Bitcoin ເຮັດ​ໃຫ້​ຜູ້​ກໍ່​ຕັ້ງ SoftBank ສູນ​ເສຍ​ເງິນ​ໄປ 130 ລ້ານ​ໂດ​ລາ​ສະຫະລັດ

1.368 29 ມ.ສ. 2019 ຂ່າວຕ່າງປະເທດ
Bitcoin ເຮັດ​ໃຫ້​ຜູ້​ກໍ່​ຕັ້ງ SoftBank ສູນ​ເສຍ​ເງິນ​ໄປ 130 ລ້ານ​ໂດ​ລາ​ສະຫະລັດ

    ມາ​ຊາ​ໂຢ​ຊິ ຊອນ (Masayoshi Son) ມະຫາ​ເສດຖີ​ຜູ້​ກໍ່​ຕັ້ງ​ກຸ່ມ​ບໍລິສັດ​ໂທລະ​ຄົມມະນາຄົມ  SoftBank Group Corp. ຂອງ​ຍີ່ປຸ່ນ ໄດ້​ວາງ​ການ​ພະນັນ​ອັນ​ໃຫຍ່​ໂຕ ໃສ່​ເງິນ​ເອ​ເລັກ​ໂຕຣ​ນິກ ບິດ​ຄອຍ (bitcoin) ເມື່ອ​ເງິນ​ສະກຸນ​ນີ້ ບັນລຸ​ຈຸດ​ສຸດ​ຍອດ ເມື່ອ​ທຽບໃສ່​ເງິນ​ໂດ​ລາ​ສະຫະລັດ ພາຍ​ໃນ​ທ້າຍ​ປີ 2017 ແຕ່​ວ່າ​ເຂົາ​ໄດ້​ສູນ​ເສຍ​ເງິນ​ໄປ 130 ລ້ານ​ໂດ​ລາ​ສະຫະລັດ ເມື່ອ​ເວລາ​ຂາຍ​ພວກ​ມັນ​ໄປ ໃນ​ຕົ້ນ​ປີ 2018 ຍ້ອນ​ວ່າ​ຄ່າ​ເງິນ​ບິດ​ຄອຍ​ຕົກຕ່ຳ​ລົງ.

    ມະຫາ​ເສດຖີ ຊອນ ທຸ່ມ​ເງິນ​ເຂົ້າ​ໃສ່ bitcoin ໃນ​ເວລາ​ທີ່​ຄ່າ​ຂອງ​ສະກຸນ​ເງິນ​ນີ້​ພຸ່ງ​ສູງ​ຂຶ້ນ ໃນ​ທ້າຍ​ປີ 2017 ໂດຍ​ທີ່​ມີ​ບາງ​ເວລາ​ຂຶ້ນ​ສູງ​ເຖິງ​ເກືອບ 20.000 ໂດ​ລາ​ສະຫະລັດ/bitcoin. ແຕ່​ວ່າ​ຄ່າ​ຂອງ​ເງິນ bitcoin ໄດ້​ເລີ່ມ​ຕົກຕ່ຳ​ລົງ ໃນ​ຕົ້ນ​ປີ 2018 ເປັນ​ການ​ກະ​ຕຸ້ນ​ໃຫ້​ເກີດ​ກະແສ​ການ​ເທ​ຂາຍ​ເງິນ​ນີ້​ໃນ​ທົ່ວ​ໂລກ.

    ໜັງສືພິມ Wall Street Journal ໃຫ້​ຮູ້​ວ່າ ມະຫາ​ເສດ​ຖື ຊອນ ຜູ້​ທີ່​ໄດ້​ເປີດ​ໂຕ​ກອງ​ທຶນ​ການ​ລົງທຶນ​ຜະຈົນ​ໄພ ລາຍ​ໃຫຍ່​ສຸດ​ໃນ​ໂລກ​ນັ້ນ ໄດ້​ລົງທຶນ​ເຂົ້າ​ໃສ່ bitcoin ຕາມ​ການ​ແນະນຳ​ຂອງ ປີ​ເຕີ ບຣີ​ເກີ (Peter Briger) ຜູ້​ຮ່ວມ​ກໍ່​ຕັ້ງ​ບໍລິສັດ​ຄຸ້ມ​ຄອງ​ຊັບ​ສິນ Fortress Investment. ເມື່ອ​ຕົ້ນ​ປີ 2017 SoftBank ໄດ້​ຈັດ​ຊື້​ເອົາ Fortress Investment ດັ່ງນັ້ນ​ຈຶ່ງ​ໄດ້​ຄອບ​ຄອງ​ບ້ວງ​ເງິນ​ສຳຮອງ​ດ້ວຍ​ເງິນ bitcoin ພ້ອມ​ດ້ວຍ​ກອງ​ທຶນ​ການ​ລົງທຶນ​ແບບ​ດັ້ງເດີມ. ແຕ່​ເຖິງ​ຢ່າງໃດ​ກໍ​ຕາມ Wall Street Journal ກໍ​ບໍ່​ໄດ້​ຮູ້​ຢ່າງ​ຊັດ​ເຈນ ວ່າ​ມະຫາ​ເສດຖີ ຊອນ ໄດ້​ລົງທຶນ​ເຂົ້າ​ໃສ່ bitcoin ໜ້ອຍ​ຫຼາຍ​ສ່ຳ​ໃດ.

    ໃນ​ເວລາ​ປິດ​ການ​ແລກປ່ຽນ​ໃນ​ວັນ​ທີ 22 ເມສາ​ທີ່​ຜ່ານ​ມາ ເງິນ bitcoin ມີຄ່າ​ຢູ່​ທີ່​ລະດັບ  5.381,05 ໂດ​ລາ​ສະຫະລັດ/bitcoin ນັບ​ວ່າ​ຕ່ຳ​ກວ່າ​ເກືອບ 4 ເທົ່າ ຂອງ​ລະດັບ​ສະຖິຕິ​ສູງ​ສຸດ ໃນ​ທ້າຍ​ປີ 2017.

ຂ່າວທີ່ກ່ຽວຂ້ອງ