ຂ່າວຫຼ້າສຸດ

ຮພສ ໄຂຄັດເລືອກນັກກີລາກຽມເຂົ້າຮຽນ ສົກປີ 2019-2020

924 24 ມ.ສ. 2019 ວົງຈອນກີລາ
ຮພສ ໄຂຄັດເລືອກນັກກີລາກຽມເຂົ້າຮຽນ ສົກປີ 2019-2020

    ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ (ຮພກ) ກົມ​ກີ­ລາ​ລະ­ດັບ​ສູງ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ໄຂ​ການ​ຄັດ​ເລືອກ​ນັກ­ກີ­ລາ​ດີ­ເດັ່ນ​ທົ່ວ​ປະ­ເທດ ໂດຍ​ເລັ່ງ​ໃສ່ 4 ແຂວງ​ພາກ​ເໜືອ ແລະ 4 ແຂວງ​ພາກ​ໃຕ້ 13 ປະ­ເພດ​ກີ­ລາ ເພື່ອ​ເລືອກ­ເຟັ້ນ​ກຽມ​ບັນ­ຈຸ​ໂຄ​ຕ້າ​ທຶນ​ຮຽນ​ໂດຍ​ບໍ່​ໄດ້​ເສຍ​ຄ່າ​ປະ­ຈຳ​ສົກ­ຮຽນ 2019-2020 ເພື່ອ​ພັດ­ທະ­ນາ​ນັກ­ກີ­ລາ​ໃຫ້​ເປັນ​ທີມ​ຊາດ ສ້າງ​ຜົນ­ງານ​ໃຫ້​ປະ­ເທດ​ຊາດ​ໃນ​ງານ​ມະ​ຫະ​ກຳ​ກີ­ລາ​ລະ­ດັບ​ອະ­ນຸ​ພາກ​ພື້ນ ພາກ​ພື້ນ ແລະ ສາ­ກົນ.

    ວັນ​ທີ 22 ເມ­ສາ 2019 ພະ­ນັກ­ງານ​ວິ­ຊາ​ການ ແລະ ຄູ-ອາ­ຈານ ທີ່​ຮັບ­ຜິດ­ຊອບ​ວຽກ​ງານ​ກີ­ລາ ຮພກ 20 ຄົນ ແບ່ງ​ເປັນ 2 ຂະ​ບວນ ອອກ​ເດີນ­ທາງ​ໄປ​ຍັງ​ພາກ​ເໜືອ ນຳ​ໂດຍ​ທ່ານ ສູນ​ທອນ ຄຳ​ສານ ຫົວ­ໜ້າ​ໜ່ວຍ​ງານ​ຫ້ອງ­ການ​ວິ­ຊາ​ການ ຮພກ ຈຸດ­ໝາຍ​ປາຍ­ທາງ​ແມ່ນ​ແຂວງ​ຊຽງ​ຂວາງ ໄຊ​ຍະ​ບູ​ລີ ອຸ­ດົມ​ໄຊ ແລະ ຫຼວງ​ນ້ຳ​ທາ ສ່ວນ​ພາກ​ໃຕ້ ນຳ​ໂດຍ​ທ່ານ ແກ້ວ​ມະ­ນີ ດາ​ສະ​ວົງ ຫົວ­ໜ້າ​ໜ່ວຍ​ງານ​ຫ້ອງ­ການ​ບໍ­ລິ­ຫານ ຮພກ ຈຸດ­ໝາຍ​ປາຍ­ທາງ​ແມ່ນ​ແຂວງ​ສະ­ຫວັນ​ນະ​ເຂດ ສາ­ລະ​ວັນ ຈຳ­ປາ​ສັກ ແລະ ອັດ​ຕະ​ປື ເພື່ອ​ຄັດ​ເລືອກ​ນັກ­ກີ­ລາ​ພອນ​ສະ­ຫວັນ​ດີ­ເດັ່ນ.

    ທ່ານ ສູນ​ທອນ ຄຳ​ສານ ກ່າວ​ວ່າ: ເພື່ອ​ປະ­ຕິ­ບັດ​ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ກໍ​ຄື ກົມ​ກີ­ລາ​ລະ­ດັບ​ສູງ ແລະ ຮພກ ເພື່ອ​ຄັດ​ເລືອກ​ໃຫ້​ໄດ້​ນັກ­ກີ­ລາ​ພອນ​ສະ­ຫວັນ​ດີ­ເດັ່ນ ບັນ­ຈຸ​ເຂົ້າ​ຮຽນ ຮພກ ສົກ­ຮຽນ 2019-2020 ຜູ້­ອຳ­ນວຍ­ການ ຮພກ ຈຶ່ງ​ໄດ້​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ລົງ​ຕິດ­ຕາມ​ຄັດ​ເລືອກ​ນັກ­ກີ­ລາ​ອອກ​ເປັນ 2 ຂະ​ບວນ ໃນ​ນີ້​ເດີນ­ທາງ​ໄປ​ພາກ​ເໜືອ 9 ທ່ານ ແລະ ພາກ​ໃຕ້ 11 ທ່ານ ພ້ອມ​ນີ້​ຍັງ​ໄດ້​ເຊີນ​ເອົາ​ບຸກ​ຄະ­ລາ​ກອນ​ຈາກ​ກົມ​ກິ­ລາ​ລະ­ດັບ​ສູງ 2 ທ່ານ ແລະ ກົມ​ພະ­ລະ ແລະ ສິ­ລະ​ປະ​ສຶກ​ສາ 2 ທ່ານ ເຂົ້າ​ຮ່ວມ ເພື່ອ​ປະ­ຕິ­ບັດ​ການ​ຊ່ວຍ​ກັນ​ຊອກ​ຫາ​ນັກ­ກີ­ລາ​ຜູ້​ມີ​ສະ­ຫວັນ​ດີ­ເດັ່ນ​ຢ່າງ​ແທ້​ຈິງ ເຂົ້າ​ຮຽນ​ຕາມ​ໂຮງ­ຮຽນ​ຕາມ​ຈຸດ­ປະ­ສົງ ແລະ ເປົ້າ​ໝາຍ​ທີ່​ວາງ​ໄວ້ ການ​ຄັດ​ເລືອກ​ຄັ້ງ​ນີ້​ໄດ້​ເນັ້ນ​ກວດ​ສອບ​ດ້ານ​ສະ­ມັດ​ທະ​ພາບ​ຮ່າງ­ກາຍ​ຂອງ​ນັກ­ກີ­ລາ ເປັນ­ຕົ້ນ​ກຳ­ນົດ​ລວງ​ສູງ ນ້ຳ­ໜັກ ເຕັກ­ນິກ​ຄວາມ​ສາ ມາດ​ສະ­ເພາະ​ຕົວ ຄວາມ​ແຂງ​ແກ່ນ ແລະ ອື່ນໆ.

ຂ່າວທີ່ກ່ຽວຂ້ອງ