ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 23/04/2019

1.272 23 ມ.ສ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ມາດ​ຕະ­ການ​ເພື່ອ​ຄຸ້ມ​ຄອງ​ຜູ້­ນຳ​ທ່ຽວ​ຢູ່ ຫວຽດ­ນາມ ແລະ ເລື່ອງ​ມາດ​ຕະ­ການ​ເພື່ອ​ນຳ​ໃຊ້​ອາ­ຫານ​ເຫຼືອ​ກິນ​ຢູ່ ອິນ​ໂດ​ເນ​ເຊຍ.

    ທີ່ ຫວຽດ­ນາມ: ພາຍ​ໃຕ້​ກົດ­ໝາຍ​ທ່ອງ​ທ່ຽວ​ຫວຽດ­ນາມ ຜູ້­ນຳ​ທ່ຽວ​ຕ້ອງ​ເຄື່ອນ​ໄຫວ​ໃນ​ຂອບ​ກົດ​ລະ­ບຽບ​ທີ່​ເຄັ່ງ​ຄັດ ທັງ​ນີ້ ກໍ​ເພື່ອ​ຮັບ­ປະ­ກັນ​ຄຸນ​ນະ​ພາບ​ຂອງ​ຂະ­ແໜງ­ການ ກົດ­ໝາຍ​ໄດ້​ກຳ­ນົດ​ໃຫ້​ຜູ້­ນຳ​ທ່ຽວ​ຕ້ອງ​ເຮັດ​ສັນ­ຍາ​ກັບ​ສຳ­ນັກ­ງານ​ບໍ­ລິ­ການ ການ­ທ່ອງ­ທ່ຽວ ຫຼື ບໍ­ລິ­ສັດ​ທ່ອງ​ທ່ຽວ​ທີ່​ເປັນ​ທາງ​ການ ຫຼື ຕ້ອງ​ເປັນ​ສະ­ມາ­ຊິກ​ຂອງ​ອົງ​ການ­ຈັດ­ຕັ້ງ​ຜູ້­ນຳ​ທ່ຽວ​ອາ­ຊີບ ນອກ­ຈາກ​ນັ້ນ ຜູ້­ນຳ​ທ່ຽວ​ຍັງ​ຕ້ອງ​ມີ​ເອ­ກະ­ສານ​ສັນ­ຍາ ຫຼື ເອ­ກະ­ສານ​ທຽບ​ເທົ່າ ໃນ​ການ­ເຄື່ອນ­ໄຫວ​ວຽກ​ງານ​ຂອງ​ຕົນ​ແຕ່​ລະ​ຄັ້ງ​ອີກ​ດ້ວຍ ໜັງ­ສື­ພິມ​ວຽງ​ຈັນ​ທາມ (29 ພະ­ຈິກ 2017) ທີ່​ອ້າງ​ຕາມ​ແຫຼ່ງ​ຂ່າວ​ຫວຽດ­ນາມ​ນິວ ໃຫ້​ຮູ້​ວ່າ: ລະ­ບຽບ​ການ​ຄຸ້ມ​ຄອງ​ໃໝ່​ນີ້ ອາດ​ເຮັດ​ໃຫ້​ຜູ້­ນຳ​ທ່ຽວ​ອິດ­ສະ­ຫຼະ​ຫວຽດ­ນາມ​ຈຳ­ນວນ​ຫຼາຍ​ພັນ​ຄົນ​ວ່າງ​ງານ ເຊິ່ງ​ຈະ​ເຮັດ​ໃຫ້​ມີ​ສະ­ພາບ​ຂາດ­ແຄນ​ຜູ້­ນຳ​ທ່ຽວ​ຢ່າງ​ໜັກ­ໜ່ວງ ແນວ­ໃດ​ກໍ​ດີ ໃນ​ຊຸມ​ປີ​ຫຼັງໆ​ມາ​ນີ້ ອຸດ­ສາ­ຫະ­ກຳ​ທ່ອງ​ທ່ຽວ​ຫວຽດ­ນາມ ໄດ້​ກ້າວ​ກະ­ໂດດ​ຂຶ້ນ​ເປັນ​ໜຶ່ງ​ໃນ​ຂະ­ແໜງ­ການ​ທີ່​ພັດ­ທະ­ນາ​ໄວ​ທີ່​ສຸດ​ຂອງ​ປະ­ເທດ ແລະ ຢືນ​ຢູ່​ໃນ​ແຖວ​ໜ້າ​ຂອງ​ບັນ­ດາ​ປະ­ເທດ​ໃນ​ອາ­ຊີ ທີ່​ມີ​ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ຕອມ​ຫຼາຍ​ທີ່​ສຸດ.

