ຜູ້ນຳ​ຂອງ ​ສປປ ເກົາຫຼີ ເດີນທາງ​ໄປ​ຢ້ຽມຢາມ​ຣັດ​ເຊຍ

1.997 25 ມ.ສ. 2019 ຂ່າວຕ່າງປະເທດ
ຜູ້ນຳ​ຂອງ ​ສປປ ເກົາຫຼີ ເດີນທາງ​ໄປ​ຢ້ຽມຢາມ​ຣັດ​ເຊຍ

   ສື່ສານ​ແຫ່ງ​ລັດ​ຂອງ ​ສປປ ເກົາຫຼີ ລາຍ​ງານ​ວ່າ ທ່ານ ກິມ​ເຈິງ​ອູນ ຜູ້ນຳ ​ສປປ ເກົາຫຼີ ໄດ້​ເລີ່ມ​ເດີນທາງ​ໂດຍ​ທາງ​ລົດໄຟ ໄປ​ຍັງ​ຣັດ​ເຊຍ ໃນ​ວັນ​ທີ 24 ເມສາ​ນີ້ ເພື່ອ​ດຳເນີນ​ການ​ພົບ​ປະ​ສຸດ​ຍອດ​ເປັນ​ເທື່ອ​ທຳ​ອິດ ກັບ​ປະທານາທິບໍດີ ວາ​ລາ​ດີ​ເມຍ ປູ​ຕິນ ຜູ້ນຳ​ຂອງ​ຣັດ​ເຊຍ. ສຳນັກ​ຂ່າວສານ​ສູນ​ກາງຂອງ ​ສປປ ເກົາຫຼີ (KCNA) ໃຫ້​ຮູ້​ວ່າ ຂະ​ບວນ​ລົດໄຟ​ພິເສດ ຂອງ​ຜູ້ນຳ ​ສປປ ເກົາຫຼີ ໄດ້​ອອກ​ເດີນທາງ​ໄປ​ຍັງ​ຣັດ​ເຊຍ ໃນ​ຕອນ​ເຊົ້າ​ຂອງ​ວັນ​ທີ 24 ເມສາ.

   ເມື່ອ​ວັນ​ທີ 23 ເມສາ​ນີ້ ວັງ​ແກຣມ​ແລງ ໄດ້​ຢັ້ງຢືນ​ວ່າ ການ​ປະຊຸມ​ສຸດ​ຍອດ​ລະຫວ່າງ​ຜູ້ນຳ​ຣັດ​ເຊຍ ກັບ​ຜູ້ນຳ ​ສປປ ເກົາຫຼີ ຈະ​ມີ​ຂຶ້ນ​ໃນ​ວັນ​ທີ 25 ເມສາ ທີ່​ນະຄອນ ວາ​ລາ​ດີວ​​ົສ​ຕົກ ໃນ​ເຂດ​ຕາເວັນ​ອອກ​ໄກ​ຂອງ​ຣັດ​ເຊຍ.

   ໃນ​ວັນ​ດຽວ​ກັນ ສື່ສານ​ຂອງ ​ສປປ ເກົາຫຼີ ກໍ​ລາຍ​ວ່າ ທ່ານ ກິມ​ເຈິງ​ອູນ ຈະ​ຢ້ຽມຢາມ​ຣັດ​ເຊຍ ໃນ​ເວລາ​ອັນ​ໃກ້​ນີ້ ເພື່ອ​ພົບ​ປະ​ເຈລະຈາ​ກັບ​ປະທານາທິບໍດີ ປູ​ຕິນ.

ຂ່າວທີ່ກ່ຽວຂ້ອງ