EU ປະກາດລາຍການສິນຄ້າຂອງ ສ ອາເມຣິກາ ທີ່ອາດຈະຖືກເກັບພາສີ

171 22 ມ.ສ. 2019 ຂ່າວຕ່າງປະເທດ
EU ປະກາດລາຍການສິນຄ້າຂອງ ສ ອາເມຣິກາ ທີ່ອາດຈະຖືກເກັບພາສີ

    ວັນ​ທີ 17 ເມສາ​ນີ້ ຄະນະ​ກຳມະການ​ເອີ​ຣົບ (EC) ໄດ້​ປະກາດ​ລາຍການ​ສິນຄ້າ​ນຳ​ເຂົ້າ ມາ​ຈາກ ສ ອາ​ເມ​ຣິ​ກາ ທີ່​ອາດ​ຈະ​ຖືກ​ເກັບ​ພາສີ ເປັນ​ມູນ​ຄ່າ​ລວມ  20 ຕື້​ໂດ​ລາ​ສະຫະລັດ ໂດຍ​ເລີ່ມ​ມາ​ຈາກ​ການ​ຖົກ​ຖຽງ​ລະຫວ່າງ​ສອງ​ຝ່າຍ ກ່ຽວ​ກັບ​ນະໂຍບາຍ​ອູດ​ໜູນ ໃຫ້​ແກ່​ບັນດາ ຜູ້​ປະກອບ​ການ​ຜະລິດ​ເຮືອບິນ.

    ເມື່ອ​ອາທິດ​ທີ່​ຜ່ານ​ມາ ອຳນາດ​ການ​ປົກຄອງ​ຂອງ ສ ອາ​ເມ​ຣິ​ກາ ໄດ້​ປະກາດ​ລາຍການ​ສິນຄ້າ ຂອງ​ສະຫະພາບ​ເອີ​ຣົບ (EU) ທີ່​ຖືກ ສ ອາ​ເມ​ຣິ​ກາ ເກັບ​ພາສີ​ເພີ່ມ​ເຕີມ ໃນ​ນັ້ນ​ມີ​ຕັ້ງແຕ່​ເຮືອບິນ​ການ​ຄ້າ​ຂະໜາດ​ໃຫຍ່ ໄປ​ຈົນ​ຮອດ​ຜະລິດ​ຕະ​ພັນ​ນ້ຳ​ນົມ ແລະ​ເຫຼົ້າ​ແວງ ເພື່ອ​ເປັນ​ການ​ຕອບ​ໂຕ້​ຕໍ່​ບັນດາ​ບ້ວງ​ເງິນ​ອູດ​ໜູນ​ຂອງ EU ທີ່​ຈັດ​ສັນ​ໃຫ້​ແກ່​ບໍລິສັດ​ຜະລິດ​ເຮືອບິນ ແອ​​ຣບັສ (Airbus) ໃນ​ມູນ​ຄ່າ 11 ຕື້ ໂດ​ລາ​ສະຫະລັດ (ຕາມ​ການ​ຄິດໄລ່​ຂອງ ສ ອາ​ເມ​ຣິ​ກາ).

   ລາຍການ​ສິນຄ້າ​ນຳ​ເຂົ້າ​ທີ່ EU ນຳ​ອອກ​ມາ​ເພື່ອ​ຕອບ​ໂຕ້​ຕໍ່​ການ​ກະທຳ​ຂອງ ສ ອາ​ເມ​ຣິ​ກາ ນັ້ນ​ລວມ​ມີ​ມູນ​ຄ່າ 20 ຕື້​ໂດ​ລາ​ສະຫະລັດ ອັນ​ປະກອບ​ດ້ວຍ​ຜະລິດ​ຕະ​ພັນ​ກະສິກຳ ນັບ​ຕັ້ງແຕ່​ໝາກ​ໄມ້​ແຫ້ງ ປາ ຢາສູບ ຖົງ​ຫີ້ວ ຫີບ ໄປ​ຮອດ​ຈັກ​ລາກ​ແກ່ ເອ​ລີ​ກອບ​ແຕ ແລະ ອຸປະກອນ​ການ​ຫຼິ້ນ ວີ​ດີ​ໂອ ເກມ. ລາຍການ​ສິນຄ້າ​ນີ້ ຈະ​ໄດ້​ເປີດເຜີຍ​ເພື່ອ​ທາບ​ທາມ ໄປ​ຈົນ​ຮອດ​ວັນ​ທີ 31 ພຶດສະພາ​ໜ້າ​ນີ້ ແລະ ​ຫຼັງ​ຈາກ​ນັ້ນ​ຈະ​ໄດ້​ຮັບ​ການ​ດັດແກ້.

ຂ່າວທີ່ກ່ຽວຂ້ອງ