ທ່ານນາຍົກ ຢ້ຽມຢາມພື້ນຖານການຜະລິດຢູ່ແຂວງອຸດົມໄຊ

224 19 ມ.ສ. 2019 ຂ່າວໜ້າ​ໜຶ່ງ
ທ່ານນາຍົກ ຢ້ຽມຢາມພື້ນຖານການຜະລິດຢູ່ແຂວງອຸດົມໄຊ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ຢ້ຽມ­ຢາມ​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ກຸ່ມ​ຜະ­ລິດ​ພືດ​ຜັກ​ປອດ​ສານ­ພິດ ກຸ່ມ​ຜະ­ລິດ​ຫັດ­ຖະ­ກຳ​ໄຕ​ລື້ ແລະ ໂຮງ­ງານ​ປຸງ​ແຕ່ງ​ໄມ້​ສຳ­ເລັດ​ຮູບ ລາວ​ເຊີນ ຢູ່​ເມືອງ​ໄຊ ແຂວງ​ອຸ­ດົມ​ໄຊ ໃນ​ວັນ​ທີ 13 ເມ­ສາ 2019.

    ໃນ​ເບື້ອງ​ຕົ້ນ ທ່ານ​ນາ­ຍົກ ໄດ້​ໄປ​ຢ້ຽມ­ຢາມ​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ຢູ່​ຈຸດ​ສະ­ຖາ­ນີ​ເມືອງ​ໄຊ ເຊິ່ງ​ແລວ​ທາງ​ລົດ­ໄຟ​ຜ່ານ​ແຂວງ​ອຸ­ດົມ​ໄຊ ມີ​ຄວາມ​ຍາວ 126,6 ກິ­ໂລ­ແມັດ ປະ­ກອບ​ມີ 9 ສະ­ຖາ­ນີ ແຕ່​ຈະ​ສ້າງ​ໄລ­ຍະ​ທຳ​ອິດ 3 ສະ­ຖາ­ນີ ຄື: ສະ­ຖາ­ນີ​ເມືອງ​ນາ​ໝໍ້ ສະ­ຖາ­ນີ​ເມືອງ​ໄຊ ສະ­ຖາ­ນີ​ເມືອງ​ງາ ມີ​ຂົວ 60 ແຫ່ງ ຄວາມ​ຍາວ 12,7 ກິ­ໂລ­ແມັດ ກວມ 34% ຂອງ​ຄວາມ​ຍາວ​ຂອງ​ຂົວ​ທັງ​ໝົດ ອຸ​ໂມງ 32 ແຫ່ງ ຄວາມ​ຍາວ 84,9 ກິ­ໂລ­ແມັດ ກວມ 44% ຂອງ​ຄວາມ​ຍາວ​ອຸ​ໂມງ​ທັງ​ໝົດ ການ​ກໍ່­ສ້າງ​ປະ­ກອບ​ມີ 3 ສັນ­ຍາ (3 ໄລ­ຍະ​ຮັບ​ເໝົາ) ສະ­ເພາະ​ການ​ເຈາະ​ອຸ​ໂມງ ປັດ­ຈຸ­ບັນ​ມີ​ຄວາມ​ຄືບ​ໜ້າ 49,8 ກິ­ໂລ­ແມັດ ເທົ່າ​ກັບ 58,7% ຂອງ​ຄວາມ​ຍາວ​ອຸ​ໂມງ​ທັງ​ໝົດ​ພາຍ​ໃນ​ແຂວງ ໂອ­ກາດ​ນີ້ ທ່ານ​ນາ­ຍົກ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ສຳ­ເລັດ​ທີ່​ຄະ­ນະ​ຮັບ­ຜິດ­ຊອບ ໄດ້​ເອົາ­ໃຈ­ໃສ່​ດຳ­ເນີນ​ການ​ກໍ່­ສ້າງ​ມີ​ຄວາມ​ຄືບ​ໜ້າ ເປັນ​ໄປ​ຕາມ​ແຜນ­ການ​ທີ່​ວາງ​ໄວ້ ພ້ອມ​ທັງ​ໄດ້​ເນັ້ນ​ໃຫ້​ຄະ­ນະ​ຮັບ­ຜິດ­ຊອບ​ໂຄງ­ການ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ໜ້າ­ທີ່ ແລະ ຄວາມ​ຮັບ­ຜິດ­ຊອບ​ຂອງ​ຕົນ​ໃຫ້​ມີ​ຄຸນ​ນະ​ພາບ ແລະ ມີ​ຜົນ­ສຳ­ເລັດ​ຕາມ​ແຜນ­ການ​ທີ່​ວາງ​ໄວ້.

