ລາຍເພັດນ້ອຍ ປະທະ ເພັດດຸນສາດ ມວຍຄູ່ເອກຊີງຂັນປະທານມວຍໂລກ

707 23 ມ.ສ. 2019 ວົງຈອນກີລາ
ລາຍເພັດນ້ອຍ ປະທະ ເພັດດຸນສາດ ມວຍຄູ່ເອກຊີງຂັນປະທານມວຍໂລກ

    ລາຍ​ເພັດ​ນ້ອຍ ຈາກ​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ລາວ ຈະ​ຂຶ້ນ​ສັງ­ວຽນ​ປະ​ທະ​ທ້າວ ເພັດ​ດຸນ​ສາດ ກຽດ​ສົມ​ນຶກ ນັກ​ຊົກ​ຊື່​ດັງ​ຈາກ​ແຂວງ​ຂອນ​ແກ່ນ ປະ­ເທດ​ໄທ ໃນ​ມວຍ​ຄູ່​ເອກ ຮຸ່ນ​ນ້ຳ­ໜັກ 57 ກິ​ໂລ ຊີງ​ຂັນ​ປະ­ທານ​ສະ­ຫະ­ພັນ​ມວຍ​ໂລກ ທີ່​ຈະ​ຈັດ​ຂຶ້ນ​ວັນ​ທີ 26 ເມ­ສາ 2019 ຢູ່​ເວ­ທີ​ມວຍ​ຊົ່ວ­ຄາວ ບຶງ​ຂະ​ຫຍອງ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ເລີ່ມ​ເວ­ລາ 18:30 ໂມງ​ເປັນ­ຕົ້ນ​ໄປ.

    ທ່ານ ມໍ​ລະ​ກົດ ສຸ­ວັນ­ນະ​ສັງ​ໂສ ເລ­ຂາ­ທິ­ການ​ສະ­ຫະ­ພັນ​ມວຍ​ແຫ່ງ​ຊາດ​ລາວ ແຈ້ງ​ໃຫ້​ຮູ້​ວ່າ: ພາຍ­ຫຼັງ​ທີ່​ໄດ້​ມີ​ການ​ປຶກ­ສາ​ຫາ­ລື​ກັນ​ມາ​ດົນ​ພໍ​ສົມ­ຄວນ ເພື່ອ​ກະ­ກຽມ​ຈະ​ຈັດ­ການ​ແຂ່ງ­ຂັນ​ຄັ້ງ​ນີ້​ໃຫ້​ອອກ​ມາ​ດີ ແລະ ເປັນ​ທີ່​ຖືກ​ໃຈ​ບັນ­ດາ​ກອງ​ເຊຍ​ມວຍ​ພັນ​ແທ້​ຂອງ 2 ຝັ່ງ​ຂອງ ລາວ-ໄທ ແນ­ໃສ່​ສົ່ງ­ເສີມ​ການ­ທ່ອງ­ທ່ຽວ​ສອງ​ຊາດ ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ໃນ​ທົ່ວ​ໂລກ​ຮູ້​ກັນ​ຢ່າງ​ກວ້າງ­ຂວາງ ສະ­ນັ້ນ ພວກ​ເຮົາ​ຈຶ່ງ​ໄດ້​ຕົກ­ລົງ​ເປັນ​ເອ­ກະ​ພາບ​ກັນ​ກຳ­ນົດ​ເອົາ​ຮຸ່ນ​ນ້ຳ­ໜັກ 57 ກິ​ໂລ ເປັນ​ຄູ່​ຊີງ​ຂັນ​ປະ­ທານ​ສະ­ຫະ­ພັນ​ມວຍ​ໂລກ ປະ­ຈຳ​ປີ 2019 ລະ­ຫວ່າງ​ທ້າວ ລາຍ​ເພັດ​ນ້ອຍ ຂຶ້ນ​ຊົກ​ກັບ​ທ້າວ ເພັດ​ດຸນ​ສາດ ກຽດ​ສົມ​ນຶກ ໃນ​ມວຍ​ຄູ່​ເອກ ນອກ­ຈາກ​ນັ້ນ​ຍັງ​ມີ​ຄູ່​ຊົກ​ທີ່​ໜ້າ​ຕິດ­ຕາມ​ຊົມ ແລະ ເຊຍ​ບໍ່​ແພ້​ມວຍ​ຄູ່​ເອກ​ເຊັ່ນ​ກັນ ປະ­ກອບ​ມີ ຂຸນ​ພົນ​ນ້ອຍ ສະ­ໂມ­ສອນ​ຄຳ​ເສັງ (ລາວ) ພົບ​ກັບ ສຸ­ລະ​ເດດ ສໍ​ທະ­ວີ​ຊັບ (ໄທ) ໃນ​ຮຸ່ນ​ນ້ຳ­ໜັກ 64 ກິ​ໂລ ແລະ ເພັດ​ແດນ​ໃຕ້ ປກສ ພົບ​ກັບ ອະ­ພິ​ເດດ ກຽດ​ສົມ​ນຶກ (ໄທ) ໃນ​ຮຸ່ນ​ນ້ຳ­ໜັກ 46 ກິ​ໂລ.

    ສ່ວນ​ການ​ແຂ່ງ­ຂັນ​ມວຍ​ອີກ 6 ຄູ່ ມີ ເພັດ​ຂວັນ​ໄຊ ຈາກ​ແຂວງ​ເຊ​ກອງ ພົບ​ກັບ ນ້ອງ​ເບຍ ຈາກ​ກະ­ຊວງ​ປ້ອງ​ກັນ​ປະ­ເທດ ຫຼື ກອງ­ທັບ ຮຸ່ນ​ນ້ຳ­ໜັກ 53 ກິ​ໂລ ເພັດ​ພັນ​ແທ້ ລູກ­ບ້ານ​ດຸງ ພົບ​ກັບ ຂຸນ​ເຫຼັກ ສະ­ໂມ­ສອນ​ຄຳ​ເສັງ ຮຸ່ນ​ນ້ຳ­ໜັກ 57 ກິ​ໂລ ໂປ​ລິດ​ນ້ອຍ ປກສ ພົບ​ກັບ ສະ­ທ້ານ​ຟ້າ ສໍ​ກຸນ​ລະ​ວົງ ຮຸ່ນ​ນ້ຳ­ໜັກ 30 ກິ​ໂລ ສອນ​ນະ​ລາຍ ປກສ ພົບ​ກັບ ກ້ອງ​ຊາຍ​ແດນ ແຂວງ​ເຊ​ກອງ ຮຸ່ນ​ນ້ຳ­ໜັກ 63 ກິ​ໂລ ໄຊ​ມ້ອນ ລູກ­ບ້ານ​ດຸງ ພົບ​ກັບ ເພັດ​ເມືອງ​ຊົນ ຂວັນ​ໃຈ​ສີ​ໂຄດ ຮຸ່ນ​ນ້ຳ­ໜັກ 56 ກິ​ໂລ ແລະ ຄູ່​ສຸດ​ທ້າຍ ເອ­ກະ​ໄຊ ແຂວງ​ຈຳ­ປາ​ສັກ ພົບ​ກັບ ເກົ້າ​ແສນ ຂວັນ​ໃຈ​ສີ​ໂຄດ ຮຸ່ນ​ນ້ຳ­ໜັກ 55 ກິ​ໂລ.

ຂ່າວທີ່ກ່ຽວຂ້ອງ