ເບິ່ງບ້ານເຂົາເອົາບົດຮຽນ 25/04/2019

1.695 25 ມ.ສ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກຳ­ປູ­ເຈຍ​ລົງ­ໂທດ​ຜູ້​ຄ້າ​ໝາກ​ໄຂ່­ຫຼັງ​ມະ­ນຸດ ເລື່ອງ​ສີ​ລັງ­ກາ​ກັບ​ໜີ້​ນັກ​ສຶກ​ສາ​ກ່ຽວ​ກັບ​ເວ­ລາ​ທີ່​ພະ­ນັກ­ງານ​ລັດ​ເສຍ​ໄປ​ກັບ​ໜ້າ​ຈໍ ສຸດ​ທ້າຍ​ແມ່ນ​ບັນ​ການ​ນັບ­ຖື​ງົວ​ຢູ່ ອິນ​ເດຍ.

    ທີ່ ກຳ­ປູ­ເຈຍ: ໃນ​ໄລ­ຍະ​ຫຼັງໆ​ມາ ທາງ​ການ​ກຳ­ປູ­ເຈຍ ໄດ້​ຈັດ­ການ​ກັບ​ຫຼາຍໆ​ບັນ­ຫາ​ທີ່​ກະ­ທົບ​ຕໍ່​ສັງ­ຄົມ ແລະ ເສດ­ຖະ­ກິດ​ຂອງ​ປະ­ເທດ ເຊັ່ນ: ການ​ສັ່ງ​ຫ້າມ​ສົ່ງ​ອອກ​ດິນ­ຊາຍ​ໄປ​ຕ່າງ­ປະ­ເທດ ເພາະ​ມັນ​ຈະ​ກະ​ທັບ​ຕໍ່​ສິ່ງ­ແວ­ດລ້ອມ​ຕາມ​ແຄມ​ຝັ່ງ ໄດ້​ອອກ​ກົດ­ໝາຍ ແລະ ລະ­ບຽບ​ການ​ເອົາ​ໂທດ​ຜູ້​ຂົນ​ຂາຍ​ວ່າ​ຈ້າງ​ແມ່­ຍິງ​ກຳ­ປູ­ເຈຍ​ໃຫ້​ຖື­ພາ ແລະ ເກີດ​ລູກ​ໃຫ້​ຊາວ​ຕ່າງ­ປະ­ເທດ​ຕ້ອງ­ການ​ມີ​ລູກ ສັ່ງ​ຫ້າມ​ສົ່ງ​ອອກ​ນົມ​ສົດ​ຈາກ​ແມ່­ລູກ­ອ່ອນ ກຳ­ປູ­ເຈຍ ໄປ​ສະ­ຫະ­ລັດ​ອາ​ເມ​ຣິ​ກາ ເພາະ​ຖື​ວ່າ​ເປັນ​ການ​ຂູດ​ຮີດ​ແມ່­ຍິງ​ກຳ­ປູ­ເຈຍ ນ້ຳ​ນົມ​ຈາກ​ເຕົ້າ­ນົມ​ແມ່­ຍິງ​ກຳ­ປູ­ເຈຍ ຕ້ອງ​ມີ​ໄວ້​ສຳ­ລັບ​ເດັກ​ກຳ­ປູ­ເຈຍ ທີ່​ຍັງ​ມີ​ບັນ­ຫາ​ສຸ­ຂະ­ພາບ ສ່ວນ​ອີກ​ເລື່ອງ​ໜຶ່ງ​ທີ່​ໜ້າ​ສົນ­ໃຈ ກໍ​ຄື ທາງ​ການ​ກຳ­ປູ­ເຈຍ ໄດ້​ຈັບ​ກຸມ​ຄົນ​ກຳ­ປູ­ເຈຍ 2 ຄົນ ທີ່​ເປັນ​ນາຍ​ໜ້າ​ຂົນ­ຂວາຍ​ຊື້​ອະ​ໄວ​ຍະ​ວະ​ຄົນ ເຊັ່ນ: ໝາກ​ໄຂ່­ຫຼັງ ແລ້ວ​ສົ່ງ​ໄປ​ຂາຍ​ຕໍ່​ຢູ່ ອິນ​ເດຍ ຜູ້​ຖືກ​ຈັບ​ກຸມ​ສອງ​ຄົນ ຊາຍ​ໜຶ່ງ ຍິງ​ໜຶ່ງ​ນັ້ນ ໄດ້​ເຄື່ອນ​ໄຫວ​ພົວ­ພັນ​ກັບ​ການ​ຄ້າ​ໝາກ​ໄຂ່­ຫຼັງ​ຢ່າງ​ໜ້ອຍ 10 ຄະ­ດີ ໃນ​ປີ 2016 (ໜັງ­ສື­ພິມ​ເດິ​ເຈ​ເຊິນ 27 ພຶດ­ສະ­ພາ 2017) ໂດຍ​ໄດ້​ຈ່າຍ​ເງິນ​ຊື້​ໃນ​ລາ­ຄາ 5.800 ໂດ​ລາ​ສະ­ຫະ­ລັດ ຕໍ່​ໝາກ​ໄຂ່­ຫຼັງ 1 ໜ່ວຍ ແລ້ວ​ຂາຍ​ຕໍ່​ເພື່ອ​ປ່ຽນ​ໝາກ​ໄຂ່­ຫຼັງ​ໃຫ້​ຄົນ​ເຈັບ​ໃນ​ລາ­ຄາ​ສູງ​ກວ່າ 40.000 ໂດ​ລາ​ສະ­ຫະ­ລັດ ທ່ານ ແກ້ວ​ເທຍ (Keo Thea) ຫົວ­ໜ້າ​ຫ້ອງ­ການ​ຕ້ານ​ການ​ຄ້າ​ມະ­ນຸດ​ຂອງ​ນະ­ຄອນ­ຫຼວງ​ພະ­ນົມ​ເປັນ ໃຫ້​ຮູ້​ວ່າ: ຄົນ​ເຈັບ​ທີ່​ໄປ​ປ່ຽນ​ໝາກ​ໄຂ່­ຫຼັງ​ຢູ່ ອິນ​ເດຍ​ນັ້ນ ລ້ວນ​ແຕ່​ແມ່ນ​ຄົນ​ກຳ­ປູ­ເຈຍ​ທີ່​ຮັ່ງ­ມີ ໃນ​ປີ 2015 ຄົນ​ກຳ­ປູ­ເຈຍ 3 ຄົນ ທີ່​ພົວ­ພັນ​ກັບ​ຄະ­ດີ​ຄ້າ​ໝາກ​ໄຂ່­ຫຼັງ​ມະ­ນຸດ​ຄັ້ງ​ທຳ​ອິດ​ໃນ​ປະ­ເທດ​ໄດ້​ຖືກ​ສານ​ຕັດ­ສິນ​ຈຳ​ຄຸກ ລະ­ຫວ່າງ 10-15 ປີ ທັງ​ສາມ​ມີ​ຄວາມ​ຜິດ​ຖານ​ໄດ້​ຈອບ​ອອຍ​ຊາວ​ກຳ­ປູ­ເຈຍ​ທີ່​ທຸກ​ຍາກ ໃຫ້​ຂາຍ​ໝາກ​ໄຂ່­ຫຼັງ​ຂອງ​ພວກ​ຕົນ ໃຫ້​ຄົນ​ກຳ­ປູ­ເຈຍ​ດ້ວຍ​ກັນ​ທີ່​ຮັ່ງ­ມີ ເພື່ອ​ປ່ຽນ​ໝາກ​ໄຂ່­ຫຼັງ​ຢູ່​ປະ­ເທດ​ໄທ ແຫຼ່ງ​ຂ່າວ​ຈາກ​ອົງ­ການ​ອະ­ນາ­ໄມ​ໂລກ​ໃຫ້​ຮູ້​ວ່າ: ໃນ​ແຕ່​ລະ​ປີ ການ​ປ່ຽນ​ຖ່າຍ​ໝາກ​ໄຂ່­ຫຼັງ​ມະ­ນຸດ ທີ່​ຜິດ​ກົດ­ໝາຍ​ໃນ​ທົ່ວ​ໂລກ​ນັ້ນ ມີ​ປະ­ມານ 10.000 ກໍ­ລະ­ນີ (The Nation 27 ພຶດ­ສະ­ພາ 2017)

