ຂ່າວຫຼ້າສຸດ

ມາລະຍາດການນຸ່ງຖື

2.730 22 ມ.ສ. 2019 ນານາສາລະ

    ປີ​ໃໝ່​ລາວ​ຜ່ານ​ໄປ ແຕ່​ເພື່ອນ​ຜູ້​ອ່ານ​ສ່ອງ​ແສງ​ມາ​ເລື່ອງ​ການ​ນຸ່ງ​ຖື ເວ­ລາ​ໄປ​ສົງ​ນ້ຳ​ພະ​ຢູ່​ຕາມ​ວັດ​ວາ ສາ­ສະ­ໜາ​ນັ້ນ ເຫັນ​ວ່າ​ບໍ່​ມີ​ມາ­ລະ­ຍາດ​ວ່າ​ຊັ້ນ !.

    ນຸ່ງ​ສົ້ງ​ຂາ​ສັ້ນ​ຈຳ​ກົ້ນ ໃສ່​ເສື້ອ​ຢຶດ​ບາງໆ ບາງ​ຄົນ​ກໍ​ໂຊ​ຫຼັງ ອັນ​ນີ້​ແມ່ນ​ເວົ້າ​ສຸ­ພາບ​ສະ­ຕີ​ເນີ ! ສ່ວນ​ຜູ້​ຊາຍ​ກໍ​ສົ້ງ​ຂາ​ສັ້ນ​ຄື​ກັນ...ໄປ​ເປັນ​ຄູ່​ສ່ວນ​ຫຼາຍ​ແມ່ນ​ພວກ​ມີ​ຄອບ­ຄົວ ອູ້ມ​ລູກ​ໄປ​ກໍ​ມີ ປາ­ກົດ­ການ​ນຸ່ງ​ຖື​ຂອງ​ຄົນ​ຮຸ່ນ​ໃໝ່​ເປັນ​ແນວ​ນັ້ນ ເທົ່າ​ທີ່​ສັງ­ເກດ​ຢູ່​ນະ­ຄອນ­ຫຼວງ​ວຽງ​ຈັນ ໃນ​ຕະ­ຫຼອດ​ມື້​ບຸນ­ປີ­ໃໝ່​ລາວ.

    ຜູ້​ຂຽນ​ຄິດ​ວ່າ: ນີ້​ແມ່ນ​ຂໍ້​ຂັດ​ແຍ່ງ​ໜຶ່ງ​ໃນ​ສັງ­ຄົມ ລະ­ຫວ່າງ​ຜູ້​ເຖົ້າ​ຜູ້​ແກ່​ກັບ​ຄົນ​ຮຸ່ນ​ໃໝ່.

    ແນ່­ນອນ​ການ​ເຂົ້າ​ວັດ ປູ່​ຍ່າ​ຕາ​ຍາຍ ຫຼື ວ່າ​ພໍ່​ແມ່​ເພິ່ນ​ຈະ​ແນະ­ນຳ​ເລື່ອງ​ການ​ນຸ່ງ​ຖື​ຕ້ອງ​ໃຫ້​ມິດ​ຊິດ ແລະ ຖືກ​ຕາມ​ຮີດ­ຄອງ ແຕ່​ດຽວ­ນີ້​ຄົນ​ຮຸ່ນ​ໃໝ່​ບໍ່​ຄ່ອຍ​ສົນ­ໃຈ...ແລ້ວ​ພາກ­ສ່ວນ​ກ່ຽວ­ຂ້ອງ​ທາງ​ວັດ­ທະ­ນະ­ທຳ​ຈະ​ວ່າ​ຢ່າງ­ໃດ ? ພວກ​ເຮົາ​ຕ້ອງ​ຍອມ­ຮັບ​ວ່າ​ການ­ຈັດ­ຕັ້ງ​ແກ້​ບໍ່​ຫຼ້ອນ ຫາກ​ສະ​ຖາ​ບັນ​ຄອບ­ຄົວ​ບໍ່​ເປັນ​ຕົວ​ຫຼັກ ແນະ­ນຳ​ກ່າວ​ເຕືອນ​ສະ­ມາ­ຊິກ​ໃນ​ຄອບ­ຄົວ ເລື່ອງ​ການ​ນຸ່ງ​ຖື​ເວ­ລາ​ເຂົ້າ​ວັດ​ນໍ ? ຖັດ​ມາ​ກໍ​ແມ່ນ​ການ­ຈັດ­ຕັ້ງ​ຂັ້ນ​ບ້ານ ໂດຍ​ສະ­ເພາະ ເຖົ້າ​ແກ່​ແນວ​ໂຮມ ຄູ­ບາ​ອາ­ຈານ ແລ້ວ​ຄ່ອຍ​ມາ​ເຖິງ​ການ­ຈັດ­ຕັ້ງ​ແມ່­ຍິງ ແລະ ຊາວ​ໜຸ່ມ ຄວນ​ສ້າງ​ຂະ​ບວນ​ການ​ເລື່ອງ​ການ​ນຸ່ງ​ຖື​ຕາມ​ຮີດ­ຄອງ​ໃຫ້​ຊາວ​ໜຸ່ມ-ແມ່­ຍິງ ໄດ້​ເພິ່ງ​ສັງ­ຫອນ​ວ່າ ອັນ​ໃດ​ຄວນ​ອັນ​ໃດ​ບໍ່​ຄວນ.

