ສາທາຮຽກຮ້ອງໃຫ້ປະຕິບັດຫຼັກອະນາໄມ 3 ສະອາດ ປ້ອງກັນພະຍາດຖອກທ້ອງ

1.480 23 ມ.ສ. 2019 ຂ່າວໜ້າ​ໜຶ່ງ

    ປັດ­ຈຸ­ບັນ ສະ­ພາບ​ອາ­ກາດ​ແມ່ນ​ຮ້ອນ​ຫາ​ຮ້ອນ​ອົບ­ເອົ້າ​ຫຼາຍ ຈຶ່ງ​ກໍ່­ໃຫ້­ເກີດ​ຫຼາຍ​ພະ­ຍາດ ໂດຍ​ສະ­ເພາະ ພະ­ຍາດ​ຖອກ­ທ້ອງ ເປັນ​ພະ­ຍາດ​ໜຶ່ງ​ທີ່​ທຸກ​ຄົນ​ຄວນ​ເອົາ­ໃຈ­ໃສ່​ຮັກ­ສາ​ສຸ­ຂະ­ພາບ ເພື່ອ​ປ້ອງ​ກັນ​ບໍ່​ໃຫ້​ເກີດ​ພະ­ຍາດ​ດັ່ງ­ກ່າວ.

    ທ່ານ​ນາງ ໄຊ​ພອນ ນັນ­ທະ​ພອນ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ​ນະ­ຄອນ­ຫຼວງ​ວຽງ​ຈັນ ໄດ້​ໃຫ້​ສຳ­ພາດ​ວັນ​ທີ 19 ເມ­ສາ 2019 ວ່າ: ມີ​ຫຼາຍ​ພະ­ຍາດ​ທີ່​ເກີດ​ຂຶ້ນ​ໃນ​ໄລ­ຍະ​ອາ­ກາດ​ຮ້ອນ​ອົບ­ເອົ້າ ໂດຍ​ສະ­ເພາະ ພະ­ຍາດ​ຖອກ­ທ້ອງ ແລະ ມາ​ຮອດ​ປັດ­ຈຸ­ບັນ​ນີ້ ທົ່ວ​ນະ­ຄອນ­ຫຼວງ​ວຽງ​ຈັນ ມີ​ຄົນ​ເຈັບ­ເປັນ​ໝວດ​ອາ­ການ­ພະ­ຍາດ​ຖອກ­ທ້ອງ​ແລ້ວ 1.200 ກໍ­ລະ­ນີ ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ 2018 ເພີ່ມ​ຂຶ້ນ ສະ­ເພາະ​ປີ 2018 ມີ​ຄົນ​ເຈັບ​ພະ­ຍາດ​ດັ່ງ­ກ່າວ​ທັງ​ໝົດ 2.153 ກໍ­ລະ­ນີ.

