ສະໜາມ​ບິນ​ສາກົນ ໂນ້ຍ​ບ່າຍ ຈະ​ຍົກ​ການ​ຮອງ​ຮັບ​ຜູ້ໂດຍສານ​ຂຶ້ນ 80-100 ລ້ານ​ຄົນ/ປີ

1.382 29 ມ.ສ. 2019 ຂ່າວຕ່າງປະເທດ
ສະໜາມ​ບິນ​ສາກົນ ໂນ້ຍ​ບ່າຍ ຈະ​ຍົກ​ການ​ຮອງ​ຮັບ​ຜູ້ໂດຍສານ​ຂຶ້ນ 80-100 ລ້ານ​ຄົນ/ປີ

    ຂ່າວສານ​ຫວຽດນາມ ລາຍ​ງານ​ວ່າ ເມື່ອ​ຮອດ​ປີ 2050 ສະໜາມ​ບິນ​ສາກົນ​ໂນ້ຍ​ບ່າຍ ຂອງ​ຫວຽດນາມ ຄາດ​ວ່າ​ຈະ​ຍົກ​ກຳລັງ​ການ​ຜະລິດ​ໃນ​ການ​ຮອງ​ຮັບ​ຜູ້ໂດຍສານ​ຂຶ້ນ 80-100 ລ້ານ​ຄົນ/ປີ ຈາກ​ການ​ຄົ້ນຄວ້າ​ແຜນການ​ເປີດ​ກວ້າງ ແລະ ດັດແກ້​ແຜນ​ກຳນົດ.

    ທີ່​ກ່າວ​ມາ​ນັ້ນ ເປັນ​ຈຸດ​ເນັ້ນ ຢູ່​ໃນ​ບົດ​ບັນທຶກ​ຊ່ວຍ​ຈຳ​ການ​ຮ່ວມ​ມື ລະຫວ່າງ​ກົມ​ການບິນ ຂອງ​ຫວຽດນາມ ກັບ​ບໍລິສັດ ADPi (ຂອງ​ຝຣັ່ງ) ກ່ຽວ​ກັບ​ການ​ຄົ້ນຄວ້າ​ແຜນການ​ເປີດ​ກວ້າງ ແລະ​ສ້າງ​ແຜນການ​ກຳນົດ​ລະອຽດ ຂອງ​ສະໜາມ​ບິນ​ສາກົນ​ໂນ້ຍ​ບ່າຍ ທີ່​ມີ​ອອກ​ມາ​ເມື່ອ​ວັນ​ທີ 24 ເມສາ​ທີ່​ຜ່ານ​ມາ.

    ກ່ອນ​ໜ້າ​ນັ້ນ ລັດຖະບານ​ຝຣັ່ງ ໄດ້​ໃຫ້ການ​ຊ່ວຍເຫຼືອ​ເງິນ​ເປັນ​ສ່ວນ​ໃຫຍ່ ສຳລັບ​ການ​ສ້າງ​ແຜນການ​ຂອງ​ໂຄງການ ທີ່​ປະຕິບັດ​ເປັນ​ເວລາ 12 ເດືອນ ດ້ວຍ​ຍອດ​ຄ່າ​ໃຊ້​ຈ່າຍ 1,48 ລ້ານ​ໂດ​ລາ​ສະຫະລັດ. ໃນ​ນັ້ນ ລັດຖະບານ​ຝຣັ່ງ ສະໜອງ​ທຶນ​ຊ່ວຍເຫຼືອ​ລ້າ 1,31 ລ້ານ​ໂດ​ລາ ສະຫະລັດ. ສ່ວນ​ທຶນ​ປະກອບ​ສົມທົບ​ຂອງ​ຝ່າຍ​ຫວຽດນາມ ໄດ້​ຈັດ​ສັນ​ມາ​ຈາກ​ງົບປະມານ​ແຫ່ງ​ລັດ ໃຫ້​ແກ່​ກົມ​ການບິນ ໃນ​ມູນ​ຄ່າ 1,2 ຕື້​ດົ່ງ (ເງິນ​ຫວຽດນາມ) ແລະ ວັດຖຸ​ພັນ​ທີ່​ມີ​ມູນ​ຄ່າ​ເທົ່າ​ກັບ 2,4 ຕື້​ດົ່ງ.

    ໃນ​ໄລຍະ​ທີ່​ຜ່ານ​ມາ ຂະແໜງການ​ບິນ​ຂອງ​ຫວຽດນາມ ໄດ້​ມີ​ບາດກ້າວ​ພັດທະນາ ທີ່​ສຳຄັນ ໂດຍ​ມີ​ຄວາມ​ເຕີບ​ໂຕ​ໃນ​ໄລຍະ​ປີ 2015-2017 ສະເລ່ຍ​ປະມານ 23% ໃນ​ດ້ານ​ປະລິມານ​ຜູ້ໂດຍສານ  ແລະ 15,5% ໃນ​ດ້ານ​ສິນຄ້າ. ໃນ​ປີ 2018 ຄາດ​ວ່າ​ບັນລຸ​ການ​ຮັບ​ໃຊ້​ຜູ້ໂດຍສານ 106 ລ້ານ​ຄົນ ແລະ ຂົນສົ່ງ​ສິນຄ້າ 1,29 ລ້ານ​ໂຕນ.

ຂ່າວທີ່ກ່ຽວຂ້ອງ