ວັນພັກຊົດເຊີຍ ຊຸດໂຊມ ຊໍ້າຊາກ

1.344 24 ມ.ສ. 2019 ຫົວຂໍ້ຂ່າວອື່ນໆ

    ເນື່ອງ​ຈາກ​ວັນ​ສົ່ງ​ທ້າຍ​ປີ​ເກົ່າ (ສັງ­ຂານ​ລ່ວງ) ປີ​ນີ້​ຖືກ​ກົງ​ກັບ​ວັນ​ອາ­ທິດ​ທີ 14 ເມ­ສາ 2019 ເຊິ່ງ​ເປັນ​ວັນ​ພັກ​ທາງ​ລັດ​ຖະ​ການ ທາງ​ການ​ເພິ່ນ​ກໍ​ເລີຍ​ອອກ​ແຈ້ງ​ການ​ໃຫ້​ວັນ​ພຸດ​ທີ 17 ເມ­ສາ 2019 ເປັນ​ວັນ​ພັກ​ຊົດ​ເຊີຍ. ດັ່ງ­ນັ້ນ ພົບ​ກັນ​ໃນ​ສະ­ບັບ​ນີ້ ຄໍ​ລຳ​ສັງ­ຄົມ​ກົດ­ໝາຍ​ຂອງ​ໜັງ­ສື­ພິມ​ວຽງ​ຈັນ​ໃໝ່​ພວກ​ເຮົາ ຈະ​ນຳ​ສະ­ເໜີ​ກ່ຽວ​ກັບ​ວັນ​ເຂົ້າ​ການ ວັນ​ພັກ​ຊົດ​ເຊີຍ ແລະ ວັນ​ພັກ​ທາງ​ລັດ​ຖະ​ການ ວ່າ​ໃນ​ແງ່​ຕົວ​ບົດ​ກົດ­ໝາຍ​ແລ້ວ ເພິ່ນ​ກຳ­ນົດ​ໄວ້​ຄື​ແນວ­ໃດ ?.

