ຂ່າວຫຼ້າສຸດ

ຊ່ຽວຊານສະໂມສອນເຊວຊີ ຊ່ວຍພັດທະນາບານເຕະຄົນພິການຕາລາວ

695 24 ມ.ສ. 2019 ວົງຈອນກີລາ
ຊ່ຽວຊານສະໂມສອນເຊວຊີ ຊ່ວຍພັດທະນາບານເຕະຄົນພິການຕາລາວ

    ຊ່ຽວ­ຊານ​ຈາກ​ສະ­ໂມ­ສອນ​ເຊວ​ຊີ ທີມ​ດັງ​ໃນ​ການ​ແຂ່ງ­ຂັນ​ເຕະ­ບານ ພຣີ​ເມຍ​ລີກ ອັງ­ກິດ ປະ­ເທດ​ອັງ­ກິດ ເດີນ­ທາງ​ມາ​ຢ້ຽມ­ຢາມ ແລະ ພັດ­ທະ­ນາ​ທີມ​ບານ­ເຕະ​ຄົນ​ພິ­ການ​ຕາ​ລາວ ວັນ​ທີ 23 ເມ­ສາ 2019 ຢູ່​ເດີ່ນ​ກີ­ລາ​ຫຍ້າ​ທຽມ​ໄອ​ເຕັກ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ລັດ​ທະ​ໄຊ ອິນ​ທະ​ວົງ ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ ຫົວ­ໜ້າ​ພະ​ແນກ​ບໍ­ລິ­ຫານ ກົມ​ກີ­ລາ​ມວນ​ຊົນ ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ໃຫ້­ການ​ຕ້ອນ­ຮັບ.

    ທ່ານ ລັດ​ທະ​ໄຊ​ອິນ​ທະ​ວົງ ກ່າວ​ວ່າ: ທ່ານ ANDY ROSE ຜູ້​ຊ່ຽວ­ຊານ ແລະ ທ່ານ​ນາງ ELLIE CRABB ຜູ້​ປະ­ສານ​ງານ​ຈາກ​ສະ­ໂມ­ສອນ​ເຊວ​ຊີ ມາ​ເກັບ​ກຳ​ຂໍ້​ມູນ​ພື້ນ­ຖານ ແລະ ສອບ​ຖາມ​ກ່ຽວ​ກັບ​ທີມ​ບານ­ເຕະ​ຄົນ​ພິ­ການ​ຕາ​ທີມ​ຊາດ​ລາວ ເພື່ອ​ນຳ­ໄປ​ຄົ້ນ­ຄວ້າ ແລະ ນຳ​ສະ­ເໝີ​ສະ­ໂມ­ສອນ ເຊວ​ຊີ ກ່ຽວ​ກັບ​ຄວາມ​ເປັນ​ໄປ​ໄດ້​ໃນ​ການ​ໃຫ້­ການ​ຊ່ວຍ­ເຫຼືອ ຫຼື ມີ​ສ່ວນ​ຮ່ວມ​ກັບ​ການ​ພັດ­ທະ­ນາ​ທີມ​ບານເຕະ​ຄົນ​ພິ­ການ​ຕາ​ລາວ ນອກ​ນີ້ ທັງ 2 ທ່ານ ຍັງ​ຈະ​ໄດ້​ໄປ​ພົບ​ປະ​ຄະ­ນະ​ນຳ​ຄະ­ນະ​ປະ­ທານ​ຄະ­ນະ​ກຳມະ​ການ​ພາ​ຣາ​ແລມ​ປິກ​ແຫ່ງ​ຊາດ​ລາວ.

    ທີມ​ບານ­ເຕະ​ຄົນ​ພິ­ການ​ຕາ ໄດ້​ເຝິກ­ຊ້ອມ​ກັນ 2-3 ມື້​ຕໍ່​ອາ­ທິດ ເພື່ອ​ກະ­ກຽມ​ຄວາມ​ພ້ອມ​ໃນ​ການ​ເຂົ້າ​ຮ່ວມ​ແຂ່ງ­ຂັນ​ຕ່າງໆ ໂດຍ​ມີ​ຄູ​ເຝິກ​ຊາວ​ຍີ່­ປຸ່ນ ແລະ ຄູ​ເຝິກ​ລາວ ນຳ­ພາ​ນັກ­ກີ­ລາ​ເຝິກ­ຊ້ອມ​ຢ່າງ​ຕໍ່​ເນື່ອງ ແລະ ເຫັນ​ວ່າ​ນັກ­ກີ­ລາ​ທັງ​ໝົດ​ມີ​ຄວາມ​ຕັ້ງ­ໃຈ ແລະ ທຸ້ມ­ເທກັບ​ການ​ເຝິກ­ຊ້ອມ​ເປັນ​ຢ່າງ​ດີ.

ຂ່າວທີ່ກ່ຽວຂ້ອງ