ຂ່າວຫຼ້າສຸດ

ໄຂ້​ຫວັດ​ສັດ​ປີກ​ສາຍ​ພັນ H5N6 ລະບາດ​ເປັນ​ເທື່ອ​ທຳ​ອິດ​ຢູ່​ໃນ​ກຳ​ປູ​ເຈຍ

316 23 ມ.ສ. 2019 ຂ່າວຕ່າງປະເທດ
ໄຂ້​ຫວັດ​ສັດ​ປີກ​ສາຍ​ພັນ H5N6 ລະບາດ​ເປັນ​ເທື່ອ​ທຳ​ອິດ​ຢູ່​ໃນ​ກຳ​ປູ​ເຈຍ

    ອົງການ​ສັດຕະວະແພດ​ໂລກ (OIE) ແຈ້ງ​ໃຫ້​ຮູ້​ຢູ່​ໃນ​ແຈ້ງ​ການ​ສະບັບ​ໜຶ່ງ ທີ່​ມີ​ອອກ​ມາ​ເມື່ອ​ວັນ​ທີ 18 ເມສາ​ທີ່​ຜ່ານ​ມາ ວ່າ​ກຳປູເຈຍ​ໄດ້​ຢັ້ງຢືນ​ການ​ລະບາດ​ເປັນ​ເທື່ອ​ທຳ​ອິດ ຂອງ​ໄວ​​ຣັສ​ໄຂ້​ຫວັດ​ສັດ​ປີກ ສາຍ​ພັນ H5N6 ຢູ່​ໃນ​ກຳປູເຈຍ.

    OIE ອ້າງ​ຕາມ​ຂໍ້​ມູນ ທີ່​ກະຊວງ​ກະສິກຳ​ຂອງ​ກຳປູເຈຍ​ສະໜອງ​ໃຫ້ ລະບຸ​ວ່າ​ໄວ​​ຣັສ ໄຂ້​ຫວັດ​ສັດ​ປີກ​ສາຍ​ພັນ H5N6  ປະກົດ​ໃຫ້​ເຫັນ​ຢູ່​ໃນ​ສັດ​ປີກ ຢູ່​ໃນ​ຕະຫຼາດ​ແຫ່ງ​ໜຶ່ງ ໃນ​ເມືອງ ດາ​ອຸນ​ແກ້ວ ຂຶ້ນ​ກັບ​ແຂວງ​ຕາ​ແກ້ວ (ພາກ​ໃຕ້​ກຳປູເຈຍ). ເຖິງ​ຢ່າງໃດ​ກໍ​ຕາມ OIE ບໍ່​ໄດ້​ລະບຸ​ວ່າ​ສັດ​ປີກ​ປະເພດ​ໃດ​ທີ່​ຕິດ​ໄວ​​ຣັສ​ດັ່ງກ່າວ.

    ແຈ້ງ​ການ​ໃຫ້​ຮູ້​ວ່າ ສະ​ຖາ​ບັນ  Pasteur  ກວດ​ພົບ​ໄວ​​ຣັສ​ໄຂ້​ຫວັດ​ສັດ​ປີກ ສາຍ​ພັນ H5N6 ເມື່ອ​ທ້າຍ​ເດືອນ​ມີນາ​ທີ່​ຜ່ານ​ມາ. ໃນ​ຂະນະ​ດຽວ​ກັນ ເຈົ້າ​ໜ້າທີ່​ຂອງ​ກຳປູເຈຍ ກໍ​ໄດ້​ເພີ່ມ​ທະວີ​ການເຄື່ອນໄຫວ​ຕິດຕາມ​ກວດກາ ແລະ ສ້າງ​ເຂດ​ປ້ອງ​ກັນ​ຢູ່​ອ້ອມແອ້ມ​ເຂດ​ທີ່​ກວດ​ພົບ​ໄຂ້​ຫວັດ​ສັດ​ປີກ ເພື່ອ​ສະ​ກັກ​​​ກັ້ນ​ການ​ແຜ່​ລາມ​ຂອງ​ພະຍາດ.

ຂ່າວທີ່ກ່ຽວຂ້ອງ