ຜູ້ນຳ​ຂອງ​ຣັດ​ເຊຍ ແລະ ​ສປປ ເກົາຫຼີ ຕີ​ລາຄາ​ຜົນ​ການ​ເຈລະຈາ

744 29 ມ.ສ. 2019 ຂ່າວຕ່າງປະເທດ
ຜູ້ນຳ​ຂອງ​ຣັດ​ເຊຍ ແລະ ​ສປປ ເກົາຫຼີ ຕີ​ລາຄາ​ຜົນ​ການ​ເຈລະຈາ

    ຫຼັງ​ຈາກ​ທີ່​ໄດ້​ປະຊຸມ​ລັບ​ໃນ​ວັນ​ທີ 25 ເມສາ​ທີ່​ຜ່ານ​ມາ​ແລ້ວ ໃນ​ວັນ​ດຽວ​ກັນ ປະທານາທິບໍດີ ວາ​ລາ​ດີ​ເມຍ ປູ​ຕິນ ຜູ້ນຳ​ຣັດ​ເຊຍ ແລະ​ ທ່ານ ກິມ​ເຈິງ​ອູນ ຜູ້ນຳ ​ສປປ ເກົາຫຼີ ກໍ​ໄດ້​ສືບຕໍ່​ການ​ປະຊຸມ ເປີດ​ກວ້າງ.

    ປະທານາທິບໍດີ ປູ​ຕິນ ກ່າວ​ຢູ່​ໃນ​ການ​ປະຊຸມ​ເປີດ​ກວ້າງ​ວ່າ ການ​ປະຊຸມ​ລັບ​ກັບ​ຜູ້ນຳ ​ສປປ ເກົາຫຼີ ມີ​ຂຶ້ນ​ຢ່າງ​ຈິງ​ຈັງ ແລະ ລະອຽດ ໂດຍ​ໄດ້​ເວົ້າ​ເຖິງ​ປະຫວັດສາດ​ການ​ພົວພັນ​ລະຫວ່າງ ສອງ​ປະເທດ ກ່ຽວ​ກັບ​ປັດຈຸບັນ ແລະ ຄວາມ​ຫວັງ​ການ​ພັດທະນາ​ການ​ພົວພັນ​ແບບ​ສອງ​ຝ່າຍ. ຄຽງ​ຄູ່​ກັນ​ນັ້ນ ສອງ​ຝ່າຍ​ກໍ​ໄດ້​ເວົ້າ​ເຖິງ​ສະພາບ​ການ​ຢູ່​ເທິງ​ແຫຼມ​ເກົາຫຼີ ແລະ ແລກປ່ຽນ​ຄວາມ​ຄິດ ຄວາມ​ເຫັນ ກ່ຽວ​ກັບ​ເລື່ອງ​ທີ່​ຄວນ​ເຮັດ ເພື່ອ​ເຮັດ​ໃຫ້​ສະພາບ​ການ​ສາມາດ​ຄືບ​ໜ້າ​ໂດຍ​ດີ.

    ທາງ​ດ້ານ​ຜູ້ນຳ​ຂອງ ​ສປປ ເກົາຫຼີ ກໍ​ໄດ້​ສະແດງ​ຄວາມ​ຫວັງ​ວ່າ ການ​ເຈລະຈາ​ຂອງ​ຕົນ ກັບ​ຜູ້ນຳ​ຣັດ​ເຊຍ ທີ່​ເລີ່ມ​ຕົ້ນ​ດ້ວຍ​ຈິດໃຈ​ສ້າງສັນ​ນັ້ນ ຈະ​ໄດ້​ຮັບ​ການ​ສືບຕໍ່​ຢູ່​ໃນ​ຈິດໃຈ​ຄື​ແນວ​ນັ້ນ. ທ່ານ ກິມ​ເຈິງ​ອູນ ເວົ້າ​ວ່າ ທ່ານ​ເດີນທາງ​ໄປ​ຍັງ​ຣັດ​ເຊຍ ເພື່ອ​ປຶກສາ​ຫາລື​ກ່ຽວ​ກັບ​ສະພາບ​ການ ຢູ່​ເທິງ​ແຫຼມ​ເກົາຫຼີ  ກໍ​ຄື​ປຶກສາ​ຫາລື​ກ່ຽວ​ກັບ​ມາດ​ຕະການ ໃນ​ການ​ແກ່​ໄຂ​ສັນຕິພາບ​ກ່ຽວ​ກັບ​ບັນຫາ ດັ່ງກ່າວ  ແລະ​ ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ການ​ພັດທະນາ​ການ​ພົວພັນ​ແບບ​ສອງ​ຝ່າຍ.

ຂ່າວທີ່ກ່ຽວຂ້ອງ