    ກໍ​ບໍ່​ເຖິງ​ຂັ້ນ​ວ່າ​ຢູ່​ແຕ່​ລະ​ວັດ​ມີ​ຄົນ​ຍາມ​ຕັກ­ເຕືອນ ມີ​ເຄື່ອງ­ນຸ່ງ​ໃຫ້​ເຊົ່າ​ເວ­ລາ​ຈະ​ເຂົ້າ​ວັດ​ສົງ​ພະ...ເຄັ່ງ​ຄັດ​ປານ​ນັ້ນ​ດອກ ແຕ່​ຈຳ­ເປັນ​ຜູ້​ຈັບ​ໄມ​ໂຄ​ໂຟນ ຕ້ອງ​ໄດ້​ປະ­ຊາ­ສຳ­ພັນ​ເລື່ອງ​ການ​ນຸ່ງ​ຖື​ໃຫ້​ຖືກ​ຮີດ­ຄອງ​ປະ­ເພ­ນີ...ຫາກ​ບໍ່​ແມ່ນ​ເວົ້າ​ແຕ່​ເລື່ອງ ພຸດ​ທະ​ພາ­ນິດ.

    ພວກ​ເຮົາ​ອາດ​ໄດ້​ຍິນ​ຄຳ​ວ່າ: “ເສຍ​ວັດ­ທະ­ນະ­ທຳ​ແມ່ນ​ເສຍ​ຊາດ...” ແຕ່​ເບິ່ງ​ຄື​ວ່າ​ຄົນ​ຮຸ່ນ​ໃໝ່​ຈຳ­ນວນ​ໜຶ່ງ ບໍ່​ຄ່ອຍ​ເຫັນ​ຄວາມ​ສຳ­ຄັນ​ພໍ​ປານ­ໃດ ?.

    ບໍ່​ແມ່ນ​ແຕ່​ການ​ນຸ່ງ​ຖື ຜ່ານ​ມາ​ເຮົາ​ເຄີຍ​ທ້ວງ​ກັບ​ເລື່ອງ​ຮ້ານ​ຂາຍ​ນ້ຳ​ເມົາ​ໃກ້​ວັດ ປ້າຍ​ໂຄ­ສະ­ນາ​ນ້ຳ​ເມົາ​ແປະ​ກຳ­ແພງ​ວັດ...ແຕ່​ເບິ່ງ​ຄື​ວ່າ­ການ​ແກ້​ໄຂ​ລຳ­ບາກ​ຫຼາຍ...ບາງ​ບ່ອນ​ຮ້ານ​ຂາຍ​ນ້ຳ​ເມົາ​ຕັ້ງ​ຢູ່​ກົງ­ກັນ­ຂ້າມ​ກັບ​ປະ­ຕູ​ເຂົ້າ​ວັດ ແຮ່ງ​ຂາຍ​ກໍ​ມີ​ຄົນ​ໄປ​ຫຼາຍ ຂໍ​ໂທດ​ນໍ​ການ​ເກັບ​ອາ­ກອນ​ລາຍ​ຮັບ​ອາດ​ຈະ​ດີ ແຕ່​ເບິ່ງ​ໄປ​ໃນ­ຕໍ່­ໜ້າ​ບໍ່​ຮູ້​ວ່າ​ຈະ​ແກ້​ໄດ້​ສ່ຳ​ໃດ໋ ? ບໍ່​ຕ່າງ​ຫຍັງ​ກັບ​ຫ້າມ​ບໍ່​ໃຫ້​ຕັ້ງ​ຮ້ານ​ຂາຍ​ນ້ຳ​ເມົາ​ໃກ້​ໂຮງ­ຮຽນ ການ­ຈັດ­ຕັ້ງ​ປະ­ຕິ­ບັດ​ລຳ­ບາກ​ຫຼາຍ.

    ຂໍ​ຝາກ​ຄຳ​ສ່ອງ​ແສງ​ນີ້ ໃຫ້​ເພື່ອນ​ຜູ້​ອ່ານ​ຊ່ວຍ​ຄິດ​ຫງຳ​ວ່າ​ພວກ​ເຮົາ​ຈະ​ແກ້​ແນວ­ໃດ ? ທ່ານ​ໃດ​ມີ​ຄຳ​ເຫັນ​ສະ­ເໜີ​ໃຫ້​ຂຽນ​ເຂົ້າ​ສູ່​ຄໍ​ລຳ​ພວກ​ເຮົາ ເພື່ອ​ທີ່​ຈະ​ສ້າງ​ເປັນ​ຂະ​ບວນ​ການ​ອະ­ນຸ​ຮັກ​ຮີດ­ຄອງ​ປະ­ເພ­ນີ​ຂອງ​ພວກ​ເຮົາ ປະ­ເທດ​ເຮົາ​ໃຫ້​ຍືນ​ຍົງ​ຄົງ​ຕົວ​ຢູ່​ກັບ​ຜືນ​ແຜ່ນ­ດິນ​ລາວ​ຕະ­ຫຼອດ​ໄປ.

    ຂໍ​ສະ­ເໜີ​ເປັນ​ການ​ແລກ­ປ່ຽນ ?.

ແນວ​ລາວ

ຂ່າວທີ່ກ່ຽວຂ້ອງ