ໄລຍະສະຫຼອງປີໃໝ່ລາວ ທົ່ວປະເທດ ມີຜູ້ເສຍຊີວິດ 37 ຄົນ ຈາກອຸບັດເຫດ

358 19 ມ.ສ. 2019 ຂ່າວໜ້າ​ໜຶ່ງ

    ສະ­ຫຼອງ​ປີ​ໃໝ່​ລາວ​ປີ​ນີ້ ມີ​ຜູ້​ເສຍ​ຊີ­ວິດ 37 ຄົນ ຈາກ​ອຸ­ບັດ​ຕິ​ເຫດ 303 ຄັ້ງ ທົ່ວ​ປະ­ເທດ: ໃນ​ໄລ­ຍະ 5 ວັນ​ອັນ­ຕະ­ລາຍ​ຂອງ​ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ພສ 2561 ແລະ ຕ້ອນ­ຮັບ​ປີ​ໃໝ່​ລາວ ພສ 2562 ແຕ່​ວັນ​ທີ 13-17 ເມ­ສາ​ທີ່​ຜ່ານ​ມາ ໃນ​ນີ້ ເກີດ​ຂຶ້ນ​ຫຼາຍ​ກວ່າ​ໝູ່​ແມ່ນ​ຢູ່​ແຂວງ​ຈຳ­ປາ​ສັກ 45 ຄັ້ງ ຮອງ​ລົງ​ມາ​ແມ່ນ​ແຂວງ​ສະ­ຫວັນ​ນະ​ເຂດ 35 ຄັ້ງ ແລະ ນະ­ຄອນ­ຫຼວງ​ວຽງ​ຈັນ 31 ຄັ້ງ.

    ເມື່ອ​ສົມ​ທຽບ​ຈຳ­ນວນ​ອຸ­ບັດ​ຕິ​ເຫດ​ທີ່​ເກີດ​ຂຶ້ນ ລະ­ຫວ່າງ​ປີ​ໃໝ່​ລາວ​ປີ​ນີ້​ກັບ​ປີ​ທີ່​ຜ່ານ​ມາ​ແມ່ນ​ເພີ່ມ​ຂຶ້ນ 16 ຄັ້ງ ແຕ່​ຈຳ­ນວນ​ຜູ້​ເສຍ​ຊີ­ວິດ ແມ່ນ​ຫຼຸດ​ລົງ 2 ຄົນ ສຳ­ລັບ​ແຂວງ​ທີ່​ມີ​ຜູ້​ເສຍ​ຊີ­ວິດ​ຫຼາຍ​ກວ່າ​ໝູ່​ໃນ​ປີ​ນີ້ ແມ່ນ​ແຂວງ​ວຽງ​ຈັນ 9 ຄົນ ແລະ ຮອງ​ລົງ​ມາ​ແມ່ນ​ນະ­ຄອນ­ຫຼວງ​ວຽງ​ຈັນ 5 ຄົນ.

    ທ່ານ​ພັທ ກອງ​ສີ ສຸ­ວັນ­ນະ​ຕຸ້ມ ຫົວ­ໜ້າ​ກົມ​ຕຳ­ຫຼວດ​ຈະ­ລາ­ຈອນ ກະ­ຊວງ​ປ້ອງ​ກັນ​ຄວາມ​ສະ­ຫງົບ ໄດ້​ຖະ­ແຫຼງ​ຂ່າວ​ຕໍ່​ສື່​ມວນ​ຊົນ ໃນ​ວັນ​ທີ 18 ເມ­ສາ​ນີ້ ທີ່​ນະ­ຄອນ­ຫຼວງ​ວຽງ​ຈັນ ວ່າ: ເຖີງ​ວ່າ​ກົມ​ຕຳ­ຫຼວດ​ຈະ­ລາ­ຈອນ ຈະ​ໄດ້​ວາງ​ມາດ​ຕະ­ການ​ຕ່າງໆ ເພື່ອ​ປ້ອງ​ກັນ​ອຸ­ບັດ​ຕິ​ເຫດ​ໃນ​ໄລ­ຍະ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ພສ 2561 ແລະ ຕ້ອນ­ຮັບ​ປີ​ໃໝ່​ລາວ ພສ 2562 ຢ່າງ​ເຂັ້ມ​ງວດ​ແລ້ວ​ກໍ່​ຕາມ ແຕ່​ກໍ່​ຍັງ​ມີ​ຜູ້​ໃຊ້​ລົດ​ໃຊ້​ຖະ­ໜົນ​ຈຳ­ນວນ​ໜຶ່ງ ທີ່​ຖື​ເບົາ​ຕໍ່​ກົດ​ລະ­ບຽບ​ຈະ­ລາ­ຈອນ ເປັນ­ຕົ້ນ: ຂັບ​ຂີ່​ລົດ​ໄວ​ເກີນ​ກຳ­ນົດ ດື່ມ​ສິ່ງ​ມຶນ­ເມົາ​ແລ້ວ​ຂັບ​ຂີ່​ພາ­ຫະ­ນະ ປ່ຽນ​ທິດ​ທາງ​ການ​ຂັບ​ຂີ່​ຢ່າງ​ກະ­ທັນ­ຫັນ ເຕັກ­ນິກ​ບໍ່​ຮັບ­ປະ­ກັນ ແຊງ​ບໍ່​ຮັບ­ປະ­ກັນ ແລະ ບໍ່​ປ່ອຍ​ສິດ​ໃຫ້​ຄົນ​ອື່ນ.

