ປະກາດແຕ່ງຕັ້ງ ຮອງເຈົ້າຄອງນະຄອນຫຼວງວຽງຈັນ

    ພິ­ທີ​ປະ­ກາດ​ການ­ຈັດ­ຕັ້ງ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ຜູ້​ໃໝ່ ຈັດ​ຂຶ້ນ​ວັນ​ທີ 19 ເມ­ສາ 2019 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ຮອງ​ເລ­ຂາ​ຄະ­ນະ​ພັກ ຮອງ​ເຈົ້າ​ຄອງ ຄະ­ນະ​ປະ­ຈຳ​ພັກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ທອງ ພົມ­ມະ­ຈັນ ຫົວ­ໜ້າ​ຄະ­ນະ​ຈັດ​ຕັ້ງ ນວ ໄດ້​ຜ່ານ​ຂໍ້​ຕົກ­ລົງ​ວ່າ​ດ້ວຍ​ການ​ຍົກ­ຍ້າຍ ແຕ່ງ­ຕັ້ງ​ຮອງ​ເຈົ້າ​ຄອງ ນວ ຜູ້​ໃໝ່​ວ່າ: ອີງ​ຕາມ​ຄຳ​ສັ່ງ​ຂອງ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ຄຳ​ສັ່ງ​ຂອງ​ນາ­ຍົກ­ລັດ­ຖະ­ມົນ­ຕີ ແລະ ຂໍ້​ຕົກ­ລົງ​ຂອງ​ເຈົ້າ​ຄອງ ນວ ວ່າ​ດ້ວຍ​ການ​ແຕ່ງ­ຕັ້ງ​ຮອງ​ເຈົ້າ​ຄອງ ນວ ເລກ​ທີ 0267/ຈ​ນວ ລົງ​ວັນ​ທີ 4 ເມ­ສາ 2019 ມາດ­ຕາ 19 ແລະ ມາດ­ຕາ​ທີ 20 ໝວດ​ທີ 4 ຂອງ​ກົດ­ໝາຍ​ວ່າ​ດ້ວຍ​ການ​ປົກ­ຄອງ​ທ້ອງ­ຖິ່ນ ສະ­ບັບ​ປັບ­ປຸງ ປີ 2015 ສະ­ບັບ​ເລກ​ທີ 68/ສພຊ ລົງ​ວັນ​ທີ 14 ທັນ­ວາ 2015 ວ່າ​ດ້ວຍ​ພາ­ລະ​ບົດ­ບາດ​ສິດ ແລະ ໜ້າ­ທີ່​ຂອງ​ເຈົ້າ­ແຂວງ ເຈົ້າ​ຄອງ​ນະ­ຄອນ­ຫຼວງ ໜັງ­ສື​ແຈ້ງ​ການ​ຂອງ​ຄະ­ນະ​ຈັດ​ຕັ້ງ​ສູນ​ກາງ​ພັກ ສະ­ບັບ​ເລກ​ທີ 39/ຄຈສພ ລົງ​ວັນ​ທີ 20 ກຸມ­ພາ 2019 ກ່ຽວ​ກັບ​ການ​ແຕ່ງ­ຕັ້ງ​ຮອງ​ເຈົ້າ​ຄອງ ນວ ມະ­ຕິ​ຂອງ​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ ນວ ສະ­ບັບ​ເລກ​ທີ 020/ຄປຈສປ ນວ ລົງ​ວັນ​ທີ 3 ເມ­ສາ 2019 ວ່າ​ດ້ວຍ​ການ​ຮັບ­ຮອງ​ເອົາ​ການ​ແຕ່ງ­ຕັ້ງ​ຮອງ​ເຈົ້າ​ຄອງ ນວ ໜັງ­ສື​ສະ­ເໜີ​ຂອງ​ຄະ­ນະ​ຈັດ​ຕັ້ງ ນວ ສະ­ບັບ​ເລກ​ທີ 0235/ຄຈ​ນວ ລົງ​ວັນ​ທີ 3 ເມ­ສາ 2019 ເຈົ້າ​ຄອງ ນວ ໄດ້​ຕົກ­ລົງ​ແຕ່ງ­ຕັ້ງ​ທ່ານ ອາດ​ສະ­ພັງ​ທອງ ສີ​ພັນ​ດອນ ກຳ­ມະ­ການ​ປະ­ຈຳ​ພັກ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ເປັນ​ຮອງ​ເຈົ້າ​ຄອງ ນວ.

    ໂອ­ກາດ​ນີ້ ທ່ານ​ເຈົ້າ​ຄອງ ນວ ກໍ​ໄດ້​ສະ­ແດງ​ຄວາມ​ຊົມ­ເຊີຍ​ທີ່​ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ຮັບ​ມອບ​ໝາຍ​ຈາກ​ຂັ້ນ​ເທິງ ໃຫ້​ມາ​ປະ­ຕິ­ບັດ​ໜ້າ­ທີ່​ຢູ່​ຂັ້ນ​ທ້ອງ­ຖິ່ນ ເພື່ອ​ປະ­ກອບ­ສ່ວນ​ສ້າງ­ສາ ແລະ ພັດ­ທະ­ນາ ນວ ມີ​ບາດ­ກ້າວ​ຂະ­ຫຍາຍ­ຕົວ​ຮອບ­ດ້ານ ໂດຍ​ສະ­ເພາະ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃຫ້​ມີ​ການ​ຂະ­ຫຍາຍ​ເພີ່ມ​ຂຶ້ນ ພ້ອມ​ນີ້ ຍັງ​ໄດ້​ຍົກ​ໃຫ້​ເຫັນ​ພາ­ລະ​ບົດ­ບາດ ສິດ ໜ້າ­ທີ່ ຄວາມ​ຮັບ­ຜິດ­ຊອບ​ຂອງ​ຮອງ​ເຈົ້າ​ຄອງ ນວ ຕື່ມ​ອີກ.