ຂ່າວຫຼ້າສຸດ

ລັດຖະບານພິຈາລະນາແກ້ໄຂຫຼາຍບັນຫາສຳຄັນ

2.151 25 ມ.ສ. 2019 ຂ່າວໜ້າ​ໜຶ່ງ
ລັດຖະບານພິຈາລະນາແກ້ໄຂຫຼາຍບັນຫາສຳຄັນ

    ກອງ​ປະ­ຊຸມ​ລັດ­ຖະ­ບານ​ສະ­ໄໝ​ສາ­ມັນ ປະ­ຈຳ​ເດືອນ​ເມ­ສາ 2019 ຈັດ​ຂຶ້ນ​ວັນ​ທີ 23-24 ເມ­ສາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໂດຍ​ເປັນ​ປະ­ທານ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ມີ​ບັນ­ດາ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ສະ­ມາ­ຊິກ​ລັດ­ຖະ­ບານ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ສຸມ​ໃສ່​ປຶກ­ສາ​ຫາ­ລື ປະ­ກອບ​ຄຳ​ຄິດ​ເຫັນ ແລະ ພິ­ຈາ­ລະ­ນາ​ຮັບ­ຮອງ​ເອົາ​ເອ­ກະ­ສານ​ສຳ­ຄັນ ຄື: ບົດ​ລາຍ​ງານ​ຄວາມ​ຄືບ​ໜ້າ​ກ່ຽວ​ກັບ ການ​ແກ້​ໄຂ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ​ມະ­ຫາ​ພາກ ຕິດ​ພັນ​ກັບ​ການ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 7 ສະ­ໄໝ​ທີ X ບົດ​ລາຍ​ງານ​ກ່ຽວ​ກັບ​ການ​ສະ­ເໜີ​ຂໍ​ອະ­ນຸ­ມັດ​ຂຸດ​ຄົ້ນ​ໄມ້ ຢູ່​ໃນ​ຂອບ​ເຂດ​ໂຄງ­ການ​ພັດ­ທະ­ນາ​ຕ່າງໆ ແລະ ເກັບ​ເຄື່ອງ​ປ່າ​ຂອງ​ດົງ ປະ­ຈຳ​ປີ 2019 ບົດ​ລາຍ​ງານ​ກ່ຽວ​ກັບ​ການ​ປັບ­ປຸງ​ໂຄງ​ສ້າງ​ລາ­ຄາ​ໄຟ­ຟ້າ ຮ່າງ​ດຳ­ລັດ​ວ່າ​ດ້ວຍ​ການ​ປະ­ຢັດ​ພະ­ລັງ­ງານ ແລະ ຮ່າງ​ດຳ­ລັດ​ວ່າ​ດ້ວຍ​ຈັນ​ຍາ​ບັນ​ຂອງ​ພະ­ນັກ­ງານ-ລັດ­ຖະ­ກອນ.

