ຊົນລະປະທານຫຼາຍໂຄງການ ຕ້ອງໄດ້ຟື້ນຟູສ້ອມແປງ

2.173 25 ມ.ສ. 2019 ຂ່າວໜ້າ​ໜຶ່ງ

    ໃນ​ແຕ່​ລະ​ປີ ພັກ ແລະ ລັດ­ຖະ­ບານ ກໍ​ຄື ກະ­ຊວງ​ກະ­ສິ­ກຳ ແລະ ປ່າ­ໄມ້ ຕະ­ຫຼອດ​ຮອດ​ຂະ­ແໜງ­ການ​ກ່ຽວ­ຂ້ອງ ໄດ້​ເອົາ­ໃຈ­ໃສ່​ໃນ​ການ​ຕິດ­ຕາມ​ຊຸກ­ຍູ້ ສ້ອມ­ແປງ ແລະ ຟື້ນ​ຟູ​ຊົນ­ລະ­ປະ­ທານ ເພື່ອ​ສະ­ໜອງ​ນ້ຳ​ໃຫ້​ແກ່​ການ​ຜະ­ລິດ​ກະ­ສິ­ກຳ ທັງ​ສອງ​ລະ­ດູ​ມີ​ຄວາມ​ພຽງ­ພໍ.

    ຕາມ​ບົດ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ກະ­ສິ­ກຳ ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ປະ­ຈຳ​ປີ 2018 ແລະ ທິດ​ທາງ​ແຜນ­ການ ປີ 2019 ໃຫ້​ຮູ້​ວ່າ: ໄລ­ຍະ​ຜ່ານ​ມາ ກະ­ຊວງ​ກະ­ສິ­ກຳ ແລະ ປ່າ­ໄມ້​ໄດ້​ຕິດ­ຕາມ​ການ​ສະ­ໜອງ​ນ້ຳ​ການ​ຜະ­ລິດ​ລະ­ດູ­ແລ້ງ​ປີ 2017-2018 ໃນ​ຂອບ​ເຂດ​ທົ່ວ​ປະ­ເທດ ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ໄດ້​ທັງ​ໝົດ 156.000 ເຮັກ­ຕາ ເທົ່າ​ກັບ 97% ຂອງ​ເນື້ອ­ທີ່​ແຜນ­ການ ໃນ​ນັ້ນ ເນື້ອ­ທີ່​ປູກ​ເຂົ້າ­ນາ­ແຊງ 90.000 ເຮັກ­ຕາ ເທົ່າ​ກັບ 95% ຂອງ​ເນື້ອ­ທີ່​ແຜນ­ການ ແລະ ເນື້ອ­ທີ່​ປູກ​ພືດ​ໃນ​ເຂດ​ຊົນ­ລະ­ປະ­ທານ 66.000 ເຮັກ­ຕາ ສ່ວນ​ການ​ສະ­ໜອງ​ນ້ຳ​ລະ­ດູ­ຝົນ​ປີ 2018 ລວມ​ເນື້ອ­ທີ່​ທັງ​ໝົດ 279.700 ເຮັກ­ຕາ ໃນ​ນັ້ນ ເນື້ອ­ທີ່​ປູກ​ເຂົ້າ­ນາ​ປີ 253.200 ເຮັກ­ຕາ ແລະ ເນື້ອ­ທີ່​ປູກ​ພືດ 26.500 ເຮັກ­ຕາ ໃນ​ຈຳ­ນວນ 15.119 ໂຄງ­ການ.

