ທຸລະກິດໂຮງແຮມແຫ່ງອະນາຄົດຂອງ ອາລີບາບາ

1.198 25 ມ.ສ. 2019 ຫົວຂໍ້ຂ່າວອື່ນໆ

    ໂຮງ­ແຮມ​ແຫ່ງ​ອະ­ນາ­ຄົດ​ຂອງ ອາ­ລີ​ບາ​ບາ Alibaba Future Hotel (Alibaba Flyzoo Hotel) ເປັນ​ທຸ­ລະ​ກິດ​ໂຮງ­ແຮມ​ຂອງ Alibaba ບໍ­ລິ­ສັດ​ຍິ່ງ​ໃຫຍ່​ໃນ​ວົງ​ການ​ອີ​ຄອມ​ເມິ​ຊ ແລະ ຂາຍ­ເຄື່ອງ​ຂອງ​ອອນ​ລາຍ​ຈາກ​ຈີນ ໂດຍ​ໂຮງ­ແຮມ​ດັ່ງ­ກ່າວ​ນີ້ ຕັ້ງ​ຢູ່​ທີ່​ມົນ­ທົນ​ເຈີ້​ຈຽງ ໂດຍ​ທຸ­ລະ​ກິດ​ໂຮງ­ແຮມ​ນີ້​ໄດ້​ຮັບ​ການ​ຂະ­ໜານ​ນາມ​ວ່າ ໂຮງ­ແຮມ​ແຫ່ງ​ອະ­ນາ­ຄົດ.

    ໂດຍ​ເມື່ອ​ມາ​ເຖິງ​ໂຮງ­ແຮມ​ຕັ້ງ­ແຕ່​ເຂົ້າ​ມາ​ທຳ​ອິດ ເຂົ້າ​ສູ່​ການ​ເຊັກ​ອິນ ຈະ​ໄດ້​ຮັບ​ການ​ຕ້ອນ­ຮັບ​ຈາກ​ພະ­ນັກ­ງານ​ຕ້ອນ­ຮັບ​ຂອງ​ໂຮງ­ແຮມ​ທີ່​ບໍ່​ແມ່ນ​ມະ­ນຸດ ແຕ່​ເປັນ​ພະ­ນັກ­ງານ​ຫຸ່ນ​ຍົນ AI ທີ່​ຈະ​ດຳ­ເນີນ​ການ​ຢືນ­ຢັນ​ຜູ້​ເຂົ້າ​ພັກ​ດ້ວຍ​ລະ­ບົບ​ຈົດ​ຈຳ​ໃບ​ໜ້າ ດັ່ງ­ນັ້ນ ທ່ານ​ຈຶ່ງ​ບໍ່​ຕ້ອງ​ຖາມ​ຊື່​ຜູ້​ເຂົ້າ​ພັກ​ກັບ​ຫຸ່ນ​ຍົນ​ເລີຍ ກໍ​ຮັບ​ຮູ້​ເລີຍ​ວ່າ​ໃຜ​ເປັນ​ໃຜ ວ່າ​ເປັນ​ຜູ້​ເຂົ້າ​ພັກ​ຫຼື​ບໍ່ ແລ້ວ​ຫຸ່ນ​ຍົນ​ລໍ­ຖ້າ​ຊ່ວຍ​ດຳ­ເນີນ​ການ​ເຊັກ​ອິນ​ໃຫ້​ທັນ­ທີ.

    ເມື່ອ​ຜູ້​ເຂົ້າ​ພັກ​ໄດ້​ເຂົ້າ​ໄປ​ພາຍ​ໃນ​ຫ້ອງ​ແລ້ວ ກໍ​ຈະ​ພົບ​ກັບ “ລຳ​ໂພງ​ອັດ​ສະ​ລິ​ຍະ” ຮອງ​ຮັບ​ຄຳ​ສັ່ງ​ສຽງ​ຈາກ​ທ່ານ ໂດຍ​ສາ­ມາດ​ສັ່ງ​ເພື່ອ​ເປີດ​ແອຣ໌ ຄຸມ​ອຸນ­ຫະ­ພູມ ເປີດ​ເຄື່ອງ­ໃຊ້​ໄຟ­ຟ້າ ເປິດ-ປິດ​ໄຟ ພາຍ​ໃນ​ຫ້ອງ.

