ໄທ​-​ກຳ​ປູ​ເຈຍ​ ຟື້ນ​ຟູ​ການ​ບໍ​ລິ​ການ​ແລ່ນ​ລົດ​ໄຟ​ຂ້າມ​ຊາຍ​ແດນ

1.009 25 ມ.ສ. 2019 ຂ່າວຕ່າງປະເທດ
ໄທ​-​ກຳ​ປູ​ເຈຍ​ ຟື້ນ​ຟູ​ການ​ບໍ​ລິ​ການ​ແລ່ນ​ລົດ​ໄຟ​ຂ້າມ​ຊາຍ​ແດນ

    ເມື່ອ​ວັນ​ທີ 22 ເມສາ​ທີ່​ຜ່ານ​ມາ ທ່ານ ປຣະ​ຍຸດ ຈັນ​ໂອຊາ ນາຍົກລັດຖະມົນຕີ​ໄທ ແລະ ທ່ານ​ຮຸນ​ແຊນ ນາຍົກລັດຖະມົນຕີ​ກຳປູເຈຍ ໄດ້​ເຂົ້າ​ຮ່ວມ​ພິທີ​ລົງ​ນາມ​ເພື່ອ​ຟື້ນ​ຟູ​ການ​ບໍລິການ​ທາງ​ລົດໄຟ​ຂ້າມ​ຊາຍ​ແດນ​ສອງ​ປະເທດ​ຢ່າງ​ເປັນ​ທາງ​ການ ຢູ່​ຊາຍ​ແດນ​ຂອງ​ສອງ​ຝ່າຍ ຊຶ່ງ​ເປັນ​ການ​ຟື້ນ​ຟູ​ການ​ແລ່ນ​ລົດໄຟ​ຂ້າມ​ຊາຍ​ແດນ​ຄືນໃໝ່​ໃນ​ຮອບ 45 ປີ.

   ພາຍຫຼັງ​ພິທີ​ລົງ​ນາມ​ສິ້ນ​ສຸດ​ລົງ​ແລ້ວ ນາຍົກລັດຖະມົນຕີ​ທັງ​ສອງ ກໍ​ໄດ້​ຮ່ວມ​ກັນ​ຂີ່​ຂະ​ບວນ​ລົດໄຟ​ທີ່​ໃຊ້​ນ້ຳມັນ​ກາ​ຊວນ ລວມ​ມີ 4 ຕູ້ ແລ່ນ​ຈາກ​ແຂວງ​ສະ​ແກ້ວ​ຂອງ​ໄທ ໄປ​ຮອດ​ເມືອງ​ປ່ອຍ​ເປັດ ທີ່​ເປັນ​ຕົວ​ເມືອງ​ຊາຍ​ແດນ​ຂອງ​ກຳປູເຈຍ ເພື່ອ​ສະຫຼອງ​ການ​ເປີດ​ບໍລິການ​ແລ່ນ​ລົດ​ຄືນໃໝ່​ຢ່າງ​ເປັນ​ທາງ​ການ.

   ໃນ​ມື້​ດຽວ​ກັນ ໄທ ແລະ ກຳປູເຈຍ ຍັງ​ໄດ້​ລົງ​ນາມ​ໃນ​ສັນຍາ​ກ່ຽວ​ກັບ​ຂະ​ບວນ​ລົດໄຟ​ຂົນສົ່ງ​ຜູ້ໂດຍສານ ແລະ ຂົນສົ່ງ​ສິນຄ້າ. ຂ່າວ​ແຈ້ງວ່າ ຂະ​ບວນ​ລົດໄຟ​ຂົນສົ່ງ​ຜູ້ໂດຍສານ​ລະຫວ່າງ​ສອງ​ປະເທດ ຈະ​ເປີດ​ບໍລິການ​ຢ່າງ​ເປັນ​ທາງ​ການ​ພາຍ​ໃນ​ປີ​ນີ້.

   ກົມ​ການ​ຄ້າ​ຕ່າງປະເທດ​ຂອງ​ໄທ ໃຫ້​ຮູ້​ວ່າ ມູນ​ຄ່າ​ການ​ຄ້າ​ໃນ​ເຂດ​ຊາຍ​ແດນ ລະຫວ່າງ​ໄທ ກັບ​ກຳປູເຈຍ ບັນລຸ 145 ຕື້​ບາດ (ເງິນ​ໄທ) ພາຍ​ໃນ​ປີ 2018 ໃນ​ນັ້ນ 62% ແມ່ນ​ຜ່ານ​ເຂດ​ຊາຍ​ແດນ ລະຫວ່າງ ອາ​ຣັນ​ຍາ​ປະເທດ (ໄທ) ກັບ ປ່ອຍ​ເປັດ (ກຳປູເຈຍ).

ຂ່າວທີ່ກ່ຽວຂ້ອງ