ບັນດາ​ເຈົ້າ​ໜີ້ ຄາດ​ວ່າ​ຈະ “ປ້ອນ” ເງິນ 1,4 ຕື້​ໂດ​ລາ​ເຂົ້າ​ໄປ​ໃນ Asiana Airlines

1.880 25 ມ.ສ. 2019 ຂ່າວຕ່າງປະເທດ
ບັນດາ​ເຈົ້າ​ໜີ້ ຄາດ​ວ່າ​ຈະ “ປ້ອນ” ເງິນ 1,4 ຕື້​ໂດ​ລາ​ເຂົ້າ​ໄປ​ໃນ Asiana Airlines

    ທ່ານ ຮົງ​ນາມ​ກີ ລັດຖະມົນຕີ​ການ​ເງິນ​ຂອງ ສ ເກົາຫຼີ ກ່າວ​ເມື່ອ​ວັນ​ທີ 23 ເມສາ​ນີ້​ວ່າ ບັນດາ​ເຈົ້າ​ໜີ້​ຂອງ Asiana Airlines Inc. (ສ ເກົາຫຼີ) ຄາດ​ວ່າ​ຈະ “ປ້ອນ” ເງິນ 1.600 ຕື້​ວອນ (ເທົ່າ​ກັບ 1,4 ຕື້​ໂດ​ລາ​ສະຫະລັດ) ເພື່ອ​ຊ່ວຍເຫຼືອ​ບໍລິສັດ​ການບິນ​ດັ່ງກ່າວ ໃນ​ການ​ຜ່ານ​ຜ່າ​ໄລຍະ​ແຫ່ງ​ຄວາມ​ຫຍຸ້ງຍາກ.

   ບ້ວງ​ເງິນ​ຊ່ວຍເຫຼືອ​ດັ່ງກ່າວ ສ່ວນ​ໃຫຍ່​ແມ່ນ​ຈະ​ມາ​ຈາກ​ບັນດາ​ເຈົ້າ​ໜີ້ ອັນ​ມີ​ທະນາຄານ​ພັດທະນາ ສ ເກົາຫຼີ (KDB) ເປັນ​ຜູ້ນຳ​ໜ້າ ເພື່ອ​ຈັດ​ຊື້​ເອົາ​ພັນທະບັດ​ຖາວອນ (ບໍ່​ມີ​ມື້​ກຳນົດ) ຈຳນວນ 500 ຕື້​ວອນ ທີ່ Asiana Airlines ຈະ​ຂາຍ​ອອກ ແລະ ​ສະໜອງ​ສິນ​ເຊື່ອ 800 ຕື້​ວອນ. ໃນ​ຂະນະ​ດຽວ​ກັນ ສ່ວນ​ທີ່​ຍັງ​ເຫຼືອ​ອີກ 300 ຕື້​ວອນ ແມ່ນ​ຈະ​ໄດ້​ສະໜອງ​ພາຍ​ໃຕ້​ຮູບ​ການ​ສິນ​ເຊື່ອ​ປ້ອງ​ກັນ​ສຳຮອງ.

    ທ່ານ ຮົງ​ນາມ​ກີ ເວົ້າ​ວ່າ ບັນດາ​ເຈົ້າ​ໜີ້ ນຳ​ເອົາ​ການ​ຕົກລົງ​ດັ່ງກ່າວ​ອອກ​ມາ ຂະນະ​ທີ່​ການເຄື່ອນໄຫວ​ທຸລະ​ກິດ​ຂອງ Asiana Airlines ຍັງ​ຢູ່​ໃນ​ສະພາບ​ທີ່​ສະດວກ ແລະ​ ບັນດາ​ຜູ້​ຖື​ຫຸ້ນ ນຳ​ເອົາ​ແຜນການ​ກອບ​ກູ້​ທີ່​ໜ້າ​ເຊື່ອ​ຖື​ອອກ​ມາ ອັນ​ມີ​ລວມ​ເຖິງ​ແຜນການ​ຂາຍ​ບໍລິສັດ​ການບິນ​ດັ່ງກ່າວ.

    ກ່ອນ​ໜ້າ​ນັ້ນ ເມື່ອ​ຕົ້ນ​ເດືອນ​ເມສາ​ນີ້ ກຸ່ມ​ບໍລິສັດ Kumho Asiana ຊຶ່ງ​ເປັນ​ບໍລິສັດ​ແມ່​ຂອງ Asiana Airlines ໄດ້​ນຳ​ສະເໜີ​ແຜນການ​ກອບ​ກູ້​ດ້ວຍ​ຕົນ​ເອງ ໄປ​ຍັງ​ບັນດາ​ເຈົ້າ​ໜີ້ ເພື່ອ​ແລກ​ເອົາ​ຄວາມ​ຊ່ວຍເຫຼືອ​ດ້ານ​ການ​ເງິນ ທ່າມກາງ​ທີ່​ບັນດາ​ເຈົ້າ​ໜີ້ ສະເໜີ​ໄປ​ຍັງ Kumho Asiana ວ່າ​ຄວນ​ມີ​ການ​ດຳເນີນ​ການ​ຕົວ​ຈິງ​ເພີ່ມ​ເຕີມ ເພື່ອ​ຟື້ນ​ຟູ​ຄວາມ​ເຊື່ອ​ຖື​ຂອງ​ຕະຫຼາດ ທີ່​ມີ​ຕໍ່​ກຸ່ມ​ບໍລິສັດ​ນີ້.

ຂ່າວທີ່ກ່ຽວຂ້ອງ