    ລວມ​ເຖິງ​ສາ­ມາດ​ສັ່ງ​ນ້ຳ​ດື່ມ​ໄດ້ ໂດຍ​ຫຸ່ນ​ຍົນ​ຈະ​ບໍ­ລິ­ການ​ນ້ຳ​ໃຫ້​ເຖິງ​ໃນ​ຫ້ອງ​ເລີຍ ລວມ​ເຖິງ​ສາ­ມາດ​ສັ່ງ​ງານ​ດ້ວຍ​ສຽງ ເພື່ອ​ສັ່ງ​ຊື້​ສິ່ງ​ຂອງ​ອອນ​ລາຍ​ໄດ້​ດ້ວຍ ສ່ວນ​ການ​ເຮັດ​ຄວາມ​ສະ­ອາດ​ພາຍ​ໃນ​ຫ້ອງ ກໍ​ໃຊ້​ຫຸ່ນ​ຍົນ​ດ້ວຍ​ເຊັ່ນ​ກັນ ເອີ້ນ​ໄດ້​ວ່າ​ທຸກ​ຢ່າງ​ດຳ­ເນີນ​ການ​ດ້ວຍ​ຫຸ່ນ​ຍົນ ແລະ ຄວບ​ຄຸມ​ດ້ວຍ​ເຕັກ​ໂນ​ໂລ​ຊີ ຊຶ່ງ​ຈະ​ບໍ່​ເຫັນ​ພະ­ນັກ­ງານ​ຕ້ອນ­ຮັບ​ທີ່​ເປັນ​ມະ­ນຸດ​ເລີຍ​ແມ່ນ​ແຕ່​ຄົນ​ດຽວ.

    ທ່ານ Wang Qun, ຜູ້​ບໍ­ລິ­ຫານ​ລະ­ດັບ​ສູງ​ຂອງ Alibaba FlyZoo Hotel ກ່າວ​ວ່າ ໂຮງ­ແຮມ Alibaba Future Hotel (Alibaba Flyzoo Hotel) ແຫ່ງ​ນີ້ ຄວບ​ຄຸມ​ດ້ວຍ​ປັນ­ຍາ​ປະ­ດິດ (AI) ຂອງ Alibaba ຊື່­ວ່າ Tmall Genie ມາ​ໃຊ້​ຈັດ­ການ​ໃນ​ໂຮງ­ແຮມ ຊຶ່ງ​ເຮັດ​ວຽກ​ໄດ້​ມີ​ປະ­ສິດ­ທິ­ພາບ ແລະ ຊ່ວຍ​ຫຼຸດ​ການ​ໃຊ້​ແຮງ​ງານ​ຄົນ​ໄດ້​ຫຼາຍ​ກວ່າ​ເຄິ່ງ​ໜຶ່ງ ແລະ ເໜືອກ​ວ່າ​ໂຮງ­ແຮມ​ອື່ນໆ​ເຖິງ 1,5 ເທົ່າ.

    ໂຮງ­ແຮມ​ແຫ່ງ​ອະ­ນາ­ຄົດ Alibaba Future Hotel (Alibaba Flyzoo Hotel) ມີ​ຫ້ອງ​ພັກ​ໃຫ້​ເລືອກ​ເຖິງ 7 ແບບ ຊຶ່ງ​ແຕ່​ລະ​ຫ້ອງ​ສາ­ມາດ​ສ້າງ​ປະ­ສົບ​ການ​ການ​ໃຊ້​ຊີ­ວິດ​ທີ່​ດີ​ຂຶ້ນ ແລະ ເປັນ​ປະ­ສົບ​ການ​ໃໝ່​ໃນ​ການ​ພັກ​ໂຮງ­ແຮມ​ທີ່​ເຮັດ​ວຽກ​ແບບ​ອັດ­ຕະ­ໂນ­ມັດ​ທັງ​ໝົດ.

    ໂຮງ­ແຮມ Alibaba Future Hotel (Alibaba Flyzoo Hotel) ມີ​ລາ­ຄາ​ທີ່ 1.399 ຢວນ ຊຶ່ງ​ໂຮງ­ແຮມ​ນີ້ ບໍ່​ໄດ້​ຂາຍ​ໃນ​ທາງ​ບໍ­ລິ­ການ​ຄວາມ​ສະ­ດວກ​ສະ­ບາຍ​ຂອງ​ໂຮງ­ແຮມ ແຕ່​ຈະ​ບອກ​ກັບ​ທ່ານ​ວ່າ ເຕັກ​ໂນ​ໂລ​ຊີ​ອ້ອມ​ຕົວ​ທີ່​ສ້າງ​ໂດຍ Alibaba ຈະ​ເຮັດ​ວຽກ​ບໍ­ລິ­ການ​ທີ່​ໃກ້­ຊິດ​ກັບ​ທ່ານ​ຫຼາຍ​ພຽງ​ໃດ.

ຂ່າວທີ່ກ່ຽວຂ້ອງ