ 7 ຫຼຽນ​ທອງ ສ່ວນ​ເຈົ້າ­ພາບ​ກາ​ຕາ ໄດ້​ອັນ​ດັບ​ທີ 6 ລວມ 6 ຫຼຽນ ຄື: 2 ຫຼຽນ​ຄຳ 1 ຫຼຽນ​ເງິນ ແລະ 3 ຫຼຽນ​ທອງ.

ຂ່າວທີ່ກ່ຽວຂ້ອງ