    ສຳ­ລັບ​ບົດ​ລາຍ​ງານ​ຄວາມ​ຄືບ​ໜ້າ ໃນ​ການ​ແກ້​ໄຂ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ​ມະ­ຫາ​ພາກ ຕິດ​ພັນ​ກັບ​ການ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 7 ສະ­ໄໝ​ທີ X ກອງ​ປະ­ຊຸມ​ເຫັນ​ດີ ຮັບ­ຮອງ​ເອົາ ແລະ ມອບ​ໃຫ້​ກະ­ຊວງ​ກ່ຽວ­ຂ້ອງ​ນຳ­ໄປ​ປັບ­ປຸງ​ຄືນ ຕາມ​ການ​ປະ­ກອບ​ຄຳ​ເຫັນ​ຂອງ​ສະ­ມາ­ຊິກ​ລັດ­ຖະ­ບານ ໃຫ້​ມີ​ເນື້ອ​ໃນ​ຄົບ​ຖ້ວນ ກະ­ທັດ​ຮັດ ຈະ­ແຈ້ງ ເລິກ­ເຊິ່ງ ເຂົ້າ­ໃຈ​ງ່າຍ ແລະ ມີ​ຄວາມ​ເປັນ​ເອ­ກະ​ພາບ​ກັນ​ສູງ​ເປັນ­ຕົ້ນ ປັບ­ປຸງ​ນິ­ຕິ​ກຳ ການ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ ການ​ປະ­ຕິ​ຮູບ​ບັນ­ດາ​ວິ​ສາ​ຫະ​ກິດ ການ​ຄຸ້ມ​ຄອງ​ເຂດ​ເສດ­ຖະ­ກິດ ການ​ຄຸ້ມ​ຄອງ​ການ​ລົງ­ທຶນ​ຂອງ​ລັດ ການ​ປະ­ຕິ­ບັດ​ມາດ​ຕະ­ການ​ປະ­ຢັດ ການ​ຄຸ້ມ​ຄອງ​ດ່ານ ການ​ຊຸກ­ຍູ້​ການ­ທ່ອງ­ທ່ຽວ ການ​ປະ­ຕິ­ບັດ 10 ຕົວ​ຊີ້​ວັດ ທີ່​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ດຳ­ເນີນ​ທຸ­ລະ​ກິດ ແລະ ອື່ນໆ ກອງ​ປະ­ຊຸມ​ເຫັນ​ດີ​ອະ­ນຸ­ມັດ​ຂຸດ​ຄົ້ນ​ໄມ້​ທີ່​ນອນ​ຢູ່​ໃນ​ເຂດ​ໂຄງ­ການ​ພັດ­ທະ­ນາ ແລະ ກໍ່­ສ້າງ​ພື້ນ­ຖານ​ໂຄງ​ລ່າງ​ທີ່​ໄດ້​ດຳ­ເນີນ​ໄປ​ແລ້ວ ເປັນ­ຕົ້ນ ແລວ​ກໍ່­ສ້າງ​ເສັ້ນ­ທາງ ສາຍ​ສົ່ງ​ໄຟ­ຟ້າ ອ່າງ­ເກັບ­ນ້ຳ​ໃນ​ເຂື່ອນ ໂດຍ​ມອບ​ໃຫ້​ກະ­ຊວງ​ກະ­ສິ­ກຳ ແລະ ປ່າ­ໄມ້ ສົມ­ທົບ​ກັບ​ພາກ­ສ່ວນ​ທີ່​ກ່ຽວ­ຂ້ອງ ເພື່ອ​ກວດ­ກາ​ຄືນ​ຄວາມ​ຖືກ­ຕ້ອງ​ຂອງ​ຂໍ້​ມູນ ມີ​ການ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ຄັກ­ແນ່ ກຳ­ນົດ​ແຜນ­ການ​ຂຸດ​ຄົ້ນ​ໃຫ້​ລະ­ອຽດ ພ້ອມ​ທັງ​ຄົ້ນ­ຄວ້າ​ມາດ​ຕະ­ການ​ຄຸ້ມ​ຄອງ​ໃຫ້​ດີ ແທດ­ເໝາະ​ກັບ​ສະ­ພາບ​ຕົວ​ຈິງ ຫຼີກ​ລ່ຽງ​ການ​ສວຍ­ໂອ­ກາດ ສາ­ມາດ​ສ້າງ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ.