    ຈາກ​ນັ້ນ ຄະ­ນະ​ກໍ​ໄດ້​ໄປ​ຢ້ຽມ­ຢາມ​ກຸ່ມ​ຜະ­ລິດ​ພືດ​ຜັກ​ປອດ​ສານ­ພິດ ບ້ານ​ວຽງ​ສາ ເຊິ່ງ​ກຸ່ມ​ດັ່ງ­ກ່າວ ສ້າງ​ຂຶ້ນ​ປີ 2014 ມີ​ສະ­ມາ­ຊິກ​ເບື້ອງ​ຕົ້ນ 10 ກວ່າ​ຄອບ­ຄົວ ເນື້ອ­ທີ່​ເບື້ອງ​ຕົ້ນ​ປະ­ມານ 0,5 ເຮັກ­ຕາ ປັດ­ຈຸ­ບັນ​ມີ​ສະ­ມາ­ຊິກ 40 ກວ່າ​ຄອບ­ຄົວ ເນື້ອ­ທີ່​ການ​ຜະ­ລິດ 2,5 ເຮັກ­ຕາ ຜະ­ລິດ​ພືດ​ຜັກ​ປອດ​ສານ­ພິດ​ໄດ້ 400 ກວ່າ​ໂຕນ ສ້າງ​ລາຍ​ຮັບ​ສະ­ເລ່ຍ 37 ລ້ານ​ກີບ​ຕໍ່​ຄອບ­ຄົວ​ຕໍ່​ປີ ໂດຍ​ໄດ້​ຈຳ­ໜ່າຍ​ຕາມ​ຕະ­ຫຼາດ​ທົ່ວ​ໄປ​ພາຍ​ໃນ​ແຂວງ (ແຕ່​ບໍ່​ທັນ​ພຽງ­ພໍ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ) ສຳ­ລັບ​ຝຸ່ນ​ແມ່ນ​ນຳ​ໃຊ້​ຝຸ່ນ​ຈາກ​ທຳ​ມະ​ຊາດ ເປັນ­ຕົ້ນ ຂີ້­ແກບ ມູນ​ສັດ ເສດ​ພືດ​ຜັກ ແລະ ອື່ນໆ ໂດຍ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ເນັ້ນ​ໜັກ​ໃຫ້​ສະ­ມາ­ຊິກ​ພາຍ​ໃນ​ກຸ່ມ ສືບ­ຕໍ່​ຮັກ­ສາ​ຄວາມ​ສາ­ມັກ­ຄີ​ເປັນ​ປຶກ​ແຜ່ນ ຊ່ວຍ­ເຫຼືອ​ເຊິ່ງ​ກັນ ແລະ ກັນ ເສີມ​ຂະ­ຫຍາຍ​ມູນ­ເຊື້ອ​ດຸ­ໝັ່ນ​ຂະ­ຫຍັນ​ພຽນ ເອົາ­ໃຈ­ໃສ່​ຜະ­ລິດ​ພືດ​ຜັກ​ໃຫ້​ຫຼາຍ​ຂຶ້ນ​ກວ່າ​ເກົ່າ ບໍ່​ໃຫ້​ນຳ​ໃຊ້​ສານ​ເຄ​ມີ​ເດັດ­ຂາດ ສະ­ເໜີ​ພາກ­ສ່ວນ​ທີ່​ກ່ຽວ­ຂ້ອງ​ຊ່ວຍ​ຊຸກ­ຍູ້-ສົ່ງ­ເສີມ​ປະ­ຊາ­ຊົນ​ໃຫ້​ຫຼາຍ​ກວ່າ​ເກົ່າ ເປັນ​ຂະ​ບວນ​ການ​ກວ້າງ­ຂວາງ ມີ​ຕະ­ຫຼາດ​ຈຳ­ໜ່າຍ​ທີ່​ແນ່­ນອນ ຮັບ­ປະ­ກັນ​ດ້ານ​ລາ­ຄາ ສ້າງ​ເງື່ອນ­ໄຂ​ໃຫ້​ປະ­ຊາ­ຊົນ​ມີ​ວຽກ​ເຮັດ​ງານ​ທຳ ມີ​ລາຍ​ຮັບ ແລະ ດຳ­ລົງ​ຊີ­ວິດ ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ລູກ​ຫຼານ​ໃນ​ເກນ​ອາ­ຍຸ​ໄດ້​ເຂົ້າ​ໂຮງ­ຮຽນ ບ້ານ​ເຮືອນ ກໍ​ຄື​ຊາວ​ໜຸ່ມ-ນັກ­ຮຽນ ໃຫ້​ປອດ​ຢາ​ເສບ​ຕິດ ສັງ­ຄົມ​ມີ​ຄວາມ​ສະ­ຫງົບ ຄອບ­ຄົວ​ຮັ່ງ­ມີ​ຜາ​ສຸກ ແລະ ຈະ­ເລີນ​ສີ­ວິ­ໄລ​ຂຶ້ນ​ເປັນ​ກ້າວໆ ນອກ​ນີ້ ທ່ານ​ນາ­ຍົກ​ຍັງ​ໄດ້​ມອບ​ເງິນ 20 ລ້ານ​ກີບ ເພື່ອ​ໃຫ້​ປະ­ຊາ­ຊົນ​ນຳ​ໃຊ້​ໃນ​ການ​ປັບ­ປຸງ​ລະ­ບົບ​ຊົນ­ລະ­ປະ­ທານ ເພື່ອ​ສະ­ໜອງ​ນ້ຳ​ໃຫ້​ພື້ນ​ທີ່​ທຳ​ການ​ຜະ­ລິດ.