    ສັງ​ລວມ​ແຜນ​ສະ­ເໜີ​ຄວາມ​ຕ້ອງ­ການ​ຟື້ນ​ຟູ-ສ້ອມ­ແປງ​ລະ­ບົບ​ຊົນ­ລະ­ປະ­ທານ​ທີ່​ເກົ່າ​ແກ່​ຊຸດ­ໂຊມ ແລະ ບັນ­ດາ​ໂຄງ­ການ​ຊົນ­ລະ­ປະ­ທານ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ທຳ​ມະ​ຊາດ ລະ­ດູ­ຝົນ​ປີ 2018 ໃນ​ຂອບ​ເຂດ​ທົ່ວ​ປະ­ເທດ​ມີ 2 ບ້ວງ ຄື: ບ້ວງ​ຟື້ນ​ຟູ-ສ້ອມ­ແປງ​ປົກ­ກະ­ຕິ ປີ 2019 ແມ່ນ​ໂຄງ­ການ​ທີ່​ເກົ່າ​ແກ່​ຊຸດ­ໂຊມ ລວມ​ມີ 18 ແຂວງ 351 ໂຄງ­ການ ເນື້ອ­ທີ່ 25.656 ເຮັກ­ຕາ ລວມ​ມູນ​ຄ່າ 99 ຕື້​ກີບ ບັນ­ດາ​ໂຄງ­ການ​ດັ່ງ­ກ່າວ​ແມ່ນ​ທ້ອງ­ຖິ່ນ​ເປັນ​ຜູ້​ຂຶ້ນ​ແຜນ ໂດຍ​ຜ່ານ​ສະ­ພາ​ທ້ອງ­ຖິ່ນ ເພື່ອ​ນຳ​ສະ​ໜີ​ຕໍ່​ລັດ­ຖະ­ບານ ອະ­ນຸ­ມັດ​ຈັດ​ຕັ້ງ​ປະ­ຕິ­ບັດ​ຕາມ​ລະ­ບຽບ​ການ ແລະ ບ້ວງ​ຟື້ນ​ຟູ-ສ້ອມ­ແປງ​ສຸກ​ເສີນ ແມ່ນ​ໂຄງ­ການ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ທຳ​ມະ​ຊາດ ສະ­ເພາະ​ໂຄງ­ການ​ທີ່​ຈະ​ສະ­ໜອງ​ນ້ຳ ໃຫ້​ເນື້ອ­ທີ່​ການ​ຜະ­ລິດ​ລະ­ດູ­ແລ້ງ ສົກ​ປີ 2018-2019 ລວມ​ມີ 11 ແຂວງ ມູນ​ຄ່າ 35 ຕື້​ກີບ ຈຳ­ນວນ 242 ໂຄງ­ການ ຄວາມ​ຄືບ​ໜ້າ​ຂອງ​ການ​ຟື້ນ​ຟູ-ສ້ອມ­ແປງ​ມາ​ຮອດ​ປັດ­ຈຸ­ບັນ ສຳ­ເລັດ​ການ­ຈັດ­ຕັ້ງ​ປະ­ຕິ­ບັດ​ໜ້າ​ວຽກ ແລະ ສືບ­ຕໍ່​ການ​ປະ­ກອບ​ເອ­ກະ­ສານ​ຂໍ​ຖອນ​ງົບ­ປະ­ມານ​ເພື່ອ​ຊຳ­ລະ ພ້ອມ​ນັ້ນ ໄດ້​ສັງ​ລວມ​ບັນ­ຊີ​ໂຄງ­ການ​ຈັກ­ສູບ­ນ້ຳ​ໄຟ­ຟ້າ​ຢູ່​ເຂດ​ຈຸດ​ສຸມ​ການ​ຜະ­ລິດ ໂຄງ­ການ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ທຳ​ມະ​ຊາດ ລວມ​ມີ 8 ແຂວງ 199 ໂຄງ­ການ ເພື່ອ​ສະ­ເໜີ​ປະ­ຕິ­ບັດ​ນະ­ໂຍ­ບາຍ​ຫຼຸດ​ຄ່າ​ກະ­ແສ​ໄຟ­ຟ້າ 50% ໃນ​ລະ­ບົບ​ແຮງ​ດັນ 22 ກິ​ໂລ​ໂວນ ຈາກ 448 ກີບ​ຕໍ່​ກິ​ໂລ​ວັດ ຍັງ​ເຫຼືອ 224 ກີບ​ຕໍ່​ກິ​ໂລ​ວັດ ການ​ປະ­ຕິ­ບັດ​ນະ­ໂຍ­ບາຍ​ດັ່ງ­ກ່າວ​ເລີ່ມ​ແຕ່​ວັນ​ທີ 1 ມັງ­ກອນ 2019 ຫາ​ວັນ​ທີ 1 ມັງ­ກອນ 2020 ຕາມ​ແຈ້ງ​ການ​ຂອງ​ກະ­ຊວງ​ພະ­ລັງ­ງານ ແລະ ບໍ່​ແຮ່ ລົງ​ວັນ​ທີ 28 ທັນ­ວາ 2018.

    ສຳ­ລັບ​ທິດ​ທາງ​ໃນ­ຕໍ່­ໜ້າ ສູ້​ຊົນ​ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ລະ­ດູ­ແລ້ງ​ສົກ​ປີ 2018-2019 ໃຫ້​ໄດ້ 165.000 ເຮັກ­ຕາ ໃນ​ນັ້ນ ສະ­ໜອງ​ໃຫ້​ແກ່​ເນື້ອ­ທີ່​ປູກ​ເຂົ້າ­ນາ­ແຊງ 100.000 ເຮັກ­ຕາ ແຜນ­ການ​ສະ­ໜອງ​ໃຫ້​ແກ່​ການ​ປູກ​ພືດ​ໃນ​ເຂດ​ຊົນ­ລະ­ປະ­ທານ 65.000 ເຮັກ­ຕາ ພ້ອມ​ທັງ​ສືບ­ຕໍ່​ຟື້ນ​ຟູ​ສ້ອມ­ແປງ​ລະ­ບົບ​ຊົນ­ລະ­ປະ­ທານ​ທີ່​ເກົ່າ​ແກ່​ຊຸດ­ໂຊມ ໃຫ້​ທັນ​ກັບ​ລະ­ດູ​ການ​ຊຸກ­ຍູ້​ການ​ປົກ​ປັກ​ຮັກ­ສາ​ແຫຼ່ງ​ນ້ຳ ເພື່ອ​ບໍ່​ໃຫ້​ມີ​ສະ­ພາບ​ບົກ​ແຫ້ງ​ຕື້ນ​ເຂີນ​ເກີດ​ຫາດ​ຊາຍ ແລະ ສືບ­ຕໍ່​ປັບ­ປຸງ​ສ້າງ​ແຜນ​ຍຸດ​ທະ​ສາດ​ການ​ພັດ­ທະ­ນາ​ຊົນ­ລະ­ປະ­ທານ ຮອດ​ປີ 2025 ແລະ ວິ­ໄສ​ທັດ​ຮອດ​ປີ 2030.

ຂ່າວທີ່ກ່ຽວຂ້ອງ