ກຳນົດດັດຊະນີຄຸນນະພາບອາກາດ 7 ລະດັບການແຈ້ງເຕືອນ

541 22 ມ.ສ. 2019 ຂ່າວໜ້າ​ໜຶ່ງ

    ອີງ​ຕາມ​ແຈ້ງ​ການ​ເລກ​ທີ 0401/ສທ ລົງ​ວັນ​ທີ 9 ເມ­ສາ 2019 ເລື່ອງ​ການ​ໃຊ້​ດັດ­ຊະ­ນີ​ຄຸນ​ນະ​ພາບ​ອາ­ກາດ ເພື່ອ​ລາຍ​ງານ ແລະ ຕິດ­ຕາມ​ຜົນ​ກະ­ທົບ​ຕໍ່​ສຸ­ຂະ­ພາບ​ທີ່​ເກີດ​ຈາກ​ມົນ​ລະ​ພິດ​ທາງ​ອາ­ກາດ ອີງ​ຕາມ​ການ​ແຈ້ງ​ຂ່າວ​ສະ­ພາບ​ມົນ​ລະ​ພິດ​ທາງ​ອາ­ກາດ ຂອງ​ຫ້ອງ­ການ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ກ່ຽວ​ກັບ​ຜົນ​ການ​ວັດ­ແທກ​ຄຸນ​ນະ​ພາບ​ອາ­ກາດ ຂອງ​ສະ​ຖາ​ບັນ​ຄົ້ນ­ຄວ້າ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ​ຕະ­ຫຼອດ 24 ຊົ່ວ­ໂມງ​ໃນ​ແຕ່​ລະ​ວັນ ໄດ້​ຊີ້​ໃຫ້​ເຫັນ​ວ່າ​ຄ່າ​ຝຸ່ນ​ລະ­ອອງ 2.5 ໄມ​ຄອນ ຫຼື ພີ​ເອັມ 2.5 (PM 2.5) ສູງ​ກວ່າ​ມາດ­ຕະ­ຖານ​ໃນ​ບາງ​ເວ­ລາ​ຂອງ​ແຕ່​ລະ​ວັນ ໂດຍ​ສະ­ເພາະ​ໃນ​ຕອນ​ທ່ຽງ ແລະ ຕອນ​ບ່າຍ.

    ກະ­ຊວງ​ສາ­ທາ­ລະ­ນະ​ສຸກ ຂໍ​ແຈ້ງ​ໃຫ້​ບັນ­ດາ​ທ່ານ​ຊາບ​ວ່າ: ເພື່ອ​ງ່າຍ​ໃນ​ການ​ລາຍ​ງານ ແລະ ຕິດ­ຕາມ​ຜົນ​ກະ­ທົບ​ຕໍ່​ສຸ­ຂະ­ພາບ​ທີ່​ເກີດ​ຈາກ​ມົນ​ລະ​ພິດ​ທາງ​ອາ­ກາດ ໂດຍ​ເປັນ​ເອ­ກະ​ພາບ​ກັບ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ແລະ ພາກ­ສ່ວນ​ກ່ຽວ­ຂ້ອງ ວັນ​ທີ 18 ມີ­ນາ 2019 ໄດ້​ຕົກ­ລົງ​ເຫັນ​ດີ​ກຳ­ນົດ​ດັດ­ຊະ­ນີ​ຄຸນ​ນະ​ພາບ​ອາ­ກາດ​ຄື: ດັດ­ຊະ­ນີ​ຄຸນ​ນະ​ພາບ​ອາ­ກາດ​ແບ່ງ​ເປັນ 7 ລະ­ດັບ​ການ​ແຈ້ງ​ເຕືອນ ໂດຍ​ໃຊ້​ສີ​ເປັນ​ສັນ­ຍະ­ລັກ ຄື: ຄະ­ແນນ​ແຕ່ 0-300 ໂດຍ​ດັດ­ຊະ­ນີ​ຄຸນ​ນະ​ພາບ​ອາ­ກາດ 100 ມີ­ຄ່າ​ທຽບ​ເທົ່າ​ຄ່າ​ມາດ­ຕະ­ຖານ​ຄຸນ​ນະ​ພາບ​ອາ­ກາດ​ໃນ​ບັນ­ຍາ­ກາດ​ທົ່ວ​ໄປ ຖ້າ​ດັດ­ຊະ­ນີ​ຄຸນ​ນະ​ພາບ​ອາ­ກາດ​ສູງ​ກວ່າ 100 ສະ­ແດງ​ວ່າ​ຄ່າ​ຄວາມ​ເຂັ້ມ​ຂຸ້ນ​ຂອງ​ມົນ​ລະ​ພິດ​ທາງ​ອາ­ກາດ​ເກີນ​ມາດ­ຕະ­ຖານ.

    ລະ­ດັບ​ແຈ້ງ​ເຕືອນ​ຄ່າ​ດັດ­ຊະ­ນີ​ຄຸນ​ນະ​ພາບ​ອາ­ກາດ 0-25 ແມ່ນ​ດີ​ຫຼາຍ​ຕໍ່​ສຸ­ຂະ­ພາບ ໃຊ້​ສັນ­ຍະ­ລັກ​ສີ­ຟ້າ 26-50 ດີ​ຕໍ່​ສຸ­ຂະ­ພາບ ສັນ­ຍະ­ລັກ​ສີ­ຂຽວ 51-100 ດີ​ປານ​ກາງ​ຕໍ່​ສຸ­ຂະ­ພາບ ສັນ­ຍະ­ລັກ​ສີ­ເຫຼືອງ 101-150 ເລີ່ມ​ມີ​ຜົນ​ກະ­ທົບ​ຕໍ່​ສຸ­ຂະ­ພາບ ໂດຍ​ສະ­ເພາະ​ປະ­ຊາ­ຊົນ​ທົ່ວ​ໄປ ແລະ ກຸ່ມ​ທີ່​ມີ​ຄວາມ​ສ່ຽງ ສັນ­ຍະ­ລັກ​ສີ​ສົ້ມ 151-200 ມີ​ຜົນ​ກະ­ທົບ​ຕໍ່​ສຸ­ຂະ­ພາບ​ໃສ່​ປະ­ຊາ­ຊົນ​ທົ່ວ​ໄປ ແລະ ກຸ່ມ​ທີ່​ມີ​ຄວາມ​ສ່ຽງ ສັນ­ຍະ­ລັກ​ສີ​ອິດ 201-300 ມີ​ຜົນ​ກະ­ທົບ​ໃສ່​ສຸ­ຂະ­ພາບ​ຫຼາຍ​ໃສ່​ປະ­ຊາ­ຊົນ​ທົ່ວ​ໄປ ແລະ ກຸ່ມ​ທີ່​ມີ​ຄວາມ​ສ່ຽງ ສັນ­ຍະ­ລັກ​ສີ​ຕັບ​ໝູ ແລະ ຫຼາຍ​ກວ່າ 300 ມີ​ຜົນ​ກະ­ທົບ​ໃສ່​ສຸ­ຂະ­ພາບ​ຮ້າຍ​ແຮງ​ໃສ່​ປະ­ຊາ­ຊົນ​ທົ່ວ​ໄປ ແລະ ກຸ່ມ​ທີ່​ມີ​ຄວາມ​ສ່ຽງ ສັນ­ຍະ­ລັກ​ສີ­ແດງ.

ຂ່າວທີ່ກ່ຽວຂ້ອງ