ວາງສີລາລຶກໂຄງການກໍ່ສ້າງສາຍສົ່ງ 500/230 ກິໂລໂວນ ອ້ອມ ນວ

532 22 ມ.ສ. 2019 ຂ່າວໜ້າ​ໜຶ່ງ
ວາງສີລາລຶກໂຄງການກໍ່ສ້າງສາຍສົ່ງ 500/230 ກິໂລໂວນ ອ້ອມ ນວ

    ພິ­ທີ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ສາຍ​ສົ່ງ 500/230 ກິ​ໂລ​ໂວນ ອ້ອມ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 19 ເມ­ສາ 2019 ຢູ່​ສະ­ຖາ­ນີ​ດົງ​ໂພ​ສີ ເມືອງ​ຫາດ​ຊາຍ​ຟອງ ໂດຍ​ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ທ່ານ ບຸນ​ປອນ ສີ​ສຸ​ລາດ ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ປະ­ທານ​ກຳ­ມາ​ທິ​ການ​ເສດ­ຖະ­ກິດ ເຕັກ​ໂນ​ໂລ​ຊີ ແລະ ສິ່ງ­ແວ­ດລ້ອມ ທ່ານ​ນາງ ບຸນ​ຄຳ ວໍ­ລະ​ຈິດ ຮອງ​ລັດ­ຖະ­ມົນ­ຕີ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ທ່ານ Yu Jun ປະ­ທານ​ບໍ­ລິ­ສັດ China Electric Power Equipment and Technology Ltd (CCPG) ພ້ອມ​ດ້ວຍ​ພາກ­ສ່ວນ​ກ່ຽວ ຂ້ອງ​ເຂົ້າ​ຮ່ວມ.

    ທ່ານ ບຸນ​ອູ້ມ ສີ​ວັນ­ເພັງ ຜູ້­ອຳ­ນວຍ­ການ​ໃຫຍ່​ລັດ​ວິ​ສາ​ຫະ​ກິດ​ໄຟ­ຟ້າ​ລາວ (ຟຟລ) ກ່າວ​ວ່າ: ຊຸມ​ປີ­ຜ່ານ­ມາ ຟຟລ ໄດ້​ສຸມ​ຄວາມ​ພະ­ຍາ­ຍາມ ແລະ ຕັ້ງ­ໜ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ ເພື່ອ​ພັດ­ທະ­ນາ​ອຸດ­ສາ­ຫະ­ກຳ​ພະ­ລັງ­ງານ​ໄຟ­ຟ້າ ຕາມ​ແນວ­ທາງ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ​ຂອງ​ພັກ ລວມ​ມີ​ບັນ­ດາ​ໂຄງ­ການ​ແຜນ​ງານ​ໃຫຍ່ໆ​ທີ່​ສຳ­ຄັນ ແລະ ເປັນ​ລະ­ບົບ​ຄົບ​ຊຸດ ສາ­ມາດ​ບັນ­ລຸ​ຜົນ­ສຳ­ເລັດ​ທີ່​ມີ​ລັກ­ສະ­ນະ​ພົ້ນ​ເດັ່ນ ເປັນ​ພື້ນ­ຖານ​ສຳ­ຄັນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ​ຄົນ​ຂອງ​ຊາດ ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ບັນ­ດາ­ເຜົ່າ​ຢ່າງ​ຕັ້ງ­ໜ້າ ໂຄງ­ການ​ກໍ່­ສ້າງ​ສາຍ​ສົ່ງ 500/230 ກິ​ໂລ​ໂວນ ອ້ອມ ນວ ເປັນ​ໂຄງ­ການ​ໜຶ່ງ​ທີ່​ນອນ​ຢູ່​ໃນ​ແຜນ​ພັດ­ທະ­ນາ​ລະ­ບົບ​ໄຟ­ຟ້າ​ຂອງ ສປປ ລາວ ເພື່ອ​ນຳ​ເອົາ​ພະ­ລັງ­ງານ​ຈາກ​ເຂື່ອນ​ຕ່າງໆ​ມາ​ສະ­ໜອງ​ໃຫ້ ນວ ໃນ​ປັດ­ຈຸ­ບັນ ແລະ ການ​ຂະ­ຫຍາຍ­ຕົວ​ໃນ​ອະ­ນາ­ຄົດ​ໃຫ້​ພຽງ­ພໍ ແລະ ມີ​ສະ­ຖຽນ​ລະ​ພາບ ນອກ​ນີ້ ຍັງ​ເປັນ​ສາຍ​ສົ່ງ​ເຊື່ອມ​ຕໍ່​ກັບ​ປະ­ເທດ​ໄທ ເພື່ອ​ນຳ​ສົ່ງ​ພະ­ລັງ­ງານ​ອອກ​ໄປ​ສູ່​ຕ່າງ­ປະ­ເທດ​ອີກ​ດ້ວຍ ໂຄງ­ການ​ດັ່ງ­ກ່າວ​ຢູ່​ໃນ​ການ​ຄຸ້ມ​ຄອງ​ຂອງ 4 ເມືອງ 1 ນະ­ຄອນ ຄື: ປາກ​ງື່ມ ໄຊ​ທາ­ນີ ໄຊ​ເຊດ​ຖາ ຫາດ​ຊາຍ​ຟອງ ແລະ ນວ.

