ຂ່າວຫຼ້າສຸດ

ນັກຊົກລາວຕົກຮອບ 8 ຄົນ ມວຍກົນຊີງແຊັມອາຊີ 2019

733 24 ມ.ສ. 2019 ວົງຈອນກີລາ
ນັກຊົກລາວຕົກຮອບ 8 ຄົນ ມວຍກົນຊີງແຊັມອາຊີ 2019

    ການ​ແຂ່ງ­ຂັນ​ມວຍ​ສາ­ກົນ​ຊີງ​ແຊັມ​ອາ­ຊີ 2019 ຮອບ 8 ຄົນ​ສຸດ​ທ້າຍ ຫຼື ຮອບ​ຊີງ​ຫຼຽນ​ທອງ ໄດ້​ຈັດ​ຂຶ້ນ​ວັນ​ທີ 22 ເມ­ສາ 2019 ຢູ່​ສະ­ໜາມ​ກີ­ລາ​ຣາ​ຊະ​ມັງ​ກີ­ລາ​ສະ­ຖານ ນະ­ຄອນ­ຫຼວງ​ບາງ­ກອກ ປະ­ເທດ​ໄທ ໃນ​ນັ້ນ​ມີ​ນັກ­ຊົກ­ມວຍ​ສາ­ກົນ​ທີມ​ຊາດ​ລາວ​ຂຶ້ນ​ເວ­ທີ 2 ຄົນ​ຄື​ທ້າວ ຄຳ​ພູ​ວັນ ຄຳ​ສະ­ທອນ ພົບ​ກັບ​ນັກ­ກີ­ລາ ອູ​ສະ​ເບັກ​ກິ​ສະ­ຖານ ໃນ​ຮຸ່ນ​ນ້ຳ­ໜັກ 49 ກິ​ໂລ ແລະ ນາງ ດາວ​ມະ­ຍຸ­ລີ ຈັນ​ທິ​ລາດ ພົບ​ກັບ​ນັກ­ກີ­ລາ ສປປ ເກົາ­ຫຼີ ຮຸ່ນ​ນ້ຳ­ໜັກ 54 ກິ​ໂລ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ນັກ­ກີ­ລາ​ລາວ ທັງ 2 ຄົນ​ເສຍ​ໃຫ້​ກັບ​ຄູ່​ຕໍ່­ສູ້​ທັງ​ໝົດ ຕົກ​ຮອບ 8 ຄົນ.

    ຫຼັງ​ການ​ແຂ່ງ­ຂັນ​ທ້າວ ຄຳ​ພູ​ວັນ ຄຳ​ສະ­ທອນ ໃຫ້​ສຳ­ພາດ​ວ່າ: ສຸດ​ເສຍ­ດາຍ​ທີ່​ສຸດ​ທີ່​ຕົນ​ເອງ​ບໍ່​ສາ­ມາດ​ໄປ​ຕໍ່​ໄດ້ ພ້ອມ​ທັງ​ສ້າງ​ຜົນ­ງານ​ໃຫ້​ແກ່​ປະ­ເທດ​ຊາດ ແຕ່​ຜົນ​ການ​ແຂ່ງ­ຂັນ​ອອກ​ມາ ຕ້ອງ​ຍອມ­ຮັບ​ກັບ​ຄວາມ​ເປັນ​ຈິງ​ຄູ່​ແຂ່ງ​ເຂົາ​ອອກ​ໝັດ​ໄດ້​ໄວ ແລະ ຕີ​ດີ​ຫຼາຍ​ຕະ­ຫຼອດ​ໄລ­ຍະ 3 ຍົກ ຜົນ​ໄຊ­ຊະ­ນະ​ກໍ​ຕົກ​ເປັນ​ຂອງ​ເຂົາ ເຖິງ​ຢ່າງ­ໃດ​ກໍ​ຕາມ​ການ​ແຂ່ງ­ຂັນ​ຄັ້ງ​ນີ້ ເປັນ​ບົດ​ທົດ​ສອບ​ໃຫ້​ຮັບ​ຮູ້​ຕົນ​ເອງ​ຕ້ອງ​ໄດ້​ເລັ່ງ​ແກ້​ໄຂ​ປັບ­ປຸງ ສະ­ນັ້ນ ຫຼັງ​ກັບ​ເຖິງ​ບ້ານ​ເກີດ​ກໍ​ຈະ​ສືບ­ຕໍ່​ເຝິກ­ຝົນ​ຫຼໍ່​ຫຼອມ​ໃຫ້​ໜັກ​ຂຶ້ນ​ກວ່າ​ເກົ່າ ເພື່ອ​ເປົ້າ​ໝາຍ​ຜົນ­ສຳ­ເລັດ​ໃນ​ງານ​ຄັ້ງ​ຕໍ່​ໄປ ກໍ​ຄື​ລາຍ­ການ​ມວຍ​ສາ­ກົນ​ຊີງ​ແຊັມ​ທົ່ວ​ປະ­ເທດ ຈະ​ຈັດ​ຂຶ້ນ​ໃນ​ເດືອນ​ມິ­ຖຸ­ນາ ແລະ ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ​ໃນ​ທ້າຍ​ປີ 2019.

    ການ​ແຂ່ງ­ຂັນ​ລາຍ­ການ​ດັ່ງ­ກ່າວ ມີ​ສຸດ​ຍອດ​ນັກ​ຊົກ​ຈາກ​ທົ່ວ​ທະ­ວີບ­ອາ­ຊີ 33 ປະ­ເທດ ເຂົ້າ​ຮ່ວມ​ແຂ່ງ­ຂັນ ສຳ­ລັບ​ລາວ​ກໍ​ຄື​ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ​ສົ່ງ 4 ນັກ­ຊົກ­ມວຍ​ສາ­ກົນ​ທີ່​ດີ​ທີ່​ສຸດ ຕາງ­ໜ້າ​ນັກ­ກີ­ລາ​ລາວ​ຊຸດ​ກຽມ​ລ່າ​ຫຼຽນ​ຄຳ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ໃນ​ທ້າຍ​ປີ​ນີ້ ເຂົ້າ​ຮ່ວມ 4 ລາຍ­ການ ປະ­ກອບ​ມີ​ທ້າວ ຄຳ​ພູ​ວັນ ຄຳ​ສະ­ທອນ ທ້າວ ນັນ­ທະ​ວົງ ສິມ​ພະ​ວົງ ນາງ ວິ­ໄລ​ພອນ ວົງ​ພະ­ຈັນ ແລະ ນາງ ດາວ​ມະ­ຍຸ­ລີ ຈັນ​ທິ​ລາດ.

ຂ່າວທີ່ກ່ຽວຂ້ອງ