ກຽມຄວາມພ້ອມໃນການປ້ອງກັນພະຍາດ ອະຫິວາໝູອາຟຣິກາ

1.761 25 ມ.ສ. 2019 ຂ່າວໜ້າ​ໜຶ່ງ
ກຽມຄວາມພ້ອມໃນການປ້ອງກັນພະຍາດ ອະຫິວາໝູອາຟຣິກາ

    ກົມ​ລ້ຽງ­ສັດ ແລະ ການ​ປະ­ມົງ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຈັດ​ສຳ​ມະ​ນາ​ວາງ​ແຜນ​ຮັບ​ມື​ກັບ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ຂຶ້ນ​ວັນ​ທີ 24-25 ເມ­ສາ 2019 ທີ່​ນະ­ຄອນ­ຫຼວງ​ວຽງ​ຈັນ ສະ­ໜັບ­ສະ­ໜູນ​ໂດຍ​ອົງ­ການ​ອາ­ຫານ ແລະ ການ​ກະ­ເສດ ປະ­ຈຳ​ລາວ ເປັນ​ປະ­ທານ​ຮ່ວມ​ຂອງ​ທ່ານ ສົມ​ພັນ ຈັນ​ເພັງ​ໄຊ ຫົວ­ໜ້າ​ກົມ​ລ້ຽງ­ສັດ ແລະ ການ​ປະ­ມົງ ແລະ ທ່ານ ນາ​ຊາ ຮາ​ຢັດ ຜູ້­ຕາງ­ໜ້າ​ອົງ­ການ​ອາ­ຫານ ແລະ ການ​ກະ­ເສດ ປະ­ຈຳ​ລາວ ມີ​ພະ­ນັກ­ງານ​ຈາກ​ກົມ​ລ້ຽງ­ສັດ ແລະ ການ​ປະ­ມົງ ຂະ­ແໜງ​ລ້ຽງ­ສັດ ແລະ ການ​ປະ­ມົງ ຈາກ 18 ແຂວງ ເຈົ້າ​ໜ້າ­ທີ່​ສັດ­ຕະ­ວະ­ແພດ​ປະ­ຈຳ​ດ່ານ ຜູ້​ປະ­ກອບ​ການ​ຟາມ​ລ້ຽງ​ໝູ ແລະ ໂຮງ​ຂ້າ​ສັດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ປັດ­ຈຸ­ບັນ ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ໄດ້​ເກີດ​ການ​ລະ­ບາດ​ຢູ່​ປະ­ເທດ​ໃກ້​ຄຽງ ເຊັ່ນ: ສປ ຈີນ ຫວຽດ­ນາມ ແລະ ກຳ­ປູ­ເຈຍ ເພື່ອ​ເປັນ​ການ​ປ້ອງ​ກັນ ແລະ ຄວບ​ຄຸມ­ພະ​ຍາດ​ດັ່ງ­ກ່າວ​ແຕ່​ຫົວ­ທີ ບໍ່​ໃຫ້​ແຜ່​ລາມ ຫຼື ເກີດ​ຂຶ້ນ​ໃນ​ລາວ ກົມ​ລ້ຽງ­ສັດ ແລະ ການ​ປະ­ມົງ ຈຶ່ງ​ໄດ້​ຈັດ​ສຳ​ມະ​ນາ​ຄັ້ງ​ນີ້​ຂຶ້ນ ເພື່ອ​ການ​ຮຽນ​ຮູ້ ແລະ ແລກ­ປ່ຽນ​ບົດ­ຮຽນ ປະ­ສົບ​ການ​ໃນ​ການ​ປ້ອງ​ກັນ ການ​ກວດ​ຄົ້ນ​ພົບ ແລະ ການ​ຕອບ​ໂຕ້​ໄວ​ຕໍ່​ກັບ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ທັງ​ເພື່ອ​ເປັນ​ການ​ສ້າງ​ຄວາມ​ເຂັ້ມ­ແຂງ​ໃຫ້​ກັບ​ພະ­ນັກ­ງານ​ຢູ່​ໃນ​ແຕ່​ລະ​ຂັ້ນ ໃຫ້​ກຽມ­ພ້ອມ​ເພື່ອ​ຕອບ​ໂຕ້​ໃນ​ເວ­ລາ​ມີ​ການ​ລະ­ບາດ​ເກີດ​ຂຶ້ນ ນອກ​ນັ້ນ ໃນ​ການ​ສຳ​ມະ​ນາ​ຄັ້ງ​ນີ້ ໄດ້​ພ້ອມ​ກັນ​ກຳ­ນົດ​ສິ່ງ​ທ້າ​ທາຍ ແລະ ຊ່ອງ​ວ່າງ​ຂອງ​ແຜນ­ການ ກຽມ­ພ້ອມ​ຕອບ​ໂຕ້​ຂອງ​ພະ­ຍາດ​ດັ່ງ­ກ່າວ ແລະ ສາ­ມາດ​ຕິດ­ຕາມ​ໂດຍ​ສູນ​ປະ­ສານ​ງານ​ສຸກ​ເສີນ​ຂອງ​ອົງ­ການ​ອາ­ຫານ ແລະ ການ​ກະ­ເສດ (FAO Emergency management center) ແລະ ສິ່ງ​ທີ່​ຈັດ​ຕັ້ງ​ປະ­ຕິ­ບັດ​ຜ່ານ​ມາ.

