ຂ່າວຫຼ້າສຸດ

ຕຳຫຼວດ​ອັງກິດ ຈັບ​ກຸມ​ນັກ​ເຄື່ອນ​ໄຫວ​ຕ້ານ​ການ​ປ່ຽນແປງ​ສະພາບ​ດິນ​ຟ້າ​ອາກາດ

305 23 ມ.ສ. 2019 ຂ່າວຕ່າງປະເທດ
ຕຳຫຼວດ​ອັງກິດ ຈັບ​ກຸມ​ນັກ​ເຄື່ອນ​ໄຫວ​ຕ້ານ​ການ​ປ່ຽນແປງ​ສະພາບ​ດິນ​ຟ້າ​ອາກາດ

  ຕຳຫຼວດ​ອັງກິດ ແຈ້ງ​ໃຫ້​ຮູ້ເມື່ອ​ວັນ​ທີ 20 ເມສາ​ນີ້​ວ່າ ໄດ້​ຈັບ​ກຸມ​ນັກ​ເຄື່ອນ​ໄຫວ​ຕ້ານ​ການ​ປ່ຽນແປງ​ສະພາບ​ດິນ​ຟ້າ​ອາກາດ ຈຳນວນ 700 ກວ່າ​ຄົນ ທີ່​ດຳເນີນ​ການ​ປະ​ທ້ວງ​ເຮັດ​ໃຫ້​ເກີດ​ການ​ກີດຂວາງ​ການ​ການ​ຄົມມະນາຄົມ ຢູ່​ຕາມ​ເສັ້ນທາງ​ຫຼາຍ​ສາຍ​ໃນ​ນະຄອນຫຼວງ​ລອນ​ດອນ ໃນ​ຕອນ​ເຊົ້າ​ຂອງ​ວັນ​ດຽວ​ກັນ.

    ຕຳຫຼວດ​ໃນ​ນະຄອນຫຼວງ​ລອນ​ດອນ ແຈ້ງ​ໃຫ້​ຮູ້​ຢູ່​ໃນ​ຖະແຫຼງການ​ສະບັບ​ໜຶ່ງ​ວ່າ ນັບ​ແຕ່​ຕົ້ນ​ອາທິດ​ທີ່​ຜ່ານ​ມາ ຮອດ​ເວລາ 10 ໂມງ​ເຊົ້າ​ຂອງ​ວັນ​ທີ 20 ເມສາ ໄດ້​ມີ​ຜູ້​ຖືກ​ຈັບ​ກຸມ 718 ຄົນ ແລະ​ໃນ​ນັ້ນ​ມີ​ຜູ້​ຖືກ​ກ່າວ​ຫາ​ໄປ​ແລ້ວ 28 ຄົນ.

    ການ​ປະ​ທ້ວງ​ດັ່ງກ່າວ ຈັດ​ຂຶ້ນ​ໂດຍ​ຂະ​ບວນ​ການ Extinction Rebellion (ລຸກ​ຮື​ຂຶ້ນ​ຕ້ານ​ກັບ​ການ​ສູນພັນ) ເພື່ອ​ຫັນ​ຄວາມ​ສົນໃຈ​ຂອງ​ປວງ​ຊົນ ໄປ​ທີ່​ບັນຫາ​ທີ່​ພົວພັນ​ເຖິງ​ສະພາບ​ດິນ​ຟ້າ​ອາກາດ ແລະ ​ລະບົບ​ນິເວດ ກໍ​ຄື​ປະຕິກິລິຍາ​ທີ່​ຊັກ​ຊ້າ​ຂອງ​ລັດຖະບານ​ປະເທດ​ຕ່າງໆ​ທົ່ວ​ໂລກ ຕໍ່​ສະພາບ​ການ​ທີ່​ອຸ່ນ​ຫະ​ພູມ ແລະ ​ລະດັບ​ນ້ຳ​ທະເລ​ເພີ່ມ​ຂຶ້ນ ຍ້ອນ​ການ​ປ່ອຍ​ແກ​​ັສ ເຮັດ​ໃຫ້​ເກີດ​ປະກົດ​ການເຮືອນ​ແກ້ວ.

    ນັບ​ແຕ່​ຕົ້ນ​ອາທິດ​ທີ່​ຜ່ານ​ມາ ບັນດາ​ຜູ້​ປະ​ທ້ວງ​ໄດ້​ກີດ​ກັນ​ການ​ຄົມມະນາຄົມ ຢູ່​ໃນ​ສະຖານທີ່​ຕ່າງໆ ໃນ​ນະຄອນຫຼວງ​ລອນ​ດອນ ໂດຍ​ທີ່​ຜູ້​ປະ​ທ້ວງ​ໄດ້​ນຳ​ຂໍ້​ສະເໜີ​ອອກ​ມາ ສາມ​ຂໍ້ ນັ້ນ​ກໍ​ຄື​ຕ້ອງ “ເວົ້າ​ຄວາມ​ຈິງ” ກ່ຽວ​ກັບ​ຂະໜາດ​ຂອງ​ວິ​ກິດ​ການ​ທີ່​ໂລກ​ພວມ​ປະ​ເຊີນ​ຢູ່; ອັງກິດ​ຕ້ອງ​ປະກາດ​ໃຊ້​ບັນດາ​ນະໂຍບາຍ​ທີ່​ມີ​ການ​ຜູກ​ມັດ​ໃນ​ດ້ານ​ນິຕິ​ກຳ ເພື່ອ​ຫຼຸດຜ່ອນ​ປະລິມານ​ການ​ປ່ອຍ​ແກ​​ັສ​ກາກ​ບອນ ລົງ​ສູ່​ລະດັບ 0% ພາຍ​ໃນ​ປີ 2025; ແລະ​ ສ້າງຕັ້ງ​ກອງ​ປະຊຸມ​ພົນລະເມືອງ ເພື່ອ “ຕິດຕາມ​ກວດກາ​ບັນດາ​ການ​ປ່ຽນແປງ” ທີ່​ຈະ​ມີ​ຄວາມ​ຈຳເປັນ​ເພື່ອ​ບັນລຸ​ເປົ້າ​ໝາຍ​ນີ້ ອັນ​ປະກອບ​ດ້ວຍ​ບັນດາ​ຜູ້​ທີ່​ໄດ້​ຮັບ​ການ​ຄັດ​ເລືອກ ເປັນ​ຕົວ​ແທນ​ໃນ​ທົ່ວ​ປະເທດ​ອັງກິດ.

ຂ່າວທີ່ກ່ຽວຂ້ອງ