ຫວຽດນາມ ນຳເຂົ້ານ້ຳມັນດິບເພີ່ມຂຶ້ນ

1.242 24 ມ.ສ. 2019 ຂ່າວຕ່າງປະເທດ
ຫວຽດນາມ ນຳເຂົ້ານ້ຳມັນດິບເພີ່ມຂຶ້ນ

    ໃນ​ໄຕ​ມາດ​ທີ 1/2019 ຫວຽດນາມ​ນຳ​ເຂົ້າ​ນ້ຳມັນ​ດິບ​ກວ່າ 2,4 ລ້ານ​ໂຕນ ຫຼື​ເປັນ​ມູນ​ຄ່າ​ເທົ່າ​ກັບ​ປະມານ 919 ລ້ານ​ໂດ​ລາ​ສະຫະລັດ ເປັນ​ຕົວ​ເລກ​ທີ່​ເພີ່ມ​ຂຶ້ນ​ທົບ 28 ເທົ່າ​ໃນ​ດ້ານ​ປະລິມານ ແລະ ທົບ 21,98 ເທົ່າ ໃນ​ດ້ານ​ມູນ​ຄ່າ ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ.

   ຕົວ​ແທນ​ຈາກ​ກະຊວງ​ອຸດສາຫະກຳ ການ​ຄ້າ​ຫວຽດນາມ ເວົ້າ​ວ່າ ການ​ນຳ​ເຂົ້າ​ນ້ຳມັນ​ດິບ​ເພີ່ມ​ຂຶ້ນ​ຢ່າງ​ແຮງ ໃນ​ໄຕ​ມາດ​ທີ 1 ທີ່​ຜ່ານ​ມາ ແມ່ນ​ເປັນ​ຍ້ອນ​ປະລິມານ​ການ​ຜະລິດ ທີ່​ຂຸດ​ຄົ້ນ​ຢູ່​ພາຍ​ໃນ​ປະເທດ​ຫຼຸ​​ຸ​ດລົງ  ໃນ​ຂະນະ​ທີ່​ຄວາມ​ຕ້ອງການ​ເພີ່ມ​ຂຶ້ນ ຫຼັງ​ຈາກ​ທີ່​ໂຮງງານ​ກັ່ນ​ນ້ຳມັນ​ງີ​ເຊີນ ເຂົ້າ​ສູ່​ການເຄື່ອນໄຫວ ນັບ​ແຕ່​ທ້າຍ​ປີ 2018 ເປັນຕົ້ນ​ມາ. ຕາມ​ນັ້ນແລ້ວ ປະລິມານ​ນ້ຳມັນ​ດິບ​ທີ່​ຂຸດ​ຄົ້ນ​ໃນ​ເດືອນ​ມີນາ​ທີ່​ຜ່ານ​ມາ ຄາດ​ວ່າ​ບັນລຸ 1,2 ລ້ານ​ໂຕນ ຫຼຸດ​ລົງ 6,1% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2018. ເມື່ອ​ໄລ່​ລວມ​ໃນ​ສາມ​ເດືອນ​ຕົ້ນ​ປີ 2019 ປະລິມານ​ນ້ຳມັນ​ດິບ​ທີ່​ຂຸດ​ຄົ້ນ ຄາດ​ວ່າ​ບັນລຸ 3,3 ລ້ານ​ໂຕນ ຫຼຸດ​ລົງ 8% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ.

    ສະຖິຕິ ຊີ້​ໃຫ້​ເຫັນ​ວ່າ ຈີນ​ຍັງ​ຄົງ​ເປັນ​ຕະຫຼາດ​ລາຍ​ໃຫຍ່​ສຸດ ທີ່​ບໍລິໂພກ​ຜະລິດ​ຕະ​ພັນ​ນ້ຳມັນ​ດິບ​ຂອງ​ຫວຽດນາມ ໂດຍ​ບັນລຸ 523.241 ໂຕນ ຫຼື​ເທົ່າ​ກັບ  257,32 ລ້ານ​ໂດ​ລາ​ສະຫະລັດ ເພີ່ມ​ຂຶ້ນ 118,8% ໃນ​ດ້ານ​ປະລິມານ ແລະ ​ເພີ່ມ​ຂຶ້ນ 102,2% ໃນ​ດ້ານ​ມູນ​ຄ່າ ພາຍ​ໃນ​ໄຕ​ມາດ​ທີ 1/2019. ອັນ​ດັບ​ຮອງ​ລົງ​ມາ​ກໍ​ແມ່ນ​ຕະຫຼາດ​ໄທ ໂດຍ​ນຳ​ເຂົ້າ​ນ້ຳມັນ​ຈາກ​ຫວຽດນາມ ບັນລຸ 317.428 ໂຕນ ຫຼື​ເທົ່າ​ກັບ 160,66 ລ້ານ​ໂດ​ລາ​ສະຫະລັດ ເພີ່ມ​ຂຶ້ນ 71,5% ໃນ​ດ້ານ​ປະລິມານ ແລະ ເພີ່ມ​ຂຶ້ນ 62,2%ໃນ​ດ້ານ​ມູນ​ຄ່າ.

ຂ່າວທີ່ກ່ຽວຂ້ອງ