    ທ່ານ​ຫົວ­ໜ້າ​ກົມ​ຕຳ­ຫຼວດ​ຈະ­ລາ­ຈອນ ໃຫ້​ຮູ້​ຕື່ມ​ວ່າ: ໃນ​ຈຳ­ນວນ​ອຸ­ບັດ​ຕິ​ເຫດ​ທີ່​ເກີດ​ຂຶ້ນ​ທົ່ວ​ປະ­ເທດ​ຈຳ­ນວນ 303 ຄັ້ງ ຕະ­ຫຼອດ​ໄລ­ຍະ 5 ວັນ​ຂອງ​ການ​ສະ­ເຫຼີມ­ສະ­ຫຼອງ​ປີ​ໃໝ່​ລາວ ພສ 2562 ນັ້ນ ສ່ວນ​ໃຫຍ່​ແມ່ນ​ລົດ­ຈັກ​ຕຳ​ລົດ­ຈັກ104 ຄັ້ງ ນອກ​ນັ້ນ​ກໍ່​ແມ່ນ​ລົດ­ຈັກ​ຕຳ​ລົດ­ຍົນ 71 ຄັ້ງ ລົດ­ຈັກ​ລົ້ມ​ເອງ 19 ຄັ້ງ ແລະ ອື່ນໆ ສຳ­ລັບ​ບ່ອນ​ທີ່​ມັກ​ຈະ​ເກີດ​ອຸ­ບັດ​ຕິ​ເຫດ​ນັ້ນ ສ່ວນ​ໃຫຍ່​ແມ່ນ​ເກີດ​ຢູ່​ເທດ­ສະ­ບານ​ແຂວງ ແລະ ເມືອງ 245 ຄັ້ງ ແລະ ນອກ​ເທດ­ສະ­ບານ 58 ຄັ້ງ.

    ສາ­ເຫດ​ຫຼັກ​ທີ່​ເຮັດ​ໃຫ້​ມີ​ຜູ້​ໄດ້​ຮັບ​ບາດ­ເຈັບ ແລະ ເສຍ​ຊີ­ວິດ ຍ້ອນ​ຜູ້​ຂັບ​ຂີ່​ລະ­ເມີດ​ກົດ​ລະ­ບຽບ​ຈະ­ລາ­ຈອນ ເມົາ​ແລ້ວ​ຂັບ ຂັບ​ໄວ​ເກີນ​ກຳ­ນົດ ບໍ່​ໃສ່​ໝວກ​ກັນ​ກະ­ທົບ ແຊງ​ບໍ່​ຮັບ­ປະ­ກັນ ຂັບ​ຂີ່​ເປັນ​ພຶ່ງ​ເປັນ​ແພ ເຕັກ­ນິກ​ລົດ​ບໍ່​ໄດ້​ມາດ­ຕະ­ຖານ ແລະ ອື່ນໆ.

ຂ່າວທີ່ກ່ຽວຂ້ອງ