    ເພື່ອ​ເປັນ​ການ​ປ້ອງ​ກັນ​ໃນ​ເບື້ອງ​ຕົ້ນ ໃນ​ໄລ­ຍະ​ຜ່ານ​ມາ​ກົມ​ລ້ຽງ­ສັດ ແລະ ການ​ປະ­ມົງ​ກໍ​ໄດ້​ອອກ​ແຈ້ງ​ການ​ໃນ​ການ​ຄວບ​ຄຸມ​ການ​ເຄື່ອນ​ຍ້າຍ​ສັດ ແລະ ຜະ­ລິດ​ຕະ​ພັນ​ສັດ ໂດຍ​ສະ­ເພາະ ໝູ​ຢ່າງ​ເຄັ່ງ​ຄັດ​ຢູ່​ຕາມ​ຊາຍ​ແດນ ແລະ ພາຍ​ໃນ​ທ້ອງ­ຖິ່ນ ແລະ ໄດ້​ມອບ​ໃຫ້​ພະ­ນັກ­ງານ​ຂະ­ແໜງ​ລ້ຽງ­ສັດ ແລະ ການ​ປະ­ມົງ​ໃນ​ແຕ່​ລະ​ແຂວງ​ເອົາ­ໃຈ­ໃສ່​ຕິດ­ຕາມ​ເຝົ້າ​ລະ­ວັງ​ພະ­ຍາດ​ດັ່ງ­ກ່າວ ນຳ​ການ​ລ້ຽງ­ສັດ​ຂອງ​ຊາວ​ກະ­ສິ­ກອນ ແລະ ການ​ລ້ຽງ­ສັດ​ແບບ​ເປັນ​ຟາມ ທັງ​ປະ­ສານ​ສົມ­ທົບ​ກັບ​ອົງ​ການ­ຈັດ­ຕັ້ງ​ສາ­ກົນ ເພື່ອ​ເຮັດ​ວຽກ​ງານ​ຄວບ​ຄຸມ ໄດ້​ຜະ­ລິດ​ສື່​ໂຄ­ສະ­ນາ ແລະ ເຮັດ​ວຽກ​ງານ​ກ່ຽວ​ກັບ​ການ​ເຝົ້າ​ລະ­ວັງ​ພະ­ຍາດ​ນີ້ ປະ­ຈຳ​ດ່ານ​ຊາຍ​ແດນ​ລະ­ຫວ່າງ​ປະ­ເທດ ພ້ອມ​ທັງ​ໄດ້​ກຽມ​ຄວາມ​ພ້ອມ​ໃນ​ການ​ຈັດ​ສັນ​ອຸ­ປະ­ກອນ ແລະ ເຄື່ອງ­ມື​ພາກ​ສະ­ໜາມ ແລະ ເຄື່ອງ­ມື​ໃນ​ການ­ບົ່ງ­ມະ­ຕິ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ.

ຂ່າວທີ່ກ່ຽວຂ້ອງ