    ສຳ­ລັບ​ໜ້າ​ວຽກ​ປະ­ກອບ​ມີ ການ​ກໍ່­ສ້າງ​ສາຍ​ສົ່ງ 500 ກິ​ໂລ​ໂວນ ວົງ​ຈອນ​ຄູ່​ຈາກ​ສະ­ຖາ­ນີ​ດ່ານ​ຊີ-ສະ­ຖາ­ນີ​ດົງ​ໂພ​ສີ ຍາວ 53,5 ກິ­ໂລ­ແມັດ ເປັນ​ລະ­ບົບ 4 ສາຍ​ຕໍ່ Phase ມີ​ສາຍ​ສື່­ສານ ແລະ ສາຍ​ຫຼໍ່​ຟ້າ ຂະ­ໜາດ 36 Core ກໍ່­ສ້າງ​ສາຍ​ສົ່ງ 230 ກິ​ໂລ​ໂວນ ວົງ​ຈອນ​ຄູ່​ຈາກ​ສະ­ຖາ­ນີ​ນາ​ບົງ-ສະ­ຖາ­ນີ​ດົງ​ໂພ​ສີ ຍາວ 39 ກິ­ໂລ­ແມັດ ຂະ­ຫຍາຍ​ສະ­ຖາ­ນີ 500 ກິ​ໂລ​ໂວນ ດ່ານ​ຊີ 2 ເບ ຂະ­ຫຍາຍ​ສະ­ຖາ­ນີ 500 ກິ​ໂລ​ໂວນ ນາ​ບົງ 2 ເບ ຂະ­ຫຍາຍ​ສະ­ຖາ­ນີ 230 ກິ​ໂລ​ໂວນ ນາ​ບົງ 2 ເບ ຂະ­ຫຍາຍ​ສະ­ຖາ­ນີ 230 ກິ​ໂລ​ໂວນ ດົງ​ໂພ​ສີ 2 ເບ ລວມ​ທັງ​ຕິດ​ຕັ້ງ​ໝໍ້​ແປງ​ກຳ­ລັງ 200/200/60 MVA (230/115/22Kv) 2 ໜ່ວຍ ກໍ່­ສ້າງ 2 ເບ 115 ກິ​ໂລ​ໂວນ ອອກ​ຈາກ​ໝໍ້​ແປງ​ກຳ­ລັງ 2 ເບ ຢູ່​ສະ­ຖາ­ນີ​ດົງ​ໂພ​ສີ ແລະ ພາກ 22 ກິ​ໂລ​ໂວນ ຕິດ​ຕັ້ງ Shunt Reactor 4 ຊຸດ ຢູ່​ສະ­ຖາ­ນີ​ດົງ​ໂພ​ສີ.

ຂ່າວທີ່ກ່ຽວຂ້ອງ