ເປົ້າ​ໝາຍ​ທີ່​ພົວພັນ​ກັບ​ເຫດການ​ລະເບີດ​ຢູ່​ໃນ​ສີ​ລັງກາ ຖືກ​ຈັບ​ໄດ້​ຫຼາຍ​ຄົນ

255 23 ມ.ສ. 2019 ຂ່າວຕ່າງປະເທດ
ເປົ້າ​ໝາຍ​ທີ່​ພົວພັນ​ກັບ​ເຫດການ​ລະເບີດ​ຢູ່​ໃນ​ສີ​ລັງກາ ຖືກ​ຈັບ​ໄດ້​ຫຼາຍ​ຄົນ

   ສື່ສານ​ໃນ​ສີ​ລັງກາ ອ້າງ​ຕາມ​ຄຳ​ເວົ້າ​ຂອງ​ເຈົ້າ​ໜ້າທີ່​ຕຳຫຼວດ ໃຫ້​ຮູ້​ວ່າ ໃນ​ວັນ​ທີ 21 ເມສາ​ນີ້ ມີ​ຜູ້​ຖືກ​ຈັບ​ໄປ​ຄຸມ​ຂັງ 13 ຄົນ ຢູ່​ໃນ​ນະຄອນຫຼວງ ໂກ​ລົມ​ໂບ ຂອງ​ສີ​ລັງກາ ໃນ​ນັ້ນ​ມີ 10 ຄົນ​ຖືກ​ສົ່ງ​ຕົວ​ໄປ​ຍັງ​ກົມ​ສືບສວນ​ສອບ​ສວນ​ທາງ​ອາຍາ.

    ບັນດາ​ເປົ້າ​ໝາຍ​ດັ່ງກ່າວ ຖືກ​ຈັບ​ກຸມ ແມ່ນ​ມີ​ການ​ພົວພັນ​ກັບ​ເຫດການ​ລະເບີດ​ຫຼາຍ​ລາຍ ທີ່​ເກີດ​ຂຶ້ນ​ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ຊຶ່ງ​ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 228 ຄົນ ແລະ​ບາດເຈັບ​ອີກ 450 ຄົນ.

    ໃນ​ວັນ​ດຽວ​ກັນ ທ່ານ ຣາ​ນີ​​ລ ວິກ​ເກຣ​ເມ​ຊິງ​ເກ ນາຍົກລັດຖະມົນຕີ​ສີ​ລັງກາ ໄດ້​ເດີນທາງ​ໄປ ຍັງ​ທີ່​ເກີດ​ເຫດ ໂດຍ​ທ່ານ​ໄດ້​ກ່າວ​ຕໍ່​ຜູ້​ສື່​ຂ່າວ​ວ່າ ເປົ້າ​ໝາຍ​ທີ່​ຖືກ​ຈັບ​ກຸມ​ທັງ​ໝົດ ລ້ວນ​ແຕ່​ເປັນ ພົນລະເມືອງ​ຂອງ​ສີ​ລັງກາ  ແລະ​ ການ​ຕາມ​ລ່າ​ຫາ​ຄົນ​ຮ້າຍ​ອື່ນໆ​ຍັງ​ສືບຕໍ່​ດຳເນີນ.

    ທາງ​ດ້ານ​ປະທານາທິບໍດີ​ສີ​ລັງກາ ມາຍ​ທຣີ​ປາ​ລາ ສິ​ຣິ​ເສນາ ໄດ້​ບົ່ງ​ຕົວ​ຄະນະ​ກຳມະການ ພິເສດ​ຂຶ້ນ​ມາ ເພື່ອ​ສືບສວນ​ສອບ​ສວນ​ເຖິງ​ເຫດການ​ທີ່​ເກີດ​ຂຶ້ນ​ດັ່ງກ່າວ. ໃນ​ຂະນະ​ດຽວ​ກັນ ລັດຖະບານ​ສີ​ລັງກາ ກໍ​ໄດ້​ປະກາດ​ພາວະ​ຫ້າມ​ສັນຈອນ​ຢູ່​ໃນ​ນະຄອນຫຼວງ ໂກ​ລົມ​ໂບ ພ້ອມ​ກັນ​ນັ້ນ ກໍ​ປິດ​ລ້ອມ​ບັນດາ​ສື່​ສັງຄົມ ແລະ ​ການ​ສົ່ງ​ຂໍ້ຄວາມ ເຊັ່ນ  Facebook ແລະ  WhatsApp ດັ່ງນີ້​ເປັນຕົ້ນ ເພື່ອ​ຫຼີກເວັ້ນ​ການ​ປ່ອຍ​ຂໍ້​ມູນ​ທີ່​ຜິດພາດ.

ຂ່າວທີ່ກ່ຽວຂ້ອງ