ຂ່າວຫຼ້າສຸດ

ນັກກີລາເຍົາຊົນລາວ ຮຽນຮູ້ການຫຼິ້ນເທັນນິດຂັ້ນພື້ນຖານ

890 25 ມ.ສ. 2019 ວົງຈອນກີລາ
ນັກກີລາເຍົາຊົນລາວ ຮຽນຮູ້ການຫຼິ້ນເທັນນິດຂັ້ນພື້ນຖານ

    ນັກ­ກີ­ລາ​ເທັນ​ນິດ​ເຍົາ­ວະ​ຊົນ​ລາວ 10 ກວ່າ​ຄົນ ໄດ້​ຮັບ​ການ​ຖ່າຍ​ທອດ​ຄວາມ​ຮູ້​ຄວາມ​ສາ­ມາດ​ທາງ​ດ້ານ​ທັກ​ສະ​ເທັກ​ນິກ ແລະ ຄວາມ​ສາ­ມາດ​ອື່ນໆ ກ່ຽວ​ກັບ​ວິ­ທີ​ການ​ຫຼິ້ນ​ກີ­ລາ​ຂັ້ນ​ພື້ນ­ຖານ ຈາກ​ທ່ານ ສະ​ເຕ​ຟານ ໂຣ​ເບີດ ນັກ­ກີ­ລາ​ເທັນ​ນິດ​ອາ­ຊີບ​ຊາວ​ຝຣັ່ງ ໃນ​ວັນ​ທີ 22 ເມ­ສາ 2019 ຢູ່​ສະ­ໜາມ​ກີ­ລາ​ເທັນ​ນິດ​ແຫ່ງ​ໃໝ່​ຂອງ​ທ່ານ ຕຸ້ຍ ບຸນ​ທະ­ລາ ປະ­ທານ​ບໍ­ລິ­ສັດ ຕຸ້ຍ​ມໍ​ເຕີ ຈຳ­ກັດ ມີ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ເທັນ​ນິດ​ແຫ່ງ​ຊາດ​ລາວ ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ເທັນ​ນິດ​ນະ­ຄອນ­ຫຼວງ​ວຽງ​ຈັນ ຄູ​ເຝິກ ຜູ້​ປົກ­ຄອງ​ນັກ­ກີ­ລາ ແລະ ນັກ­ກີ­ລາ​ເຂົ້າ​ຮ່ວມ.

    ທ່ານ ຕຸ້ຍ ບຸນ​ທະ­ລາ ໃຫ້​ສຳ­ພາດ​ວ່າ: ໃນ​ການ​ເດີນ­ທາງ​ມາ​ລາວ​ຂອງ​ທ່ານ ສະ​ເຕ​ຟານ ຄັ້ງ​ນີ້ ຍ້ອນ​ຄວາມ​ຮັກ­ແພງ​ກັບ​ເພື່ອນ​ຮັກ​ຂອງ​ລາວ ທີ່​ມາ​ເຮັດ​ວຽກ​ຢູ່​ອົງ­ການ​ສະ­ຫະ​ປະ­ຊາ​ຊາດ ປະ­ຈຳ​ລາວ ແນະ­ນຳ​ໃຫ້​ມາ​ຊ່ວຍ ສະ­ນັ້ນ​ທ່ານ ສະ​ເຕ​ຟານ ຈຶ່ງ​ໄດ້​ເດີນ­ທາງ​ຈາກ​ຮົງ​ກົງ ມາ​ທີ່​ນະ­ຄອນ­ຫຼວງ​ວຽງ​ຈັນ ຕາມ​ຈຸດ­ປະ­ສົງ​ທີ່​ຕົກ­ລົງ​ກັນ ຈຶ່ງ​ເປັນ­ຄວາມ​ໂຊກ​ດີ​ທີ່​ສຸດ​ຂອງ​ນັກ­ກີ­ລາ​ເທັນ​ນິດ​ເຍົາ­ວະ​ຊົນ​ລາວ​ທຸກ​ຄົນ ໄດ້​ຮຽນ​ຮູ້​ວິ­ທີ​ການ​ຫຼິ້ນ​ກີ­ລາ​ທີ່​ຕົນ​ເອງ​ມັກ ແລະ ຮັກ​ເປັນ​ຊີ­ວິດ​ຈິດ­ໃຈ ກ່ຽວ​ກັບ​ທັກ​ສະ​ວິ­ທີ​ການ​ເສີບ​ເທັກ​ນິກ ແລະ ຄວາມ​ສາ­ມາດ​ອື່ນໆ ເຊື່ອ​ໝັ້ນ​ວ່າ­ຄວາມ​ຮູ້​ທີ່​ໄດ້​ຮຽນ​ຄັ້ງ​ນີ້ ຈະ​ສາ­ມາດ​ຕໍ່​ຍອດ​ໃຫ້​ນັກ­ກີ­ລາ​ທຸກ​ຄົນ ນຳ­ໄປ​ພັດ­ທະ­ນາ​ຕົນ​ເອງ​ກ້າວ​ສູ່​ຜົນ­ສຳ­ເລັດ​ທີ່​ຕົນ​ເອງ​ຕັ້ງ​ເປົ້າ​ໝາຍ​ໄວ້ ປາ­ກົດ​ຜົນ​ເປັນ​ຈິງ​ໃນ​ອະ­ນາ­ຄົດ.

    ຂະ­ນະ​ທີ່​ທ່ານ ສະ​ເຕ​ຟານ ໂຣ​ເບີດ ກ່າວ​ວ່າ: ຮູ້­ສຶກ​ດີ­ໃຈ​ທີ່​ຕົນ​ເອງ​ໄດ້​ມາ​ປະ­ເທດ​ລາວ ເຖິງ​ຈະ​ບໍ່​ໄດ້​ຢູ່​ໃນ​ແຜນ ແຕ່​ກໍ​ຍ້ອນ​ຄວາມ​ຮັກ­ແພງ​ກັບ​ໝູ່​ເພື່ອນ​ທີ່​ມາ​ເຮັດ​ວຽກ​ຢູ່​ລາວ ແລະ ໄດ້​ມາ​ເຫັນ​ສະ­ໜາມ​ແຫ່ງ​ນີ້ ມີ​ຄວາມ​ເປັນ​ມາດ­ຕະ­ຖານ​ສາ­ກົນ​ສູງ ແລະ ສິ່ງ​ສຳ­ຄັນ ເດັກ­ນ້ອຍ​ລາວ​ຫຼິ້ນ​ກີ­ລາ​ເທັນ​ນິດ​ໄດ້​ດີ​ຫຼາຍ ທຸກ​ຄົນ​ມີ​ຄວາມ​ມຸ່ງ​ໝັ້ນ ແລະ ຮຽນ​ຮູ້​ຢ່າງ​ກະ​ຕື​ລື​ລົ້ນ ຖ້າ​ຫາກ​ເທັນ​ນິດ​ລາວ​ມີ​ອະ​ຄາ​ເດ​ມີ້ ເຝິກ​ສອນ​ກີ­ລາ​ນີ້​ສະ­ເພາະ ໃນ​ໄລ­ຍະ​ຍາວ​ເຊື່ອ​ວ່າ​ໃນ​ອະ­ນາ­ຄົດ​ເຂົາ­ເຈົ້າ​ເຫຼົ່າ​ນີ້ ຈະ​ພັດ­ທະ­ນາ​ສີ­ມື​ໄປ​ໄດ້​ໄກ​ຢ່າງ​ແນ່­ນອນ.

ຂ່າວທີ່ກ່ຽວຂ້ອງ