ອູແກຣນ ຖອນອອກຈາກຂໍ້ຕົກລົງກ່ຽວກັບມາດຖານອາວຸດກັບ SNG

248 22 ມ.ສ. 2019 ຂ່າວຕ່າງປະເທດ
ອູແກຣນ ຖອນອອກຈາກຂໍ້ຕົກລົງກ່ຽວກັບມາດຖານອາວຸດກັບ SNG

    ສະພາ​ລັດຖະມົນຕີ​ຂອງ​ອູ​ແກຣນ ມີ​ການ​ຕົກລົງ​ອອກ​ມາ​ເມື່ອ​ວັນ​ທີ 17 ເມສາ​ນີ້ ວ່າ​ດ້ວຍ​ການ​ໃຫ້​ເປັນ​ໂມຄະ ສຳລັບ​ຂໍ້​ຕົກລົງ​ເມື່ອ​ປີ 1995 ລະຫວ່າງ​ອູ​ແກຣນ ກັບ​ບັນດາ​ປະເທດ ສະມາຊິກ​ປະຊາ​ຄົມ​ບັນດາ​ລັດ​ເອກະລາດ (SNG) ກ່ຽວ​ກັບ​ມາດຖານ​ອາວຸດ ແລະ ຍຸດ​ໂທ​ປະກອນ ການ​ທະຫານ.

     ກະຊວງ​ການ​ຕ່າງປະເທດ​ອູ​ແກຣນ ໄດ້​ຮັບ​ມອບ​ໜ້າທີ່ ໃນ​ການ​ແຈ້ງ​ການ​ຕົກລົງ​ດັ່ງກ່າວ ໄປ​ຍັງ​ຄະນະ​ກຳມະການ​ບໍລິຫານ​ງານ​ຂອງ SNG. ໃນ​ໃບ​ສະເໜີ​ນັ້ນ ໄດ້​ຊີ້​ແຈງ​ເຖິງ​ເຫດຜົນ ຂອງ​ການ​ຕົກລົງ​ດັ່ງກ່າວ ກໍ​ແມ່ນ​ວ່າ​ອູ​ແກຣນ ຫັນ​ໄປ​ສູ່​ບັນດາ​ມາດຖານ​ຂອງ​ອົງການ ສົນທິສັນຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO) ໃນ​ຂົງເຂດ​ອາວຸດ ແລະ ຍຸດ​ໂທ​ປະກອນ​ການ​ທະຫານ.

    ທ່ານ ສະ​ເຕ​ປານ ກູ​ບິບ ຮອງ​ນາຍົກລັດຖະມົນຕີ​ຜູ້​ທີ​ໜຶ່ງ ທັງ​ເປັນ​ລັດຖະມົນຕີ ພັດທະນາ​ເສດຖະກິດ ແລະ ​ການ​ຄ້າ​ຂອງ​ອູ​ແກຣນ ເວົ້າ​ວ່າ ໃນ​ຕົວ​ຈິງ​ແລ້ວ ຂໍ້​ຕົກລົງ​ດັ່ງກ່າວ ບໍ່​ໄດ້​ຮັບ​ການ​ປະຕິບັດ​ຢູ່​ໃນ​ອູ​ແກຣນ ຍ້ອນ​ວ່າ​ເປັນ​ການ​ນຳ​ໃຊ້​ມາດຖານ GOST (ຂອງ ສະຫະພາບ​ໂຊ​ວຽດ ແລະ ​ຣັດ​ເຊຍ ໃນ​ທຸກ​ວັນ​ນີ້) ຊຶ່ງ​ໃນ​ປັດຈຸບັນ ອູ​ແກຣນ ໄດ້​ຍົກເລີກ​ມາດຖານ  GOST ນັ້ນ​ໄປ​ແລ້ວ 90% ແລະ​ ແທນ​ທີ່​ດ້ວຍ​ມາດຖານ​ເອີ​ຣົບ. ຄຽງ​ຄູ່​ກັນ​ນັ້ນ ລັດ​ຖະ​ທຳ​ມະນູນ​ຂອງ​ອູ​ແກຣນ ກໍ​ໄດ້​ກຳນົດ​ເຖິງ​ທິດ​ທາງ​ຍຸດ​ທະ​ສາດ ການ​ເຂົ້າ​ຮ່ວມ NATO ແລະ ອູ​ແກຣນ ຈະ​ຫັນ​ສູ່​ມາດຖານ​ຂອງ NATO ໃນ​ຂົງເຂດ​ອາວຸດ ແລະ ​ຍຸດ​ໂທ​ປະກອນ​ການ​ທະຫານ.

    ຫຼັງ​ຈາກ​ເກີດ​ການ​ປ່ຽນແປງ​ທາງ​ດ້ານ​ການເມືອງ ເມື່ອ​ປີ 2014 ການ​ນຳ​ໃໝ່​ຂອງ​ອູ​ແກຣນ ໄດ້​ປະກາດ​ເຖິງ​ການ​ເລີ່ມ​ຕົ້ນ​ຂະ​ບວນ​ການ​ອອກ​ໄປ​ຈາກ SNG ໂດຍ​ປະທານາທິບໍດີ​ອູ​ແກຣນ ເປ​ໂຕຣ ໂປ​ໂຣ​ເຊນ​ໂກ ໄດ້​ລົງ​ນາມ​ໃນ​ດຳລັດ ວ່າ​ດ້ວຍ​ການ​ຢຸດຕິ​ການເຄື່ອນໄຫວ​ຂອງ​ອູ​ແກຣນ ຢູ່​ໃນ​ບັນດາ​ອົງການ​ດ້ານ​ລະບຽບ​ການ​ຂອງ  SNG ຢ່າງ​ສິ້ນ​ເຊີງ. ນັບ​ແຕ່​ຕົ້ນ​ປີ 2019 ເປັນຕົ້ນ​ມາ ສະພາ​ລັດຖະມົນຕີ​ອູ​ແກຣນ ໄດ້​ຢຸດຕິ​ຜົນ​ສັກສິດ​ຂອງ​ເອກະສານ 3 ສະບັບ ກ່ຽວ​ກັບ​ການ​ຮ່ວມ​ມື ທາງ​ດ້ານ​ເສດຖະກິດ​ຢູ່​ໃນ​ຂອບ SNG ນັ້ນ​ກໍ​ຄື​ຂໍ້​ຕົກລົງ​ກ່ຽວ​ກັບ​ການ​ແລກປ່ຽນ​ຂໍ້​ມູນ​ຂ່າວສານ ທາງ​ດ້ານ​ເສດຖະກິດ  ຂໍ້​ຕົກລົງ​ກ່ຽວ​ກັບ​ການ​ແລກປ່ຽນ​ຂໍ້​ມູນ​ຂ່າວສານ ໃນ​ຂົງເຂດ​ເສດຖະກິດ ກັບ​ຕ່າງປະເທດ ແລະ ຂໍ້​ຕົກລົງ​ກ່ຽວ​ກັບ​ການ​ຮ່ວມ​ມື​ໃນ​ການເຄື່ອນໄຫວ​ເສດຖະກິດ​ກັບ​ຕ່າງປະເທດ.

ຂ່າວທີ່ກ່ຽວຂ້ອງ