ເບິ່ງບ້ານເຂົາເອົາບົດຮຽນ 24/04/2019

1.478 24 ມ.ສ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ສະ­ຫະ­ພາບ​ເອີ​ຣົບ ມີ​ແຜນ​ຍົກ­ເວັ້ນ​ວີ​ຊາ​ສຳ­ລັບ​ຄົນ​ອັງ­ກິດ ເລື່ອງ​ກຳ­ປູ­ເຈຍ ປາບ​ປາມ​ພວກ​ຫຼິ້ນ​ການ​ພະ­ນັນ​ທາງ​ອອນ​ລາຍ ແລະ ເລື່ອງ​ການ​ຫ້າມ​ຕຶກ­ປາ​ໃນ​ນ່ານ​ນ້ຳ­ຂອງ ເຊຍ​ຣາ​ເລ​ອອນ.

    ທີ່ ສະ­ຫະ­ພາບ​ເອີ​ຣົບ (EU-ອີ​ຢູ): ໃນ​ວັນ​ທີ 13 ເດືອນ​ເມ­ສາ​ປີ​ນີ້ ລັດ​ຖະ​ສະ­ພາ​ເອີ​ຣົບ ຫຼື ອີ​ພີ (EP) ໄດ້​ລົງ­ມະ­ຕິ​ຮັບ­ຮອງ​ເອົາ​ຂໍ້​ຕົກ­ລົງ​ອະ­ນຸ­ຍາດ​ໃຫ້​ພົນ­ລະ­ເມືອງ​ອັງ­ກິດ ສາ­ມາດ​ເຂົ້າ​ໄປ​ບັນ­ດາ​ປະ­ເທດ​ສະ­ມາ­ຊິກ ອີ​ຢູ ໄດ້ ໂດຍ​ບໍ່​ຈຳ­ເປັນ​ຂໍ​ວີ​ຊາ ພາຍ­ຫຼັງ​ອັງ­ກິດ​ໄດ້​ຖອນ​ຕົວ​ອອກ​ຈາກ ອີ​ຢູ ຢ່າງ​ສົມ­ບູນ ເອ­ກະ­ສານ​ຕົກ­ລົງ​ດັ່ງ­ກ່າວ ແມ່ນ​ຄະ­ນະ​ກຳ­ມາ​ທິ​ການ​ວ່າ​ດ້ວຍ​ເສລີ­ພາບ​ພົນ​ລະ​ເຮືອນ​ຂອງ​ລັດ​ຖະ​ສະ­ພາ​ເອີ​ຣົບ​ຮ່າງ​ຂຶ້ນ ຜົນ​ການ​ລົງ​ຄະ­ແນນ​ສຽງ​ຮັບ​ເອົາ​ເອ­ກະ­ສານ​ດັ່ງ­ກ່າວ ມີ​ດັ່ງ­ນີ້ 38 ສຽງ ເຫັນ​ດີ 8 ສຽງ​ຕ້ານ ແລະ ສະ­ຫງວນ​ສິດ 3 ສຽງ (ບໍ່​ອອກ­ສຽງ) ຂໍ້​ຕົກ­ລົງ​ດັ່ງ­ກ່າວ ຈະ​ມີ​ຜົນ​ສັກ­ສິດ​ໃນ​ທາງ​ປະ­ຕິ­ບັດ​ໄດ້ ກໍ​ຕໍ່​ເມື່ອ​ຝ່າຍ​ອັງ­ກິດ​ຕົກ­ລົງ​ຍົກ­ເວັ້ນ​ວີ​ຊາ​ໃຫ້​ພົນ­ລະ­ເມືອງ ຂອງ​ບັນ­ດາ​ປະ­ເທດ​ສະ­ມາ­ຊິກ ອີ​ຢູ ເຂົ້າ​ໄປ​ອັງ­ກິດ​ເຊັ່ນ​ກັນ ຂໍ້​ຕົກ­ລົງ​ອະ­ນຸ­ຍາດ​ໃຫ້​ຄົນ​ອັງ­ກິດ​ຢູ່ ແລະ ເຄື່ອນ​ໄຫວ​ບົນ​ດິນ­ແດນ​ຂອງ​ອີ​ຢູ ໄດ້ 90 ວັນ ໂດຍ​ບໍ່​ມີ​ວີ​ຊາ ແຕ່​ບໍ່​ອະ­ນຸ­ຍາດ​ໃຫ້​ອອກ­ແຮງ​ງານ.