    ສຳ­ລັບ​ສາ­ເຫດ​ທີ່​ກໍ່­ໃຫ້­ເກີດ​ເປັນ​ພະ­ຍາດ​ດັ່ງ­ກ່າວ ແມ່ນ​ເກີດ​ຈາກ​ສະ­ພາບ​ອາ­ກາດ​ຮ້ອນ​ຫຼາຍ ກໍ່­ໃຫ້­ເກີດ​ອາ­ຫານ​ບູດ­ເນົ່າ​ໄວ ການ​ປຸງ​ແຕ່ງ­ອາ­ຫານ​ບໍ່​ຖືກ​ສຸ​ຂະ​ອະ­ນາ­ໄມ ແລະ ໄລ­ຍະ​ອາ­ກາດ​ຮ້ອນ ມີ​ແມ­ງວັນ​ຫຼາຍ​ບິນ​ໄປ​ຈັບ​ຕອມ​ອາ­ຫານ ສົ່ງ​ຜົນ​ໃຫ້​ອາ­ຫານ​ບໍ່​ສະ­ອາດ ມີ​ເຊື້ອ​ພະ­ຍາດ ເພື່ອ​ຫຼີກ​ລ່ຽງ​ຈາກ​ພະ­ຍາດ​ດັ່ງ­ກ່າວ ພະ​ແນກ​ສາ­ທາ­ລະ­ນະ​ສຸກ​ນະ­ຄອນ­ຫຼວງ​ວຽງ​ຈັນ ໄດ້​ຈັດ​ທີມ​ງານ​ສຸ​ຂະ​ສຶກ​ສາ​ສົມ­ທົບ​ກັບ​ທີມ​ງານ​ສຸ​ຂະ​ສຶກ​ສາ ຫ້ອງ­ການ​ສາ­ທາ­ລະ­ນະ​ສຸກ 9 ເມືອງ​ລົງ​ໄປ​ໃຫ້​ສຸ​ຂະ​ສຶກ​ສາ​ໃຫ້​ຜູ້​ປະ­ກອບ​ການ​ຮ້ານ​ອາ­ຫານ ແລະ ຮ້ານ​ຂາຍ​ອາ­ຫານ​ສຸກ ໂດຍ​ໃຫ້​ເອົາ­ໃຈ­ໃສ່​ໃນ​ການ​ປຸງ​ແຕ່ງ­ອາ­ຫານ​ໃຫ້​ສະ­ອາດ ແລະ ປອດ​ໄພ ພ້ອມ​ນັ້ນ ຍັງ​ມີ​ທີມ​ງານ​ອາ­ຫານ​ປອດ​ໄພ​ລົງ​ຕິດ­ຕາມ​ອາ­ຫານ​ຕ່າງໆ​ເຊັ່ນ​ກັນ ນອກ­ຈາກ​ພະ­ຍາດ​ຖອກ­ທ້ອງ​ທີ່​ທຸກ​ຄົນ​ຕ້ອງ​ເອົາ­ໃຈ­ໃສ່​ປ້ອງ​ກັນ​ແລ້ວ ຍັງ​ມີ​ອີກ​ພະ­ຍາດ​ໜຶ່ງ​ທີ່​ຕ້ອງ​ເອົາ­ໃຈ­ໃສ່​ປ້ອງ​ກັນ ຄື: ພະ­ຍາດ​ຄວາມ­ດັນ­ເລືອດ­ສູງ ແລະ ພະ­ຍາດ​ວິນ​ຫົວ ໂດຍ​ຕ້ອງ​ເອົາ­ໃຈ­ໃສ່​ບໍ່​ຢູ່​ບ່ອນ​ທີ່​ແອ​ອັດ ແລະ ມີ​ອາ­ກາດ​ຮ້ອນ ຕ້ອງ​ຢູ່​ບ່ອນ​ທີ່​ໂລ່ງ​ແຈ້ງ ອາ­ກາດ​ປອດ­ໂປ່ງ ເພື່ອ​ຫຼີກ​ລ່ຽງ ແລະ ປ້ອງ​ກັນ​ພະ­ຍາດ​ດັ່ງ­ກ່າວ.

    ໂອ­ກາດ​ນີ້ ທ່ານ​ນາງ ໄຊ​ພອນ ນັນ­ທະ​ພອນ ໄດ້​ຮຽກ­ຮ້ອງ​ໃຫ້​ປະ­ຊາ­ຊົນ​ເອົາ­ໃຈ­ໃສ່​ໃນ​ການ​ຮັກ­ສາ​ສຸ­ຂະ­ພາບ ໂດຍ​ປະ­ຕິ­ບັດ​ຕາມ​ຫຼັກ​ອະ­ນາ­ໄມ 3 ສະ­ອາດ ຄື: ກິນ​ສະ­ອາດ ປຸງ​ແຕ່ງ​ສະ­ອາດ ແລະ ບໍ­ລິ­ໂພກ​ອາ­ຫານ​ສະ­ອາດ ດ້ວຍ​ການ​ປຸງ​ແຕ່ງ​ໃໝ່ ແລະ ສຸກ​ດີ ໄປ​ພ້ອມ​ກັບ​ດື່ມ­ນ້ຳ​ສະ­ອາດ ແລະ ດື່ມ­ນ້ຳ​ຕົ້ມ​ທີ່​ສຸກ​ດີ ປົກ​ປິດ​ອາ­ຫານ​ບໍ່​ໃຫ້​ແມ­ງວັນ​ເຂົ້າ​ໄປ​ຕອມ ເຊິ່ງ​ສິ່ງ​ທີ່​ກ່າວ​ມາ​ຂ້າງ​ເທິງ​ນີ້ ຖ້າ​ຫາກ​ທຸກ​ຄົນ​ເອົາ­ໃຈ­ໃສ່​ປະ­ຕິ­ບັດ ກໍ​ຈະ​ສາ­ມາດ​ຫຼີກ​ລ່ຽງ​ໃນ​ການ​ເປັນ​ພະ­ຍາດ​ຖອກ­ທ້ອງ​ໄດ້.

ຂ່າວທີ່ກ່ຽວຂ້ອງ