    ກົດ­ໝາຍ​ວ່າ​ດ້ວຍ​ແຮງ​ງານ ແຫ່ງ ສປປ ລາວ ໝວດ​ທີ III ວ່າ​ດ້ວຍ​ລະ­ບຽບ​ການ​ອອກ­ແຮງ​ງານ ມາດ­ຕາ 19 ໄດ້​ລະ­ບຸ​ໄວ້​ວ່າ: ວັນ​ພັກ​ປະ­ຈຳ​ອາ­ທິດ ແລະ ວັນ​ພັກ​ທາງ​ລັດ­ຖະ­ບານ ເຊິ່ງ​ຜູ້​ອອກ­ແຮງ​ງານ​ມີ​ສິດ​ໄດ້​ຮັບ​ການ​ພັກ​ວຽກ​ຢ່າງ​ໜ້ອຍ 1 ວັນ​ຕໍ່​ອາ­ທິດ ຈະ​ເປັນ​ວັນ​ອາ­ທິດ ຫຼື ວັນ​ໃດ​ໜຶ່ງ ກໍ​ໄດ້​ຕາມ​ການ​ຕົກ­ລົງ​ລະ­ຫວ່າງ​ຜູ້​ອອກ­ແຮງ​ງານ​ກັບ​ຜູ້​ໃຊ້​ແຮງ​ງານ ແລະ ວັນ​ພັກ​ທາງ​ລັດ​ຖະ​ການ ແມ່ນ​ລັດ­ຖະ­ບານ​ເປັນ​ຜູ້​ກຳ­ນົດ ດັ່ງ­ນັ້ນ ກໍ­ລະ­ນີ​ທີ່​ກ່າວ​ຕັ້ງ​ເປັນ​ປະ­ເດັນ​ໄຂ​ຫົວ​ເລື່ອງ​ຂຶ້ນ​ມາ​ນັ້ນ ໄດ້​ເກີດ​ຂຶ້ນ​ໃນ​ໄລ­ຍະ​ສະ­ເຫຼີມ­ສະ­ຫຼອງ​ວັນ​ສົ່ງ​ທ້າຍ​ປີ​ເກົ່າ​ຕ້ອນ­ຮັບ​ປີ​ໃໝ່​ລາວ​ປີ​ນີ້ ທີ່​ຜູ້​ຂຽນ​ໄດ້ “ເກິ່ນ” ຂຶ້ນ​ມາ​ແມ່ນ​ຢາກ​ເວົ້າ​ເຖິງ​ວັນ​ພັກ​ຊົດ​ເຊີຍ​ວັນ​ສົ່ງ​ທ້າຍ​ປີ​ເກົ່າ (ສັງ­ຂານ​ລ່ວງ) ປີ​ນີ້​ແມ່ນ​ກົງ​ກັບ​ວັນ​ອາ­ທິດ ເຊິ່ງ​ເປັນ​ວັນ​ພັກ​ທາງ​ລັດ​ຖະ​ການ​ຢູ່​ແລ້ວ ດ້ວຍ​ເຫດ​ນີ້​ຈຶ່ງ​ຕ້ອງ​ໄດ້​ອອກ​ແຈ້ງ​ການ​ໃຫ້​ພັກ​ຊົດ​ເຊີຍ​ໃສ່​ວັນ​ພຸດ​ທີ 17 ເມ­ສາ 2019 ຕື່ມ. ໝາຍ​ຄວາມ​ວ່າ​ພວກ​ເຮົາ​ເຈົ້າ​ຂ້ອຍ ໂດຍ​ສະ­ເພາະ​ພະ­ນັກ­ງານ​ທີ່​ເປັນ​ມະ­ນຸດ​ເງິນ­ເດືອນ​ທັງ­ຫຼາຍ​ຈະ​ມີ​ມື້​ພັກ​ຍາວ 3 ມື້​ລຽນ​ວັນ​ຈັນ (ວັນ​ເນົາ) ທີ 15 ເມ­ສາ 2019 ວັນ​ອັງ­ຄານ (ວັນ​ສັງ­ຂານ​ຂຶ້ນ) ທີ 16 ເມ­ສາ 2019 ວັນ​ພຸດ (ວັນ​ພັກ​ຊົດ​ເຊີຍ) ທີ 17 ເມ­ສາ 2019 ແລະ ວັນ​ພະ­ຫັດ​ທີ 18 ເມ­ສາ 2019 ຈຶ່ງ​ໄດ້​ກັບ​ຄືນ​ມາ​ເຂົ້າ​ການ​ເຂົ້າ​ງານ​ເປັນ​ປົກ­ກະ­ຕິ.

    ຫວ່າງ​ມໍ່ໆ​ທີ່​ຜ່ານ​ມາ​ນີ້ ຫ້ອງ​ວ່າ­ການ​ລັດ­ຖະ­ບານ​ໄດ້​ອອກ​ແຈ້ງ​ການ​ສະ­ບັບ​ໜຶ່ງ ເຖິງ​ບັນ­ດາ​ທ່ານ​ລັດ­ຖະ­ມົນ­ຕີ​ວ່າ­ການ​ກະ­ຊວງ-ຫົວ­ໜ້າ​ອົງ­ການ​ທຽບ​ເທົ່າ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ເຈົ້າ­ແຂວງ ແລະ ບັນ­ດາ​ທ່ານ​ຫົວ­ໜ້າ​ອົງ​ການ­ຈັດ­ຕັ້ງ​ມະ­ຫາ­ຊົນ ອ້ອມ​ຂ້າງ​ສູນ​ກາງ​ວ່າ​ດ້ວຍ​ການ​ພັກ​ຊົດ​ເຊີຍ ສະ­ເຫຼີມ­ສະ­ຫຼອງ​ບຸນ​ກຸດ​ສົງ­ການ (ບຸນ​ຫົດ​ນ້ຳ ຫຼື ບຸນ­ປີ­ໃໝ່​ລາວ) ໂດຍ​ມີ​ເນື້ອ​ໃນ​ໃຫ້​ອີງ​ຕາມ​ເນື້ອ​ໃນ​ຂອງ​ກົດ­ໝາຍ​ວ່າ​ດ້ວຍ​ແຮງ​ງານ ແຫ່ງ ສປປ ລາວ ກ່ຽວ​ກັບ​ວັນ​ພັກ​ທາງ​ລັດ​ຖະ​ການ ຫ້ອງ​ວ່າ­ການ​ລັດ­ຖະ­ບານ ຈຶ່ງ​ແຈ້ງ​ມາ​ຍັງ​ບັນ­ດາ​ທ່ານ​ລັດ­ຖະ­ມົນ­ຕີ​ວ່າ­ການ-ຫົວ­ໜ້າ​ອົງ­ການ​ທຽບ​ເທົ່າ ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ບັນ­ດາ​ທ່ານ​ເຈົ້າ­ແຂວງ ບັນ­ດາ​ຫົວ­ໜ້າ​ອົງ​ການ­ຈັດ­ຕັ້ງ​ມະ­ຫາ­ຊົນ ພະ­ນັກ­ງານ-ລັດ­ຖະ­ກອນ ທະ­ຫານ ຕຳ­ຫລວດ ແລະ ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ປະ­ເທດ​ຊາບ ແລະ ປະ­ຕິ­ບັດ​ຕາມ.