    ຈາກ​ນັ້ນ ຄະ­ນະ​ກໍ​ໄດ້​ໄປ​ຢ້ຽມ­ຢາມ​ກຸ່ມ​ຫັດ­ຖະ­ກຳ​ໄຕ​ລື້ ບ້ານ​ປ່າ​ສັກ ທີ່​ຜະ­ລິດ​ຫັດ­ຖະ­ກຳ​ແຜ່ນ­ແພ ເປັນ­ຕົ້ນ ສິ້ນ ເສື້ອ ແພ ເກີບ ຖົງ ກະ­ເປົາ ແລະ ອື່ນໆ ໂດຍ​ສົ່ງ​ໄປ​ຂາຍ​ປະ­ເທດ​ຍີ່­ປຸ່ນ ສ ເກົາ­ຫຼີ ນອກ​ນີ້​ຍັງ​ມີ​ລູກ​ຄ້າ ນຳ­ໄປ​ຈຳ­ໜ່າຍ​ຢູ່​ແຂວງ​ຫຼວງ​ພະ​ບາງ ນະ­ຄອນ­ຫຼວງ​ວຽງ​ຈັນ ບັນ­ດາ​ແຂວງ​ອ້ອມ​ຂ້າງ ແລະ ພາຍ​ໃນ​ແຂວງ​ອຸ­ດົມ​ໄຊ ຈາກ​ນັ້ນ ຄະ­ນະ​ກໍ​ໄດ້​ໄປ​ຢ້ຽມ­ຢາມ​ໂຮງ­ງານ​ປຸງ​ແຕ່ງ​ໄມ້​ສຳ­ເລັດ​ຮູບ​ລາວ​ເຊີນ ບ້ານ​ນາ​ເລົ່າ ຕື່ມ​ອີກ.

ຂ່າວທີ່ກ່ຽວຂ້ອງ