    ຕອນ​ທ້າຍ​ກອງ​ປະ­ຊຸມ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ສະ­ຫຼຸບ​ສັງ​ລວມ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຈຸດ​ສຸມ​ໃນ​ເດືອນ​ເມ­ສາ ແລະ ກຳ­ນົດ​ວຽກ​ງານ​ໃນ​ເດືອນ​ພຶດ­ສະ­ພາ 2019 ຄື: ລັດ­ຖະ­ບານ​ໄດ້​ເອົາ­ໃຈ­ໃສ່​ຊີ້​ນຳ​ການ​ແກ້​ໄຂ​ບັນ­ດາ​ປາ­ກົດ­ການ​ຫຍໍ້­ທໍ້​ຂອງ​ສັງ­ຄົມ ເຊັ່ນ: ອຸ­ບັດ­ເຫດ​ຕາມ​ຖະ­ໜົນ ຢາ​ເສບ​ຕິດ ແລະ ການ​ປະ­ພຶດ​ທີ່​ບໍ່​ເໝາະ​ສົມ​ຂອງ​ພະ­ນັກ­ງານ ຫຼື ເຈົ້າ​ໜ້າ­ທີ່​ລັດ ການ​ຊຸກ­ຍູ້ ການ​ເກັບ​ລາຍ​ຮັບ ແລະ ປະ­ຕິ­ບັດ​ລາຍ​ຈ່າຍ​ງົບ­ປະ­ມານ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ລະ­ບົບ​ການ​ຂຶ້ນ​ທະ­ບຽນ​ວິ​ສາ​ຫະ​ກິດ ເພື່ອ​ແກ້​ໄຂ​ສິ່ງ​ອຸດ​ຕັນ ແລະ ຖ່ວງ​ດຶງ​ຄວາມ​ສະ­ດວກ​ໃນ​ການ​ດຳ­ເນີນ​ທຸ­ລະ​ກິດ ພິ­ຈາ­ລະ­ນາ ແລະ ຕົກ­ລົງ​ຫຼາຍ​ບັນ­ຫາ​ທີ່​ສຳ­ຄັນ ຜ່ານ​ກົນ​ໄກ​ກອງ​ປະ­ຊຸມ​ນາ­ຍົກ-ຮອງ​ນາ­ຍົກ­ລັດ­ຖະ­ມົນ­ຕີ ເປັນ­ຕົ້ນ ການ​ຮັບ­ຮອງ​ເອົາ​ຮູບ­ຊົງ​ສະ­ຖາ­ນີ​ຫຼວງ​ພະ​ບາງ ວັງ​ວຽງ ແລະ ນະ­ຄອນ­ຫຼວງ​ວຽງ​ຈັນ ຂອງ​ໂຄງ­ການ​ທາງ​ລົດ­ໄຟ ລາວ-ຈີນ ການ​ອອກ​ແບບ​ໂຄງ​ສ້າງ ແລະ ຮູບ​ແບບ​ຕ່າງໆ​ຂອງ​ຂົວ​ຂ້າມ​ນ້ຳ­ຂອງ​ມິດ­ຕະ­ພາບ ລາວ-ໄທ ແຫ່ງ​ທີ VI (ສາ­ລະ​ວັນ-ອຸ­ບົນ​ຣາ​ຊະ​ທາ­ນີ) ການ​ພິ­ຈາ­ລະ­ນາ​ຜົນ​ການ​ກວດ­ກາ ແລະ ຢັ້ງ­ຢືນ​ມູນ​ຄ່າ​ຄວາມ​ເສຍ​ຫາຍ​ວຽກ​ແກ້​ໄຂ​ສຸກ​ເສີນ​ບັນ­ດາ​ເສັ້ນ­ທາງ ແລະ ຂົວ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ທຳ​ມະ​ຊາດ ໃນ​ລະ­ດູ­ຝົນ​ປີ 2018 ການ​ກະ­ກຽມ​ບັນ­ດາ​ເອ­ກະ­ສານ​ຕ່າງໆ ທີ່​ຈະ​ລົງ​ນາມ​ຮ່ວມ​ກັບ​ຝ່າຍ​ຈີນ ໃນ​ໂອ­ກາດ​ທີ່​ທ່ານ​ປະ­ທານ​ປະ­ເທດ​ເດີນ­ທາງ​ໄປ​ຢ້ຽມ­ຢາມ ແລະ ເຂົ້າ​ຮ່ວມ​ກອງ​ປະ­ຊຸມ​ຢູ່​ຈີນ ພິ­ຈາ­ລະ­ນາ​ໂຄງ­ການ​ລົງ­ທຶນ​ຜ່ານ​ກົນ​ໄກ​ກອງ​ປະ­ຊຸມ​ຂອງ​ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ຂັ້ນ​ສູນ​ກາງ ລວມ​ທັງ​ໝົດ​ຫຼາຍ​ກວ່າ 17 ໂຄງ­ການ.

ຂ່າວທີ່ກ່ຽວຂ້ອງ