    ທຳ​ອິດ​ຜູ້​ຂຽນ​ກໍ​ຫວັງ​ເປັນ​ຢ່າງ​ຍິ່ງ​ວ່າ​ທຸກ​ຄົນ ເວົ້າ​ລວມ, ເວົ້າ​ສະ­ເພາະ ພະ­ນັກ­ງານ​ຂອງ​ລັດ (ລັດ­ຖະ­ກອນ) ທຸກ​ຄົນ ທຸກ​ຂົງ­ເຂດ​ວຽກ​ງານ ແລະ ທຸກ​ທ້ອງ­ຖິ່ນ​ໃນ​ທົ່ວ​ປະ­ເທດ ຈະ​ພ້ອມ​ຈິດ​ພ້ອມ​ໃຈ​ກັນ​ປະ­ຕິ­ບັດ​ຢ່າງ​ເຂັ້ມ​ງວດ ຕາມ​ແຈ້ງ​ການ​ດັ່ງ­ກ່າວ​ບໍ່​ພາ­ກັນ​ພັກ​ການ​ໄປ​ສະ­ເຫຼີມ­ສະ­ຫຼອງ ຈົນ​ລືມ​ກັບ​ຄືນ​ມາ​ເຂົ້າ​ການ​ອີກ​ຄັ້ງ​ໃໝ່ ໃນ​ວັນ​ພະ­ຫັດ​ທີ 18 ເມ­ສາ 2019. ແຕ່​ໃນ​ຄວາມ​ເປັນ​ຈິງ​ທີ່​ເຫັນ​ຫຼັງ​ຈາກ​ແລ້ວ​ບຸນ­ປີ­ໃໝ່​ລາວ​ນັ້ນ ກໍ​ຄື​ບາງ​ບ່ອນ ບາງ​ຈຳ­ນວນ ຍັງ​ຂາດ​ສະ­ຕິ​ບໍ່​ປະ­ຕິ­ບັດ​ຕາມ​ແຈ້ງ​ການ​ຍັງ​ສວຍ­ໂອ­ກາດ ຂາດ​ການ​ພັກ​ຍາວ​ຈົນ​ຮອດ​ວັນ​ຈັນ​ທີ 22 ເມ­ສາ 2019 ຈຶ່ງ​ມາ​ປະ­ຈຳ­ການ​ປົກ­ກະ­ຕິ ແລະ ນີ້​ຈຶ່ງ​ເປັນ​ທີ່​ມາ​ຂອງ​ວັນ​ພັກ​ຊົດ​ເຊີຍ ຊຸດ­ໂຊມ ຊ້ຳ​ຊາກ !.

ຂ່າວທີ່ກ່ຽວຂ້ອງ