ສປຊ ແຕ່ງຕັ້ງທູດພິເສດຊ່ວຍເຫຼືອວິກິດການຢູ່ໃນຊູດານ

67 22 ມ.ສ. 2019 ຂ່າວຕ່າງປະເທດ
ສປຊ ແຕ່ງຕັ້ງທູດພິເສດຊ່ວຍເຫຼືອວິກິດການຢູ່ໃນຊູດານ

    ທ່ານ ສະ​ເຕ​ຟານ ດູ​ຈາ​ຣິກ ໂຄສົກ​ຂອງ​ເລຂາທິການ​ໃຫຍ່​ສະຫະ​ປະຊາ​ຊາດ (​ສປຊ) ແຈ້ງ​ໃຫ້​ຮູ້​ວ່າ ເມື່ອ​ວັນ​ທີ 16 ເມສາ​ນີ້ ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່ ​ສປຊ ໄດ້​ແຕ່ງຕັ້ງ​ທ່ານ ນີ​ໂກ​ລາ​​ສ ເຮ​ຊອມ (ນັກ​ກົດໝາຍ​ຊາວ​ອາ​ຟະ​ຣິກ​ກາ​ໃຕ້) ເປັນ​ທູດ​ພິເສດ ກ່ຽວ​ກັບ​ຊູ​ດານ ເພື່ອ​ສົມທົບ​ກັບ​ສະຫະພາບ​ອາ​ຟະ​ຣິກ​ກາ (AU) ໃນ​ການ​ແກ້​ໄຂ​ວິ​ກິດ​ການ ທີ່​ເກີດ​ຂຶ້ນ​ຢູ່​ໃນ​ຊູ​ດານ.

    ກ່ອນ​ໜ້າ​ນັ້ນ ເມື່ອ​ວັນ​ທີ 15 ເມສາ​ທີ່​ຜ່ານ​ມາ AU ໄດ້​ຮຽກຮ້ອງ​ໄປ​ຍັງ​ກອງທັບ​ຊູ​ດານ ໃຫ້​ສົ່ງ​ມອບ​ອຳນາດ​ໃຫ້​ແກ່​ລັດຖະບານ​ຝ່າຍ​ພົນ​ລະ​ເຮືອນ ພາຍ​ໃນ​ເວລາ 15 ວັນ ພ້ອມ​ກັນ​ນັ້ນ AU ກໍ​ໄດ້​ກ່າວ​ປະນາມ​ຕໍ່​ການ​ທີ່​ກອງທັບ​ຊູ​ດານ ຂັບ​ໄລ່​ປະທານາທິບໍດີ ໂອ​ມາ ອາ​​ລ-ບາ​ເຊີ ອອກ​ຈາກ​ຕຳແໜ່ງ. ສະພາ​ຄວາມ​ໝັ້ນຄົງ ແລະ​ ສັນຕິພາບ​ຂອງ AU ແຈ້ງ​ເຕືອນ​ວ່າ ຈະ​ງົດ​ຖານະ​ການ​ເປັນ​ສະມາຊິກ​ຂອງ​ຊູ​ດານ ຢູ່​ໃນ AU ຖ້າ​ຫາ​ກວ່າ​ກອງ​ທຳ​ລັງ​ທະຫານ ບໍ່​ສ້າງຕັ້ງ​ລັດຖະບານ​ຝ່າຍ​ພົນ​ລະ​ເຮືອນ​ຂຶ້ນ​ມາ​ຢູ່​ໃນ​ຊູ​ດານ.

    ເຫດການ​ປ່ຽນແປງ​ທາງ​ການເມືອງ​ຢູ່​ໃນ​ຊູ​ດານ ເກີດ​ຂຶ້ນ​ເມື່ອ​ວັນ​ທີ 11 ເມສາ​ທີ່​ຜ່ານ​ມາ ຊຶ່ງ​ໃນ​ນັ້ນ ກອງທັບ​ໄດ້​ຈັບ​ກຸມ​ປະທານາທິບໍດີ ອາ​​ລ-ບາ​ເຊີ ພ້ອມ​ກັນ​ນັ້ນ​ກໍ​ປະກາດ ສ້າງຕັ້ງ​ສະພາ​ການ​ທະຫານ​ຂ້າມ​ຜ່ານ​ໃນ​ຊູ​ດານ ເພື່ອ​ບໍລິຫານ​ປະເທດ​ພາຍ​ໃນ​ເວລາ 2 ປີ.

    ຫຼ້າ​ສຸດ ແຫຼ່ງ​ຂ່າວ​ການ​ທະຫານ​ຂອງ​ຊູ​ດານ ແຈ້ງ​ໃຫ້​ຮູ້ເມື່ອ​ວັນ​ທີ 17 ເມສາ​ນີ້​ວ່າ ທ່ານ ອາ​​ລ-ບາ​ເຊີ ໄດ້​ຖືກ​ຍ້າຍ​ໄປ​ຍັງ​ຄຸກ ໂກ​ເບີ ຢູ່​ໃນ​ນະຄອນຫຼວງ ຄາ​ຕູມ ເມື່ອ​ວັນ​ທີ 16 ເມສາ ທ່າມກາງ​ທີ່ ປະຊາຊົນ​ສືບຕໍ່​ເດີນທາງ​ດ້ວຍ​ລົດ​ຂົນສົ່ງ ແລະ​ ລົດ​ບັດ ມຸ່ງ​ໜ້າ​ໄປ​ຍັງ​ນະຄອນຫຼວງ​ຄາ​ຕູມ ເພື່ອ​ເຂົ້າ​ຮ່ວມ​ການ​ປະ​ທ້ວງ​ຢູ່​ຕໍ່ໜ້າ​ສຳນັກງານ​ຂອງ​ກະຊວງ​ປ້ອງ​ກັນ​ປະເທດ.

ຂ່າວທີ່ກ່ຽວຂ້ອງ