ເລີ່ມປະຕິບັດໂຄງການ ເພື່ອຫຼຸດຜ່ອນການຕິດເຊື້ອ HIV

939 23 ມ.ສ. 2019 ຂ່າວໜ້າ​ໜຶ່ງ
ເລີ່ມປະຕິບັດໂຄງການ ເພື່ອຫຼຸດຜ່ອນການຕິດເຊື້ອ HIV

    ວັນ​ທີ 22 ເມ­ສາ 2019 ທີ່​ໂຮງ­ໝໍ​ເຊດ​ຖາ​ທິ​ຣາດ ໄດ້​ຈັດ​ພິ­ທີ​ເປີດ​ໂຄງ­ການ​ຮ່ວມ​ມື​ລະ­ຫວ່າງ​ສູນ​ຕ້ານ​ເອດ ແລະ ພະ­ຍາດ​ຕິດ­ຕໍ່​ທາງ​ເພດ​ສຳ­ພັນ (ພຕພ) ໂຮງ­ໝໍ​ເຊດ​ຖາ​ທິ​ຣາດ ແລະ ບໍ­ລິ­ສັດ OTS ກ່ຽວ​ກັບ​ການ​ບໍ­ລິ­ການ​ປິ່ນ­ປົວ​ສຸ­ຂະ­ພາບ ຕ້ານ​ພະ­ຍາດ​ເອດ (HIV) ອັກ­ເສບ​ຕັບ​ຊະ­ນິດ​ບີ ແລະ ຊີ ຂຶ້ນ ມີ​ທ່ານ ສີ​ບຸນ​ໂຮມ ອັກ​ຄະ​ວົງ ຮອງ​ຫົວ­ໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່​ກະ­ຊວງ​ສາ­ທາ­ລະ­ນະ​ສຸກ ທ່ານ ໄພ​ວັນ ແກ້ວ​ປະ­ເສີດ ຜູ້­ອຳ­ນວຍ­ການ​ໂຮງ­ໝໍ​ເຊດ​ຖາ​ທິ​ຣາດ ທ່ານ Thomas cai ອຳ­ນວຍ​ການ​ບໍ­ລິ­ສັດ OTS ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພູ­ທອນ ສຸດ​ທະ​ລັກ ຫົວ­ໜ້າ​ສູນ​ຕ້ານ​ເອດ ແລະ ພຕພ ກ່າວ​ວ່າ: ໂຄງ­ການ​ນີ້​ເປັນ​ໂຄງ­ການ​ໜຶ່ງ​ທີ່​ສຳ­ຄັນ ແລະ ໄດ້​ຮັບ​ອະ­ນຸ­ມັດ​ຈາກ​ກະ­ຊວງ​ສາ­ທາ­ລະ­ນະ​ສຸກ ເພື່ອ​ຈັດ​ຕັ້ງ​ປະ­ຕິ­ບັດ​ເປັນ​ເວ­ລາ 3 ປີ ເປັນ​ການ​ຮ່ວມ​ມື​ລະ­ຫວ່າງ​ລັດ ແລະ ເອ­ກະ​ຊົນ ເຊິ່ງ​ມີ​ຈຸດ­ປະ­ສົງ​ເພື່ອ​ຫຼຸດ­ຜ່ອນ​ການ​ຕິດ­ເຊື້ອ​ເຮ​ສ​ໄອ​ວີ ແລະ ພະ­ຍາດ​ຕິ​ຕໍ່​ທາງ​ເພດ​ສຳ­ພັນ ອັກ­ເສບ​ຕັກ​ບີ ແລະ ຊີ ພ້ອມ​ທັງ​ສົ່ງ­ເສີມ​ວຽກ​ງານ​ການ​ປ້ອງ​ກັນ ການ​ປິ່ນ­ປົວ ເບິ່ງ­ແຍງ ແລະ ຊ່ວຍ­ເຫຼືອ​ຜູ້​ຕິດ­ເຊື້ອ​ພະ­ຍາດ​ດັ່ງ­ກ່າວ ແລະ ປະ­ຊາ­ກອນ​ເຄື່ອນ​ຍ້າຍ​ຢູ່​ໃນ​ລາວ ໃນ​ນີ້ ຂອບ​ເຂດ​ກິດ­ຈະ­ກຳ​ຫຼັກ​ຂອງ​ໂຄງ­ການ ຈະ​ເຮັດ​ວຽກ​ການ​ປ້ອງ​ກັນ ປິ່ນ­ປົວ ແລະ ການ​ໂຄ­ສະ­ນາ​ໃຫ້​ຄວາມ​ຮູ້​ກ່ຽວ​ກັບ​ພະ­ຍາດ​ເອດ ອັກ­ເສບ​ຕັກ​ບີ ແລະ ຊີ ສຳ­ລັບ​ຄົນ​ລາວ ແລະ ຄົນ​ຕ່າງ­ປະ­ເທດ ນັກ​ທ່ອງ​ທ່ຽວ ແຮງ​ງານ​ຕ່າງ​ດ້າວ ກຳ­ມະ­ກອນ ແຮງ​ງານ​ໃນ​ໂຄງ­ການ​ກໍ່­ສ້າງ ແລະ ອຸດ­ສາ­ຫະ­ກຳ​ຕ່າງໆ ແຕ່​ຈະ​ໄດ້​ເກັບ​ຄ່າ​ບໍ­ລິ­ການ​ໃນ​ລາ­ຄາ​ທີ່​ເໝາະ​ສົມ (ບໍ່​ແພງ) ແລະ ຈະ​ມີ​ນະ­ໂຍ­ບາຍ​ສຳ­ລັບ​ຄົນ​ລາວ​ທີ່​ທຸກ​ຍາກ ໂດຍ​ສະ­ເພາະ ໃຫ້­ການ​ຊ່ວຍ­ເຫຼືອ​ທີ່​ເໝາະ​ສົມ​ແກ່​ເດັກ​ກຳ­ພ້າ ທີ່​ໄດ້​ຮັບ​ຜົນ​ກະ­ທົບ​ຈາກ​ການ​ຕິດ­ເຊື້ອ​ເຮ​ສ​ໄອ​ວີ ພັດ­ທະ­ນາ​ຈັດ​ຕັ້ງ​ປະ­ຕິ­ບັດ ແລະ ສ້າງ​ເອ­ກະ­ສານ​ກ່ຽວ​ກັບ​ການ​ຮ່ວມ​ມື​ລະ­ຫວ່າງ​ລັດ-ເອ­ກະ​ຊົນ ທີ່​ມີ​ປະ​ສິດ­ທິ​ຜົນ​ໃນ​ການ​ຄຸ້ມ​ຄອງ​ພະ­ຍາດ​ດັ່ງ­ກ່າວ.