    ທີ່ ອິນ​ໂດ​ເນ​ເຊຍ: ມີ​ຂ່າວ​ທີ່​ຟັງ​ແລ້ວ ເປັນ​ໜ້າ​ເຫຼືອ​ເຊື່ອ​ທີ່​ບອກ​ວ່າ: ອິນ​ໂດ​ເນ​ເຊຍ ຄອງ​ອັນ​ດັບ​ທີ​ສອງ​ຂອງ​ໂລກ ທີ່​ມີ​ການ​ກິນ​ອາ­ຫານ​ຟຸມ​ເຟືອຍ ແລະ ເທ​ອາ­ຫານ​ທີ່​ຍັງ​ບໍ­ລິ­ໂພກ​ໄດ້​ຖິ້ມ​ເປັນ​ຈຳ­ນວນ​ຫຼາຍ ຮອງ​ຈາກ​ປະ­ເທດ​ອາ​ຣາ​ບີ ຊາ​ອຸ​ດິດ ທີ່​ເປັນ​ທີ​ໜຶ່ງ​ຂອງ​ໂລກ ສະ­ຫະ­ລັດ​ອາ​ເມ​ຣິ​ກາ ຄອງ​ອັນ​ດັບ​ທີ​ສາມ​ຖັດ​ຈາກ ອິນ​ໂດ​ເນ​ເຊຍ (ໜັງ­ສື­ພິມ The Nation 21 ມິ­ຖຸ­ນາ 2018) ອິນ​ໂດ​ເນ​ເຊຍ ມີ​ພົນ­ລະ­ເມືອງ 260 ລ້ານ​ຄົນ ໂດຍ​ສະ­ເລ່ຍ​ຄົນ​ອິນ​ໂດ​ເນ​ເຊຍ 1 ຄົນ ຖິ້ມ​ຂີ້​ເຫຍື້ອ​ອາ­ຫານ​ເກືອບ 300 ກິ​ໂລ​ກຼາມ​ຕໍ່​ປີ ຖ້າ​ເບິ່ງ​ກວ້າງໆ​ໃນ​ຂອບ​ເຂດ​ທົ່ວ​ໂລກ ໂດຍ​ສະ­ເລ່ຍ​ອາ­ຫານ​ທີ່​ຖືກ​ເທ​ຖິ້ມ ຫຼື ເສຍ​ຄຸນ​ນັ້ນ ກວມ​ເອົາ​ປະ­ມານ 30% ຂອງ​ຈຳ­ນວນ​ອາ­ຫານ​ທີ່​ຜະ­ລິດ​ໄດ້​ປະ­ຈຳ​ປີ​ໃນ​ທົ່ວ​ໂລກ ຫຼື ເທົ່າໆ​ກັບ 1,3 ຕື້​ໂຕນ ຄິດ​ເປັນ​ມູນ​ຄ່າ​ສູງ​ເຖິງ 1 ພັນ​ຕື້​ໂດ​ລາ​ສະ­ຫະ­ລັດ ເມື່ອ​ເຫັນ​ອາ­ຫານ​ທີ່​ຍັງ​ສາ­ມາດ​ບໍ­ລິ­ໂພກ​ໄດ້ ກໍ​ເກີດ​ມີ​ຄົນ​ໃຈ​ບຸນ​ຊອກ​ຫາ​ວິ­ທີ​ນຳ​ອາ­ຫານ​ທີ່​ຖືກ​ໂຍນ​ຖິ້ມ​ເຫຼົ່າ­ນັ້ນ ມາ​ປຸງ​ແຕ່ງ​ໃຫ້​ມີ​ລົດ​ຊາດ​ແຊບ​ຊ້ອຍ ແລະ ມີ​ຄຸນ­ຄ່າ​ທາງ​ອາ­ຫານ ເພື່ອ​ເອົາ​ໄປ​ແຈກ​ຢາຍ​ໃຫ້​ກຸ່ມ​ຄົນ​ທີ່​ຫິວ​ໂຫຍ​ຈົນ​ໄສ້​ແຫ້ງ ຢູ່​ອິນ​ໂດ​ເນ​ເຊຍ ໂຄງ­ການ​ນີ້​ເອີ້ນ​ຊື່­ວ່າ: “ບະ​ແລ​ຊິງ ທູ ແຊ” (Blessing to Share) ຫຼື ແບ່ງ­ປັນ​ເພື່ອ​ສົງ­ເຄາະ​ນີ້ ໄດ້​ເລີ່ມ​ເກັບ​ອາ­ຫານ​ເຫຼືອ​ຈາກ​ງານ​ດອງ​ກ່ອນ ຜູ້​ລິ​ເລີ່ມ​ສ້າງ­ຕັ້ງ​ໂຄງ­ການ​ອີ່ມ​ເຕັມ​ເພື່ອ​ຄົນ​ຈົນ​ນີ້ ຊື່­ວ່າ: ທ່ານ ອັດ​ສະ​ຕຼິດ ປາ​ຣາ​ມິ​ຕາ ທ່ານ​ບອກ​ວ່າ ຢູ່​ອິນ​ໂດ​ເນ​ເຊຍ​ນີ້ ມີ​ງານ​ແຕ່ງ­ດອງ​ຫຼາຍ ແລະ ແຕ່​ລະ​ງານ​ມີ​ອາ­ຫານ​ເຫຼືອ​ຢ່າງ​ຫຼວງ­ຫຼາຍ ດັ່ງ­ນັ້ນ ໂຄງ­ການ​ຈຶ່ງ​ເນັ້ນ​ສະ​ສົມ​ອາ­ຫານ​ເຫຼືອ​ຈາກ​ງານ​ດອງ ແລະ ຕໍ່​ໄປ​ເມື່ອ​ໂຄງ­ການ​ຂະ­ຫຍາຍ​ໂຕ​ກວ້າງ​ອອກ​ໄປ​ສູ່​ຕົວ​ເມືອງ​ອື່ນໆ ກໍ​ຈະ​ມີ​ການ​ສະ​ສົມ​ອາ­ຫານ​ເຫຼືອ​ຈາກ​ງານ​ລ້ຽງ​ຂອງ​ເຫຼົ່າ​ບໍ­ລິ­ສັດ ກໍ​ຄື​ກອງ​ປະ­ຊຸມ​ຕ່າງໆ ໂຄງ­ການ​ນຳ​ໃຊ້​ຂີ້​ເຫຍື້ອ​ອາ­ຫານ​ນີ້ ເລີ່ມ​ຂຶ້ນ​ໃນ​ເດືອນ​ພະ­ຈິກ ປີ 2017 ຢູ່​ນະ­ຄອນ­ຫຼວງ ຈາ​ກາ​ຕາ ແລະ ຫຼັງ​ຈາກ​ນັ້ນ ມາ​ເປັນ​ເວ­ລາ​ປະ­ມານ 6 ເດືອນ ທາງ​ໂຄງ­ການ​ກໍ​ສາ­ມາດ​ເກັບ​ຂີ້​ເຫຍື້ອ​ອາ­ຫານ​ໄດ້ ປະ­ມານ 1,6 ໂຕນ ຈາກ​ງານ​ແຕ່ງ­ດອງ​ຈຳ­ນວນ 50 ງານ ທີ່​ໃຫ້­ການ​ຮ່ວມ​ມື ນີ້​ຄື​ຫົວ​ຂ່າວ​ກັບ​ຫົວ­ຄິດ​ປະ­ດິດ​ສ້າງ​ທີ່​ຫຼາຍ​ປະ­ເທດ ພວມ​ດຳ­ເນີນ​ຢ່າງ​ຈິງ​ຈັງ​ຕັ້ງ­ໜ້າ ເພື່ອ​ນຳ​ຂີ້​ເຫຍື້ອ​ອາ­ຫານ​ທີ່​ຍັງ​ບໍ­ລິ­ໂພກ​ໄດ້​ກັບ​ຄືນ​ສູ່ ປາກ-ທ້ອງ​ຂອງ​ຜູ້​ຫິວ​ໂຫຍ ຍ້ອນ​ສະ­ພາບ​ຄວາມ­ທຸກ​ຍາກ.

ຂ່າວທີ່ກ່ຽວຂ້ອງ