    ທີ່ ປະ­ເທດ​ສີ​ລັງ­ກາ: ໃນ​ຕົ້ນ​ປີ 2016 ລັດ­ຖະ­ບານ​ສີ​ລັງ­ກາ ແລະ ອົງ­ການ​ກຳ­ມະ­ບານ​ຂອງ​ປະ­ເທດ​ນີ້ ໄດ້​ເກັບ​ກຳ​ສະ­ຖິ­ຕິ​ເພື່ອ​ສຶກ​ສາ ກ່ຽວ​ກັບ​ເວ­ລາ​ທີ່່​ພະ­ນັກ­ງານ ລັດ­ຖະ­ກອນ​ເສຍ​ໄປ​ກັບ​ໜ້າ​ຈໍ​ຄອມ​ພິວ​ເຕີ ແລະ ມື​ຖື ວ່າ​ມີ​ຫຼາຍ​ປານ­ໃດ​ກັນ​ແທ້ ບັ້ນ​ເກັບ​ກຳ​ດຳ­ເນີນ​ໄປ​ເປັນ​ເວ­ລາ 3 ເດືອນ ຢູ່ 350 ອົງ​ການ­ຈັດ­ຕັ້ງ ແລະ ໜ່ວຍ​ງານ​ຂອງ​ລັດ​ໃນ​ທົ່ວ​ປະ­ເທດ ແລະ ໄດ້​ພົບ​ຄວາມ​ຈິງ​ທີ່​ປະ­ຕິ­ບັດ​ບໍ່​ໄດ້​ວ່າ ກວ່າ 60% ຂອງ​ພະ­ນັກ­ງານ​ລັດ​ໄດ້​ເສຍ​ເວ­ລາ​ກັບ​ສື່​ສັງ­ຄົມ​ອອນ​ໄລ ຜ່ານ​ໜ້າ​ຈໍ​ມື​ຖື ເນື່ອງ​ຈາກ 2 ຊົ່ວ­ໂມງ​ທີ່​ເສຍ​ໄປ​ນັ້ນ ແມ່ນ​ຊົ່ວ­ໂມງ​ລັດ​ຖະ​ການ ດັ່ງ­ນັ້ນ ຈຶ່ງ​ຖື​ເປັນ​ເລື່ອງ​ໂກງ​ເວ­ລາ​ຂອງ​ລັດ ຫຼື ການ​ປະ­ລະ​ໜ້າ­ທີ່ ບົດ­ຮຽນ​ດີໆແບບ​ນີ້ ຄວນ​ນຳ​ມາ​ລອງ​ໃຊ້​ຢູ່​ປະ­ເທດ​ລາວ​ຂອງ​ພວກ​ເຮົາ​ຄື​ຊິ​ຄັກ ເພື່ອ​ໃຫ້​ຮູ້​ວ່າ ເວ­ລາ​ທາງ​ການ​ທີ່​ເສຍ​ໄປ​ກັບ​ໜ້າ​ຈໍ​ມີ​ຫຼາຍ​ປານ­ໃດ ແລະ ຄົນ​ທີ່​ນັ່ງ​ຢູ່​ກອງ​ປະ­ຊຸມ ແຕ່​ສາຍ­ຕາ​ຢູ່​ໜ້າ​ຈໍ​ນັ້ນ​ມີ​ຈຳ­ນວນ​ເທົ່າ­ໃດ​ກັນ​ແທ້ ?.