    ສຳ­ລັບ​ວຽກ​ງານ​ປິ່ນ­ປົວ​ຈະ​ຕັ້ງ​ຈຸດ​ປິ່ນ­ປົວ​ຢູ່​ໂຮງ­ໝໍ​ເຊດ​ຖາ​ທິ​ຣາດ (ຕຶກ​ເຂດ​ຮ້ອນ) ການ​ບໍ­ລິ­ການ​ຈະ​ບໍ່​ຮັບ​ຄົນ​ເຈັບ​ມາ​ນອນ​ປິ່ນ­ປົວ ມີ​ແຕ່​ກວດ​ໃຫ້​ຄຳ​ປືກ​ສາ ແລະ ໃຫ້​ຢາ​ປິ່ນ­ປົວ​ເທົ່າ​ນັ້ນ (ກວດ​ເຂດ​ນອກ) ການ​ເລີ່ມ​ວຽກ​ງານ​ປ້ອງ​ກັນ​ທຳ​ອິດ ຈະ​ໄດ້​ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ຫຼວງ​ນ້ຳ​ທາ ອຸ­ດົມ​ໄຊ ຫຼວງ​ພະ​ບາງ ວຽງ​ຈັນ ແລະ ນະ­ຄອນ­ຫຼວງ​ວຽງ​ຈັນ ຕາມ​ເຂດ​ທີ່​ມີ​ການ​ກໍ່­ສ້າງ​ໂຄງ­ການ​ເສັ້ນ­ທາງ​ລົດ­ໄຟ ລາວ-ຈີນ ເຂື່ອນ​ໄຟ­ຟ້າ ຫຼັງ​ຈາກ​ນັ້ນ​ຈະ​ຂະ­ຫຍາຍ​ໄປ​ແຂວງ​ອື່ນໆ​ໃນ​ໄລ­ຍະ​ຕໍ່​ໄປ.

ຂ່າວທີ່ກ່ຽວຂ້ອງ