    ທີ່ ກຳ­ປູ­ເຈຍ: ໜັງ­ສື­ພິມ​ວຽງ​ຈັນ​ທາມ ປະ­ຈຳ​ວັນ​ທີ 4 ເດືອນ​ເມ­ສາ​ນີ້ ໃຫ້​ຮູ້​ວ່າ ທາງ​ການ​ກຳ­ປູ­ເຈຍ ໄດ້​ຮັບ​ຜົນ­ສຳ­ເລັດ​ຄັ້ງ​ສຳ­ຄັນ ໃນ​ການ​ປາບ​ປາມ​ຄົນ​ຕ່າງ­ປະ­ເທດ ທີ່​ລັກ­ລອບ​ເຄື່ອນ​ໄຫວ​ສ້າງ​ເຄືອ​ຄ່າຍ​ການ​ພະ­ນັນ​ທາງ​ອອນ​ລາຍ ໂດຍ​ສາ­ມາດ​ເນ­ລະ­ເທດ​ພວກ​ມີ​ຄວາມ​ຜິດ​ທັງ​ໝົດ​ໄດ້​ຈຳ­ນວນ 1.724  ຄົນ ນັບ​ແຕ່​ຕົ້ນ​ປີ 2018 ເຖິງ​ປັດ­ຈຸ­ບັນ ໃນ​ນັ້ນ ເປັນ​ຄົນ​ຈີນ 927 ຄົນ ຂ່າວ​ໃຫ້​ຮູ້​ຕື່ມ ໃນ​ວັນ​ທີ 28 ເດືອນ​ມີ­ນາ​ປີ​ນີ້ ກອງ​ກຳ­ລັງ​ຕຳ­ຫຼວດ​ແຂວງ​ສຽມ​ຣຽບ ໄດ້​ຮ່ວມ​ກັບ​ສານ​ໄອ​ຍະ​ການ​ແຂວງ ບຸກ​ເລີກ​ຮື້​ເຄືອ​ຄ່າຍ​ການ​ພະ­ນັນ​ທາງ​ອອນ​ລາຍ 2 ແຫ່ງ ສາ­ມາດ​ຈັບ​ກຸມ​ຄົນ​ຈີນ​ທີ່​ກ່ຽວ­ຂ້ອງ​ກັບ​ຄະ­ດີ​ໄດ້ 165 ຄົນ ພ້ອມ​ທັງ​ຢຶດ​ຄອມ​ພີວ​ເຕີ​ຈຳ­ນວນ 150 ເຄື່ອງ ຜູ້​ກະ­ທຳ​ຄວາມ​ຜິດ​ທັງ​ໝົດ​ໄດ້​ຖືກ​ເນ­ລະ­ເທດ.

    ທີ່ ເຊຍ​ຣາ​ເລ​ອອນ: ມີ​ຂ່າວ​ອອກ​ມາ​ໃນ​ຕົ້ນ​ເດືອນ​ເມ­ສາ​ນີ້​ວ່າ: ປະ­ເທດ​ເຊຍ​ຣາ​ເລ​ອອນ ທີ່ ອາ​ຟຣິກ​ກາ ໄດ້​ອອກ​ມາດ​ຕະ­ການ​ຫ້າມ​ຫາ​ປາ​ໃນ​ນ່ານ​ນ້ຳ­ຂອງ​ຕົນ ນັບ​ແຕ່​ວັນ​ທີ 1-30 ເມ­ສາ​ປີ​ນີ້ ເພື່ອ​ອະ­ນຸ­ລັກ​ພັນ​ປາ​ພາຍ​ໃນ​ປະ­ເທດ​ໄວ້​ໃຫ້​ຍືນ​ຍົງ ຂ່າວ​ບອກ​ວ່າ ໃນ​ໄລ­ຍະ​ຫຼັງໆ​ມາ ໄດ້​ເກີດ​ມີ​ປາ­ກົດ­ການ​ລັກ­ລອບ​ຈັບ​ປາ​ໃນ​ນ່ານ​ນ້ຳ­ຂອງ​ປະ­ເທດ ເຖິງ​ຂັ້ນ​ເຮັດ​ໃຫ້​ພັນ​ປາ​ບາງ​ຊະ­ນິດ​ບົກ​ແຫ້ງ​ລົງ ທາງ​ການ​ຂອງ​ປະ­ເທດ​ນີ້ ໄດ້​ມອບ​ຄວາມ​ຮັບ­ຜິດ­ຊອບ​ໃຫ້​ບໍ­ລິ­ສັດ​ອຸດ­ສາ­ຫະ­ກຳ​ການ​ປະ­ມົງ ເປັນ​ເຈົ້າ​ການ­ຈັດ­ຕັ້ງ​ນຳ­ພາ​ການ​ປະ­ຕິ­ບັດ ມາດ​ຕະ­ການ​ດັ່ງ­ກ່າວ ຢູ່ ອາ​ຟຣິ​ກາ ຕາ­ເວັນ­ຕົກ ປະ­ເທດ​ທີ່​ອຸ­ດົມ­ສົມ­ບູນ​ໄປ​ດ້ວຍ​ປາ ແລະ ສັດ​ນ້ຳ​ນາໆພັນ​ນັ້ນ ໄດ້­ແກ່​ປະ­ເທດ​ເຊຍ​ຣາ​ເລ​ອອນ ໂມ​ຣີ​ຕາ​ນີ ເຊ​ເນ​ການ ກຳ​ບີ ກິ​ເນ​ບີ​ຊາວ ແລະ ກີ​ເນ ແຕ່​ໃນ​ໄລ­ຍະ​ຫຼັງໆ​ມາ ຂະ​ບວນ​ການ​ຕຶກ­ປາ​ແບບ​ຜິດ​ກົດ­ໝາຍ ກໍ​ຄື ການ​ດຳ­ເນີນ​ການ​ປະ­ມົງ​ແບບ​ບໍ່​ໂປ່ງ​ໃສ ໄດ້​ສ້າງ​ຄວາມ​ເສຍ​ຫາຍ​ທາງ​ເສດ­ຖະ­ກິດ ໃຫ້​ແກ່​ປະ­ເທດ​ເຫຼົ່າ​ນີ້ ຄິດ​ເປັນ​ມູນ​ຄ່າ ປີ​ລະ 2,3 ຕື້​ໂດ​ລາ​ສະ­ຫະ­ລັດ (ລະ­ຫວ່າງ​ປີ 2010-2016).

ຂ່າວທີ່ກ່ຽວຂ້ອງ