ຜູ້​ມີ​ສິດ​ເລືອກ​ຕັ້ງ​ສ່ວນ​ຫຼາຍ​ໃນ​ເອ​ຢິບ ໃຫ້ການ​ສະໜັບສະໜູນ​ຕໍ່​ການ​ດັດແກ້​ລັດ​ຖະ​ທຳ​ມະນູນ

2.035 25 ມ.ສ. 2019 ຂ່າວຕ່າງປະເທດ
ຜູ້​ມີ​ສິດ​ເລືອກ​ຕັ້ງ​ສ່ວນ​ຫຼາຍ​ໃນ​ເອ​ຢິບ ໃຫ້ການ​ສະໜັບສະໜູນ​ຕໍ່​ການ​ດັດແກ້​ລັດ​ຖະ​ທຳ​ມະນູນ

   ອົງການ​ການ​ເລືອກ​ຕັ້ງ​ແຫ່ງ​ຊາດ (NEA) ຂອງ​ເອ​ຢິບ ໄດ້​ຈັດ​ກອງ​ປະຊຸມ​ຖະແຫຼງ​ຂ່າວ ເມື່ອ​ວັນ​ທີ 23 ເມສາ​ນີ້ ເພື່ອ​ປະກາດ​ຜົນ​ການ​ລົງ​ປະຊາ​ມະຕິ ກ່ຽວ​ກັບ​ການ​ດັດແກ້​ລັດ​ຖະ​ທຳ​ມະນູນ ຊຶ່ງ​ຜົນ​ທີ່​ອອກ​ມາ​ກໍ​ຄື ອັດຕາ​ສ່ວນ​ຜູ້​ມີ​ສິດ​ເລືອກ​ຕັ້ງ ທີ່​ໃຫ້ການ​ສະໜັບສະໜູນ​ການ​ດັດແກ້​ເນື້ອ​ໃນ​ຈຳນວນ​ໜຶ່ງ ຢູ່​ໃນ​ລັດ​ຖະ​ທຳ​ມະນູນ​ຂອງ​ເອ​ຢິບ ຢູ່​ທີ່ 88,83%.

   ທ່ານ ລາ​ຊິນ ອີ​ບຣາ​ຮິມ ຫົວໜ້າ NEA ເວົ້າ​ວ່າ ຈຳນວນ​ຜູ້​ມີ​ສິດ​ເລືອກ​ຕັ້ງ ໄປ​ເຂົ້າ​ຮ່ວມ​ການ​ປ່ອນ​ບັດ​ໃນ​ການ​ລົງ​ປະຊາ​ມະຕິ​ໃນ​ເທື່ອ​ນີ້ ທັງ​ຢູ່​ພາຍ​ໃນ ແລະ​ ນອກ​ປະເທດ ມີ​ກວ່າ 27 ລ້ານ​ຄົນ ກວມ​ເອົາ 44,33% ຂອງ​ຍອດ​ຈຳນວນ​ຜູ້​ມີ​ສິດ​ປ່ອນ​ບັດ 61,3 ລ້ານ​ຄົນ.

   ຜົນ​ຂອງ​ການ​ນັບ​ບັດ​ຄະແນນ​ສຽງ ຊີ້​ໃຫ້​ເຫັນ​ວ່າ ໃນ​ຈຳນວນ​ບັດ​ທີ່​ຖືກຕ້ອງ 26,36 ລ້ານ​ໃບ​ນັ້ນ ອັດຕາ​ສ່ວນ​ຜູ້​ໃຫ້ການ​ສະໜັບສະໜູນ​ຕໍ່​ການ​ດັດແກ້​ລັດ​ຖະ​ທຳ​ມະນູນ ຢູ່​ທີ່ 88,83% ໃນ​ຂະນະ​ທີ່​ອັດຕາ​ສ່ວນ​ຜູ້​ບໍ່​ສະໜັບສະໜູນ  ມີ​ພຽງ 11,17%.

    ກ່ອນ​ໜ້າ​ນີ້ ສະພາ​ແຫ່ງ​ຊາດ​ເອ​ຢິບ ໄດ້​ຮັບຮອງ​ການ​ເໜີ​ດັດແກ້ ລັດ​ຖະ​ທຳ​ມະນູນ ສະບັບ​ປີ 2014. ບັນດາ​ເນື້ອ​ໃນ​ດັດແກ້​ທີ່​ສຳຄັນ​ທີ່​ສຳຄັນ​ທີ່​ສຸດ ຢູ່​ໃນ​ລັດ​ຖະ​ທຳ​ມະນູນ​ຂອງ​ເອ​ຢິບ ປະກອບ​ມີ​ການ​ແກ່ຍາວ​ອາຍຸ​ການ​ຂອງ​ປະທານາທິບໍດີ ຈາກ 4 ປີ ຂຶ້ນ​ເປັນ 6 ປີ ລວມ​ເຖິງ​ການ​ຈັດ​ສັນ 25% ຂອງ​ຈຳນວນ​ທີ່​ນັ່ງ​ໃນ​ສະພາ​ແຫ່ງ​ຊາດ ໃຫ້​ແກ່​ຜູ້​ສະໝັກ​ຮັບ​ເລືອກ​ຕັ້ງ​ທີ່​ເປັນ​ເພດ​ຍິງ ການ​ສ້າງຕັ້ງ​ສະພາ​ສູງ​ຂຶ້ນ​ກັບ​ສະພາ​ແຫ່ງ​ຊາດ ແລະ ການ​ຮື້​ຟື້ນ​ຕຳແໜ່ງ​ຮອງ​ປະທານາທິບໍດີ.

   ຈາກ​ຜົນ​ການ​ລົງ​ປະຊາ​ມະຕິ ທີ່​ອອກ​ມາ​ຄື​ດັ່ງກ່າວ ເຮັດ​ໃຫ້ການ​ດຳລົງ​ຕຳແໜ່ງ​ສະໄໝ​ທີ​ສອງ ຂອງ​ປະທານາທິບໍດີ​ເອ​ຢິບ ອັບ​ແດລ ຟາ​ຕາ ແອ​​ລ-ຊີ​ຊີ ຈະ​ໄດ້ແກ່​ຍາວ​ໄປ​ອີກ 2 ປີ ໄປ​ຮອດ​ປີ  2024 ແລະ​ ສາມາດ​ສືບຕໍ່​ສະໝັກ​ແຂ່ງຂັນ​ຊີງ​ໄຊ​ໄດ້​ຕື່ມ​ອີກ​ໜຶ່ງ​ສະໄໝ. 

ຂ່າວທີ່ກ່ຽວຂ້ອງ