ຂ່າວຫຼ້າສຸດ

ໂຮງງານ​ໄຟຟ້າ​ນີວ​ເຄລຍ​ລອຍ​ແຫ່ງ​ທຳ​ອິດ​ຂອງ​ໂລກ​ສຳເລັດ​ການ​ແລ່ນ​ທົດ​ລອງ

817 29 ມ.ສ. 2019 ຂ່າວຕ່າງປະເທດ
ໂຮງງານ​ໄຟຟ້າ​ນີວ​ເຄລຍ​ລອຍ​ແຫ່ງ​ທຳ​ອິດ​ຂອງ​ໂລກ​ສຳເລັດ​ການ​ແລ່ນ​ທົດ​ລອງ

    ແຈ້ງ​ການ​ຂອງ​ກຸ່ມ​ບໍລິສັດ​ນີວ​ເຄລຍ Rosatom ທີ່​ມີ​ອອກ​ມາ​ເມື່ອ​ວັນ​ທີ 24 ເມສາ​ທີ່​ຜ່ານ​ມາ ໃຫ້​ຮູ້​ວ່າ Rosenergoatom ຊຶ່ງ​ເປັນ​ໜ່ວຍ​ງານ​ບໍລິຫານ ໂຮງງານ​ໄຟຟ້າ​ນີວ​ເຄລຍ​ລອຍ ແຫ່ງ​ທຳ​ອິດ​ຂອງ​ໂລກ (NPP) ທີ່​ມີ​ຊື່ວ່າ ອາ​ກາ​ເດ​ມິກ ໂລ​ໂມ​ໂນ​ຊອບ (Akademik Lomonosov) ຂອງ​ຣັດ​ເຊຍ ໄດ້​ປະສົບ​ຄວາມ​ສຳເລັດ​ສຳເລັດ​ການ​ແລ່ນ​ທົດ​ລອງ​ໂຮງງານ​ແຫ່ງ​ນີ້ ແລະ ​ນັບ​ວ່າ​ເປັນ ຜົນງານ​ອັນ​ໃຫຍ່​ຫຼວງ​ຂອງ​ກຸ່ມ​ບໍລິສັດ Rosatom.

    ໃນ​ຊຸມ​ເດືອນ​ມໍ່ໆມານີ້ ທຸກໆ​ການເຄື່ອນໄຫວ​ກວດກາ​ທີ່​ຈຳເປັນ ສຳລັບ​ບັນດາ​ລະບົບ ແລະ ​ອຸປະກອນ​ຂອງ NPP ໄດ້​ຮັບ​ການ​ປະຕິບັດ​ຢູ່​ໃນ​ລະດັບ​ທີ່​ຄ່ອຍໆ​ເພີ່​​ີມ​ຂຶ້ນ ໃນ​ດ້ານ​ກຳລັງ ການ​ຜະລິດ ຊຶ່ງ​ເປັນ​ການ​ແທດເໝາະ​ກັບ​ແຜນການ.

    ການ​ທົດ​ລອງ​ຮອບດ້ານ ຢູ່​ໃນ​ໂຮງງານ​ໄຟຟ້າ​ນີວ​ເຄລຍ Akademik Lomonosov ໄດ້​ເລີ່ມ ຂຶ້ນ​ຕັ້ງແຕ່​ທ້າຍ​ເດືອນ​ພະຈິກ ປີ 2018. ໜ້າທີ່​ຕົ້ນຕໍ​ຂອງ​ການເຄື່ອນໄຫວ​ເຕັກ​ໂນ​ໂລ​ຊີ​ດັ່ງກ່າວ ກໍ​ແມ່ນ​ການ​ຮັບປະກັນ​ວ່າ​ໃນ​ສ່ວນ​ທີ່​ລອຍ​ນັ້ນ ມີ​ຄວາມ​ພ້ອມ ເພື່ອ​ນຳ​ເຂົ້າ​ສູ່​ການ​ເດີນ​ເຄື່ອງ ຢູ່​ໃນ​ລະດັບ ອຸດສາຫະກຳ.

    ໂຮງງານ​ໄຟຟ້າ​ດັ່ງກ່າວ ຈະ​ເຄື່ອນ​ໄຫວ​ຢູ່​ໃນ​ເຂດ​ເໜືອ​ໄກ ແລະ​ ເຂດ​ຕາເວັນ​ອອກ​ໄກ ຊຶ່ງ​ເປົ້າ​ໝາຍ​ຕົ້ນຕໍ​ກໍ​ແມ່ນ​ການ​ສະໜອງ​ໄຟຟ້າ ໃຫ້​ແກ່​ບັນດາ​ວິ​ສາ​ຫະ​ກິດ ເຂດ​ອຸດສາຫະກຳ ທີ່​ຕັ້ງ​ຢູ່​ໃນ​ເຂດ​ຫ່າງ​ໄກ ບັນດາ​ນະຄອນ​ທ່າ​ກຳປັ່ນ ກໍ​ຄື​ຖານ​ເຈາະ​ນ້ຳມັນ ແລະ​ ແກ​​ັສ ຢູ່​ນອກ​ຝັ່ງ​ທະເລ.

    ໂຮງງານ​ໄຟຟ້າ​ນີວ​ເຄລຍ​ລອຍ Akademik Lomonosov ແມ່ນ​ຕັ້ງ​ຕາມ​ຊື່​ຂອງ​ບັນດິດ ມີ​ຄາ​ອິນ ວາ​ຊີ​ລີ​ເອວິກ ໂລ​ໂມ​ໂນ​ຊອບ (Mikhail Vasilyevich Lomonosov) ໂດຍ​ເປັນ​ອຸປະກອນ ກຳເນີດ​ໄຟຟ້າ​ເອກະລາດ ໄດ້​ຮັບ​ການ​ຜະລິດ​ຄື​ກັບ​ວ່າ​ເປັນ​ກຳປັ່ນ​ລຳ​ໜຶ່ງ ທີ່​ມີ​ຄວາມ​ຍາວ 140 ແມັດ ກວ້າງ 30 ແມັດ ແລະ​ ສູງ 10 ແມັດ. Akademik Lomonosov ຍັງ​ສາມາດ​ນຳ​ໃຊ້ ຄື​ກັບ​ວ່າ​ເປັນ​ໂຮງງານ​ແຍກ​ເກືອ ດ້ວຍ​ກຳລັງ​ການ​ຜະລິດ​ນ້ຳ​ຈືດ​ໄດ້ 240.000ມ3/ວັນ.

      ຄາດ​ວ່າ Akademik Lomonosov ຈະ​ສະໜອງ​ກະແສ​ໄຟຟ້າ​ພໍ ສຳລັບ​ປະມານ 200.000 ຄົນ ຊ່ວຍ​ປະຢັດ​ຖ່ານ​ຫີນ​ໄດ້ 200.000 ໂຕນ ແລະ​ ປະຢັດ​ເຊື້ອ​ໄຟ​ໄດ້ 100.000 ໂຕນ ໃນ​ແຕ່​ລະ​ປີ. ເວລາ​ການເຄື່ອນໄຫວ​ຂອງ​ໂຮງງານ​ດັ່ງກ່າວ ຄາດ​ວ່າ​ຢູ່​ທີ່​ປະມານ 40 ປີ.

ຂ່າວທີ່ກ່ຽວຂ້ອງ