ເວ​ເນ​ຊູ​ເອ​ລາ ສະເໜີ​ໃຫ້ Interpol ຕາມ​ລ່າ​ເປົ້າ​ໝາຍ​ທຳລາຍ​ຕາ​ນ່າງ​ໄຟຟ້າ

1.815 25 ມ.ສ. 2019 ຂ່າວຕ່າງປະເທດ
ເວ​ເນ​ຊູ​ເອ​ລາ ສະເໜີ​ໃຫ້ Interpol ຕາມ​ລ່າ​ເປົ້າ​ໝາຍ​ທຳລາຍ​ຕາ​ນ່າງ​ໄຟຟ້າ

   ລັດຖະບານ​ເວ​ເນ​ຊູ​ເອ​ລາ ພາຍ​ໃຕ້​ການ​ນຳພາ​ຂອງ​ປະທານາທິບໍດີ ນີ​ໂກ​ລາ​​ສ ມາ​ດູ​ໂຣ ແຈ້ງ​ໃຫ້​ຮູ້ເມື່ອ​ວັນ​ທີ 23 ເມສາ​ນີ້​ວ່າ ໄດ້​ສະເໜີ​ໄປ​ຍັງ​ອົງການ​ຕຳຫຼວດ​ອາຍາ​ສາກົນ (Interpol) ໃຫ້​ຕາມ​ລ່າ​ຈັບ​ກຸມ​ເປົ້າ​ໝາຍ 3 ຄົນ ທີ່​ຖືກ​ກ່າວ​ຫາ​ວ່າ​ເປັນ​ຜູ້​ໂຈມ​ຕີ​ໃສ່​ລະບົບ​ໄຟຟ້າ​ຂອງ​ເວ​ເນ​ຊູ​ເອ​ລາ ເມື່ອ​ວັນ​ທີ 7 ມີນາ​ທີ່​ຜ່ານ​ມາ ຊຶ່ງ​ໃນ​ເວລາ​ນີ້ ພວກ​ເຂົາ​ພວມ​ຊ່ອນ​ຕົວ​ຢູ່​ໃນ ສ ອາ​ເມ​ຣິ​ກາ ແອັດ​ສະ​ປາຍ ແລະ​ໂກ​ລົມ​ບີ.

   ທ່ານ ໂຈກ ໂຣດ​ຣີ​ເກ​​ສ ລັດຖະມົນຕີ​ສື່ສານ​ຂອງ​ເວ​ເນ​ຊູ​ເອ​ລາ ກ່າວ​ຜ່ານ​ທາງ​ໂທລະພາບ​ແຫ່ງ​ລັດ​ຊ່ອງ VTV ໂດຍ​ໄດ້​ກ່າວ​ປະນາມ​ຕໍ່​ການ​ກະທຳ ຂອງ​ເປົ້າ​ໝາຍ​ທັງ​ສາມ​ດັ່ງກ່າວ ຊຶ່ງ​ເຮັດ​ວຽກ​ໃຫ້​ແກ່​ບໍລິສັດ​ອິນ​ເຕີ​ເນັດ​ແຫ່ງ​ໜຶ່ງ ຢູ່​ໃນ​ປະເທດ​ໂກ​ລົມ​ບີ. ທ່ານ ໂຣດ​ຣີ​ເກ​​ສ ໃຫ້​ຮູ້​ຕື່ມ​ວ່າ ມາ​ຮອດ​ເວລາ​ນີ້ ຈັບ​ກຸມ​ຜູ້​ຕ້ອງ​ສົງ​ໃສ​ໄດ້​ແລ້ວ 5 ຄົນ ຊຶ່ງ​ພວກ​ເຂົາ​ໄດ້​ເຂົ້າ​ຮ່ວມ​ໂດຍ​ກົງ ໃນ​ເຫດການ​ໂຈມ​ຕີ​ໂຮງງານ​ໄຟຟ້າ​ແຮງ​ນ້ຳ ກູ​ຣີ ຂອງ​ເວ​ເນ​ຊູ​ເອ​ລາ; ແລະ ​ຜູ້​ທີ່​ຖືກ​ຈັບ​ຕົວ​ມາ​ໄດ້​ນັ້ນ ໄດ້​ໃຫ້ການ​ຕໍ່​ກະຊວງ​ສາທາລະນະ ເຖິງ​ຜູ້​ທີ່​ກ່ຽວຂ້ອງ​ອື່ນໆ ທີ່​ກ່ຽວ​ພັນ​ກັບ​ເຫດການ​ໂຈມ​ຕີ​ນັ້ນ.

   ໃນ 2 ປີ​ທີ່​ຜ່ານ​ມາ ມີ​ສະຖານີ​ໄຟຟ້າ​ກວ່າ 50% ຈາກ​ຈຳນວນ 500 ສະຖານີ ຢູ່​ໃນ​ເວ​ເນ​ຊູ​ເອ​ລາ ໄດ້​ຖືກ​ທຳລາຍ. ມາ​ຮອດ​ເວລາ​ນີ້ ສະພາບ​ການ​ສະໜອງ​ໄຟ້​ຟ້າ​ທົ່ວ​ປະເທດ​ເວ​ເນ​ຊູ​ເອ​ລາ ໄດ້​ບັນລຸ​ຄວາມ​ສົມ​ດຸນ​ພໍ​ສົມຄວນ​ແລ້ວ. ນັບ​ແຕ່​ວັນ​ທີ 31 ມີນາ​ປີ​ນີ້​ເປັນຕົ້ນ​ມາ ລັດຖະບານ​ເວ​ເນ​ຊູ​ເອ​ລາ ໄດ້​ນຳ​ໃຊ້​ແຜນການ​ແບ່ງປັນ​ການ​ບໍ​ລິ​ການແຈກຢາຍ​ໄຟຟ້າ.

ຂ່າວທີ່ກ່ຽວຂ້ອງ