ປະທານາທິບໍດີ ໂປ​ໂຣ​ເຊນ​ໂກ ຍອມຮັບ​ຄວາມ​ພ່າຍ​ແພ້​ໃນ​ການ​ເລືອກ​ຕັ້ງ

711 23 ມ.ສ. 2019 ຂ່າວຕ່າງປະເທດ
ປະທານາທິບໍດີ ໂປ​ໂຣ​ເຊນ​ໂກ ຍອມຮັບ​ຄວາມ​ພ່າຍ​ແພ້​ໃນ​ການ​ເລືອກ​ຕັ້ງ

    ຜົນ​ການ​ສຳ​ຫຼວດ​ຢູ່​ນອກ​ຫ້ອງ​ປ່ອນ​ບັດ​ເລືອກ​ຕັ້ງ ທີ່​ຈັດ​ທຳ​ໂດຍ​ຫຼາຍ​ອົງການ​ນັ້ນ ຊີ້​ໃຫ້​ເຫັນ​ວ່າ ທ່ານ ໂວ​ໂລ​ດີ​ເມຍ ເຊ​ເລນ​ສະ​ກີ ນັກສະແດງ​ຕະຫຼົກ (ອາຍຸ 41 ປີ) ຍາດ​ໄດ້​ໄຊຊະນະ​ຢ່າງ​ຂາດ​ຂັ້ນ ກັບ​ທ່ານ ເປ​ໂຕຣ ໂປ​ໂຣ​ເຊນ​ໂກ ປະທານາທິບໍດີ​ຄົນ​ປັດຈຸບັນ. ຕາມ​ນັ້ນແລ້ວ ທ່ານ ເຊ​ເລນ​ສະ​ກີ ໄດ້​ເອົາ​ຊະນະ​ເໜືອ​ປະທານາທິບໍດີ ໂປ​ໂຣ​ເຊນ​ໂກ ໂດຍ​ໄດ້​ສຽງ​ສະໜັບສະໜູນ 73,2% ຂອງ​ຈຳນວນ​ບັດ​ເລືອກ​ຕັ້ງ​ປະທານາທິບໍດີ​ຮອບ​ທີ​ສອງ ຊຶ່ງ​ຈັດ​ຂຶ້ນ​ໃນ​ວັນ​ທີ 21 ເມສາ​ນີ້.

ປະທານາທິບໍດີ ໂປ​ໂຣ​ເຊນ​ໂກ ກ່າວ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ວ່າ ທ່ານ​ຈະ​ອອກ​ໄປ​ຈາກ​ບ່ອນ​ເຮັດ​ວຽກ​ໃນ​ເດືອນ​ໜ້າ ແຕ່​ຈະ​ຍັງ​ບໍ່​ວາງ​ມື​ຈາກ​ການເມືອງ.

    ທາງ​ດ້ານ​ທ່ານ ເຊ​ເລນ​ສະ​ກີ ໄດ້​ກ່າວ​ຕໍ່​ຜູ້​ສື່​ຂ່າວ ຫຼັງ​ຈາກ​ທີ່​ມີ​ຜົນ ການ​ສຳ​ຫຼວດ​ຫາງ​ສຽງ​ອອກ​ມາ ໂດຍ​ທ່ານ​ໄດ້​ໃຫ້​ສັນຍາ​ວ່າ​ຈະ “ກັບ​ສູ່​ການເຄື່ອນໄຫວ” ສຳລັບ​ຂະ​ບວນ​ການ​ເຈລະຈາ​ສັນຕິພາບ​ກັບ​ຝ່າຍ​ຕ່າງໆ ຕາມ​ຂໍ້​ຕົກລົງ ມິນ​​ສກ໌ ພ້ອມ​ທັງ​ຢືນຢັນ​ວ່າ ສິ່ງ​ສຳຄັນ​ທີ່​ສຸດ​ໃນ​ປັດຈຸບັນ ກໍ​ແມ່ນ​ຢຸດຕິ​ການ​ພິພາດ​ຢູ່​ທາງ​ພາກ​ຕາເວັນ​ອອກ​ຂອງ​ອູ​ແກຣນ.

    ຕາມ​ແຜນການ​ແລ້ວ ຄະນະ​ກຳມະການ​ການ​ເລືອກ​ຕັ້ງ​ສູນ​ກາງຂອງ​ອູ​ແກຣນ ຈະ​ປະກາດ ຜົນ​ຂອງ​ການ​ເລືອກ​ຕັ້ງ​ຢ່າງ​ເປັນ​ທາງ​ການ ໃນ​ວັນ​ທີ 1 ພຶດສະພາ​ໜ້າ​ນີ້ ແລະ​ ຄາດ​ວ່າ​ປະທານາທິບໍດີ​ຄົນ​ໃໝ່ ຈະ​ສາບານ​ຕົນ​ເຂົ້າ​ຮັບ​ຕຳແໜ່ງ ບໍ່​ກາຍ​ວັນ​ທີ 3 ມິຖຸນາ.

ຂ່າວທີ່ກ່ຽວຂ້ອງ