ຂ່າວຫຼ້າສຸດ

ຈີນ​-ມຽນ​ມາ ​ເພີ່ມ​ທະ​ວີ​ການ​ຮ່ວມ​ມື​ດ້ານ​ອາ​ຊີ​ວະ​ສຶກ​ສາ

1.445 29 ມ.ສ. 2019 ຂ່າວຕ່າງປະເທດ
ຈີນ​-ມຽນ​ມາ ​ເພີ່ມ​ທະ​ວີ​ການ​ຮ່ວມ​ມື​ດ້ານ​ອາ​ຊີ​ວະ​ສຶກ​ສາ

   ພິທີ​ເຊັນ​ສັນຍາ​ສ້າງຕັ້ງ​ວິທະຍາໄລ​ວິຊາ​ຊີບ​ສາກົນ​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ​ສາຂາ​ວານ​ປາວ ໃນ​ມຽນ​​ມາ ໄດ້​ຈັດ​ຂຶ້ນ​ຢູ່​ນະຄອນ​ຢາງ​ກຸງ (ປະເທດ​ມຽນ​ມາ) ວັນ​ທີ 23 ເມສາ​ທີ່​ຜ່ານ​ມາ ຊຶ່ງ​ຕາມ​ສັນຍາ​ດັ່ງກ່າວ ມະຫາວິທະຍາໄລ​ຊົນເຜົ່າ​ຢູນ​ນານ ແລະ​ ບໍລິສັດ​ບໍ່​ແຮ່​ທອງ​ວານ​ປາວ​ຈີນ​ຈຳກັດ ສາຂາ​ມຽນ​ມາ ຈະ​ຮ່ວມ​ກັນ​ສ້າງ​ວິທະຍາໄລ​ວິຊາ​ຊີບ​ສາກົນ ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ສາຂາ​ວານ​ປາວ​ມຽນ​ມາ ຢູ່​ນະຄອນ​ມອນ​ຢີ​ວາ ແຂວງ​ຊາ​ກາຍ ຂອງ​ມຽນ​ມາ ໂດຍ​ມີ​ຈຸດປະສົງ​ເພື່ອ​ໃຫ້ການ​ຝຶກ​ອົບຮົມ​ເຕັກນິກ​ວິຊາ​ຊີບ​ທີ່​ມີ​ລະດັບ​ສູງ ໃຫ້​ກຳມະກອນ ແລະ ຊາວບ້ານ​ໃນ​ທ້ອງຖິ່ນ ແລະ ​ຊຸກຍູ້​ການ​ຮ່ວມ​ມື​ດ້ານ​ການ​ສຶກ​ສາ ແລະ ​ວັດທະນະທຳ ລະຫວ່າງ​ຈີນ ກັບ​ມຽນ​ມາ.

   ທ່ານ​ນາງ ຫຼີ​ສຽວ​ຢ້ຽນ ທີ່​ປຶກສາ​ທູດ​ຂອງ​ສະຖານທູດ​ຈີນ​ປະຈຳ​ມຽນ​ມາ ກ່າວ​ຢູ່​ໃນ​ພິທີ​ເຊັນ​ສັນຍາ ວ່າ​ນັບ​ແຕ່​ປະຕິບັດ​ກົນ​ໄກ​ຮ່ວມ​ມື​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ຢ່າງ​ເປັນ​ທາງ​ການ​ໃນ​ປີ 2016 ເປັນຕົ້ນ​ມາ ໄດ້​ຮັບ​ຜົນສຳເລັດ​ຢ່າງ​ຫຼວງຫຼາຍ ທັງ​ໄດ້​ນຳ​ເອົາ​ການ​ພັດທະນາ​ຢ່າງ​ມີ​ຊີວິດ​ຊີວາ​ມາສູ່​ຂົງເຂດ​ທີ່​ກ່ຽວຂ້ອງ​ຂອງ​ມຽນ​ມາ ການ​ສ້າງຕັ້ງ​ວິທະຍາໄລ​ວິຊາ​ຊີບ​ສາກົນ​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ​ສາຂາ​ວານ​ປາວ​ມຽນ​ມາ ຢ່າງ​ເປັນ​ທາງ​ການ​ໃນ​ເທື່ອ​ນີ້ ຖື​ວ່າ​ເປັນ​ການ​ເປີດ​ຮູບ​ແບບ​ໃໝ່​ແຫ່ງ​ການ​ຮ່ວມ​ມື​ດ້ານ​ການ​ສຶກ​ສາ ແລະ​ ການ​ແລກປ່ຽນ​ດ້ານ​ວັດທະນະທຳ ລະຫວ່າງ​ຈີນ ກັບ​ມຽນ​ມາ ເຮັດ​ໃຫ້​ປະຊາຊົນ​ມຽນ​ມາ ໄດ້​ຮັບ​ຜົນ​ປະໂຫຍດ​ຫຼາຍ​ກວ່າ​ເກົ່າ.

ຂ່າວທີ່ກ່ຽວຂ້ອງ