    ທີ່ ອິນ​ເດຍ: ຢູ່​ໃນ​ສັງ­ຄົມ​ສາ­ສະ­ໜາ​ຮິນ​ດູ ທົ່ວ​ປະ­ເທດ​ອິນ​ເດຍ​ນັ້ນ ງົວ​ຖື​ວ່າ​ເປັນ​ສັດ​ສັກ­ສິດ ຫ້າມ​ແຕະ­ຕ້ອງ​ທຳ­ລາຍ​ເດັດ­ຂາດ ດັ່ງ­ນັ້ນ ກຸ່ມ​ບໍ­ລິ­ໂພກ​ຊີ້ນ​ງົວ​ຢູ່​ປະ­ເທດ​ນີ້ ຈຶ່ງ​ອາດ​ນຳ­ໄປ​ສູ່​ບັນ­ຫາ​ບໍ່​ສະ­ຫງົບ ດັ່ງ​ທີ່​ເກີດ​ເປັນ​ຂ່າວ​ເລື້ອຍໆ ກ່ຽວ​ກັບ​ການ​ປະ​ທະ​ກັນ​ລະ­ຫວ່າງ​ກຸ່ມ​ຜູ້​ນັບ­ຖື​ງົວ ແລະ ກຸ່ມ​ທີ່​ເຫັນ​ຕົງ​ກັນ​ຂ້າມ ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 9 ກັນ­ຍາ 2017 ໃຫ້​ຮູ້​ວ່າ ສານ​ສູງ​ສຸດ​ອິນ​ເດຍ ໄດ້​ຮຽກ­ຮ້ອງ​ໃຫ້​ລັດ­ຖະ­ບານ​ສູນ​ກາງ ແລະ ລັດ­ຖະ­ບານ​ຂອງ​ບັນ­ດາ​ລັດ ເອົາ​ມາດ​ຕະ­ການ​ຢ່າງ​ທັນ​ການ ປ້ອງ​ກັນ​ບໍ່​ໃຫ້​ມີ​ເຫດ​ຮ້າຍ​ເກີດ​ຂຶ້ນ ຈາກ​ສະ­ພາບ​ເຄັ່ງ​ໃນ​ຄວາມ​ເຊື່ອ​ເລື່ອງ​ງົວ ສ່ວນ​ທ່ານ ເຄ​ເຈ ອານ​ພົນ (KJ Alphons) ລັດ­ຖະ­ມົນ­ຕີ​ກະ­ຊວງ​ທ່ອງ​ທ່ຽວ ອິນ​ເດຍ ເອງ ກໍ​ໄດ້​ແນະ​ນັກ​ທ່ອງ​ທ່ຽວ​ຕ່າງ­ປະ­ເທດ​ໃຫ້ ກິນ​ຊີ້ນ​ງົວ​ອີ່ມ​ທ້ອງ​ໄວ້​ຢູ່​ໃນ​ປະ­ເທດ​ຂອງ​ພວກ​ຕົນ ກ່ອນ​ເດີນ­ທາງ​ໄປ​ອິນ​ເດຍ ທີ່​ແນະ­ນຳ​ແບບ​ນີ້ ກໍ​ແມ່ນ​ເພື່ອ​ຄວາມ​ປອດ​ໄພ​ຂອງ​ນັກ​ທ່ອງ​ທ່ຽວ​ເອງ ຢູ່​ຫຼາຍ​ປະ­ເທດ​ຂອງ​ອິນ​ເດຍ​ນັ້ນ ມີ​ກົດ­ໝາຍ​ທີ່​ເຄັ່ງ​ຄັດ​ໃນ​ການ​ຂ້າ​ງົວ ແລະ ບໍ­ລິ­ໂພກ​ຊີ້ນ​ງົວ.

ຂ່າວທີ່ກ່ຽວຂ້ອງ