ປະຊາຊົນບ້ານຫຸມແບ່ງ ສາມັກຄີສົມທົບທຶນສ້າງຂົວຂ້າມ 2 ແຫ່ງ

586 23 ມ.ສ. 2019 ຂ່າວໜ້າ​ໜຶ່ງ
ປະຊາຊົນບ້ານຫຸມແບ່ງ ສາມັກຄີສົມທົບທຶນສ້າງຂົວຂ້າມ 2 ແຫ່ງ

    ພິ­ທີ​ເປີດ​ນຳ​ໃຊ້​ຂົວ​ເບ​ຕົງ​ເສີມ​ເຫຼັກ​ຊຸມ​ຊົນ​ຂ້າມ​ນ້ຳ​ຫຸມ ຢູ່​ບ້ານ​ຫຸມ​ແບ່ງ ແຫ່ງ​ທີ 1 ແລະ ທີ 2 ຈັດ​ຂຶ້ນ​ວັນ​ທີ 22 ເມ­ສາ 2019 ທີ່​ບ້ານ​ຫຸມ​ແບ່ງ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ມີ​ທ່ານ ພູ​ວຽງ ເພຍ​ເທບ ຮອງ​ເຈົ້າ­ເມືອງ​ນາ​ຊາຍ​ທອງ ພ້ອມ​ດ້ວຍ​ບັນ­ດາ​ຫ້ອງ­ການ​ອ້ອມ​ຂ້າງ ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ພາຍ​ໃນ​ບ້ານ​ເຂົ້າ​ຮ່ວມ.

    ທ່ານ ບົວ​ລ່ຳ ໄຊ​ຍະ​ສານ ນາຍ­ບ້ານ​ຫຸມ​ແບ່ງ ໄດ້​ກ່າວ​ວ່າ: ການ​ກໍ່­ສ້າງ​ຂົວ​ເບ​ຕົງ​ເສີມ​ເຫຼັກ​ຊຸມ​ຊົນ​ຂ້າມ​ນ້ຳ​ຫຸມ ຢູ່​ບ້ານ​ຫຸມ​ແບ່ງ 2 ແຫ່ງ ໄດ້​ນຳ​ໃຊ້​ທຶນ​ຂອງ​ປະ­ຊາ­ຊົນ ແລະ ບັນ­ດາ​ນັກ­ທຸ­ລະ­ກິດ ຫ້າງ​ຮ້ານ​ທີ່​ອາ­ໄສ​ຢູ່​ພາຍ​ໃນ​ບ້ານ ເຊິ່ງ​ຂົວ​ແຫ່ງ​ທີ 1 ມີ​ຄວາມ​ກວ້າງ 2,50 ແມັດ ແລະ ຍາວ 14 ແມັດ ສາ­ມາດ​ຮັບ​ນ້ຳ­ໜັກ​ໄດ້ 2,5 ໂຕນ ລວມ​ມູນ​ຄ່າ 48 ລ້ານ​ກີບ ແລະ ຂົວ​ແຫ່ງ​ທີ 2 ມີ​ຂະ­ໜາດ​ກວ້າງ 3,50 ແມັດ ແລະ ຍາວ 18 ແມັດ ຮັບ​ນ້ຳ­ໜັກ​ໄດ້ 5 ໂຕນ ລວມ​ມູນ​ຄ່າ 87 ລ້ານ​ກີບ ທັງ​ສອງ​ແຫ່ງ​ໄດ້​ເລີ່ມ​ກໍ່­ສ້າງ​ມາ​ແຕ່​ເດືອນ​ຕຸ­ລາ 2018 ແລະ ສຳ­ເລັດ​ເດືອນ​ມີ­ນາ 2019 ທັງ​ນີ້ ເພື່ອ​ສ້າງ​ຄວາມ​ສະ­ດວກ​ໃຫ້​ປະ­ຊາ­ຊົນ​ພາຍ​ໃນ​ບ້ານ ໃນ​ການ​ສັນ­ຈອນ​ໄປ​ມາ ແລະ ອຳ­ນວຍ​ຄວາມ​ສະ­ດວກ​ດ້ານ​ຂົນ­ສົ່ງ ຜົນ​ຜະ­ລິດ​ຈາກ​ທົ່ງ​ນາ​ເຂົ້າ​ມາ­ສູ່​ບ້ານ​ເຮືອນ.

    ເພື່ອ​ສະ­ແດງ​ຄວາມ​ຂອບ­ໃຈ ຈາ­ລຶກ​ຄຸນ­ງາມ­ຄວາມ­ດີ​ຕໍ່​ຜູ້​ທີ່​ປະ­ກອບ­ສ່ວນ ໃນ​ການ​ກໍ່­ສ້າງ​ຂົວ​ຂ້າມ​ນ້ຳ​ຫຸມ​ແບ່ງ​ທັງ 2 ແຫ່ງ​ຄັ້ງ​ນີ້ ດັ່ງ­ນັ້ນ ອຳ­ນາດ​ການ​ປົກ­ຄອງ​ເມືອງ​ນາ​ຊາຍ​ທອງ ຕາງ­ໜ້າ​ໃຫ້​ພັກ-ລັດ­ຖະ­ບານ ໄດ້​ມອບ​ໃບ​ກຽດ​ຕິ​ຄຸນ​ໃຫ້​ບັນ­ດາ​ຜູ້​ທີ່​ປະ­ກອບ­ສ່ວນ​ເງິນ ວັດ­ຖຸ ແລະ ແຮງ​ງານ​ເຂົ້າ​ໃນ​ການ​ກໍ່­ສ້າງ​ຂົວ​ແຫ່ງ​ດັ່ງ­ກ່າວ​ຢ່າງ​ສົມ​ກຽດ.

ຂ່າວທີ່ກ່ຽວຂ້ອງ