ຂ່າວຫຼ້າສຸດ

ເສັ້ນທາງໂພນທັນ-ໂນນຫວາຍ ຈະຊ່ວຍລະບາຍການສັນຈອນແອອັດ

318 19 ມ.ສ. 2019 ຂ່າວໜ້າ​ໜຶ່ງ
ເສັ້ນທາງໂພນທັນ-ໂນນຫວາຍ ຈະຊ່ວຍລະບາຍການສັນຈອນແອອັດ

    ທ່ານ ສົມ​ກຽດ ສີ​ຫາ​ລາດ ຮອງ​ຫົວ­ໜ້າ​ຄະ­ນະ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 2 ເມ­ສາ 2019 ວ່າ: ເຂດ​ເສດ­ຖະ­ກິດ​ບຶງ​ທາດ­ຫຼວງ ເປັນ​ໂຄງ­ການ​ໜຶ່ງ​ທີ່​ລັດ­ຖະ­ບານ​ລາວ ໄດ້​ເຊັນ​ສັນ­ຍາ​ກັບ​ບໍ­ລິ­ສັດ​ອະ­ສັງ­ຫາ­ລິ­ມະ​ຊັບ​ວານ​ເຜີງ​ຊຽງ​ໄຮ ສປ ຈີນ ໂດຍ​ໄດ້​ມອບ​ສິດ​ນຳ​ໃຊ້​ທີ່​ດິນ​ເນື້ອ­ທີ່ 365 ເຮັກ­ຕາ ໃຫ້​ຜູ້​ລົງ­ທຶນ​ເພື່ອ​ພັດ­ທະ­ນາ​ເປັນ​ເມືອງ​ໃໝ່​ທີ່​ທັນ​ສະ­ໄໝ ຕິດ​ພັນ​ກັບ​ການ­ທ່ອງ­ທ່ຽວ ເຊິ່ງ​ໂຄງ­ການ​ເບື້ອງ​ຕົ້ນ​ຈະ​ໄດ້​ປັບ­ປຸງ​ພື້ນ­ຖານ​ໂຄງ​ລ່າງ ໂດຍ​ສະ­ເພາະ ສ້າງ​ຖະ­ໜົນ​ຫົນ­ທາງ​ພາຍ​ໃນ​ເຂດ ແລະ ເຊື່ອມ​ຕໍ່​ໃສ່​ນອກ​ເຂດ​ອ້ອມ​ຂ້າງ​ໂຄງ­ການ​ໄຟ­ຟ້າ ນ້ຳ​ປະ­ປາ ແລະ ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ ເພື່ອ​ດຶງ​ດູດ​ການ​ລົງ­ທຶນ​ຈາກ​ພາຍ​ໃນ ແລະ ຕ່າງ­ປະ­ເທດ.

    ສະ­ເພາະ​ການ​ກໍ່­ສ້າງ​ເສັ້ນ­ທາງ​ຕັດ​ໃໝ່​ເຊື່ອມ​ຕໍ່​ລະ­ຫວ່າງ 3 ແຍກ​ໄຟ​ອຳ­ນາດ ບ້ານ​ໂພນ​ທັນ-ເສັ້ນ­ທາງ​ບ້ານ​ໂນນ​ຫວາຍ ມີ​ຈຸດ­ປະ­ສົງ​ເພື່ອ​ລະ­ບາຍ​ການ​ສັນ­ຈອນ​ພາຍ​ໃນ​ຕົວ​ເມືອງ ໃຫ້​ມີ​ຄວາມ​ສະ­ດວກ​ຫຼາຍ​ຂຶ້ນ ເຊິ່ງ​ທາງ​ດັ່ງ­ກ່າວ ຍາວ 2,6 ກິ­ໂລ­ແມັດ ກວ້າງ 36 ແມັດ ມີ 6 ຊ່ອງ​ທາງ​ສັນ­ຈອນ ປູ­ຢາງ​ອັດ​ສະ​ຟານ ໜາ 12 ຊັງ​ຕີ​ແມັດ ໂດຍ​ໃຊ້​ມາດ­ຕະ­ຖານ​ເຕັກ­ນິກ ສປ ຈີນ ໃນ​ນີ້ ມີ​ຂົວ​ໃຫຍ່ 2 ແຫ່ງ ຂົວ​ລະ­ບາຍ​ນ້ຳ 1 ແຫ່ງ ໂດຍ​ຜູ້​ພັດ­ທະ­ນາ​ເປັນ​ຜູ້​ລົງ­ທຶນ ມູນ​ຄ່າ 4 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 30,2 ຕື້​ກີບ ໃນ​ນີ້ ມູນ​ຄ່າ​ຊົດ​ເຊີຍ​ສິ່ງ​ເກີດ​ຂວາງ​ປະ­ມານ 1,5 ລ້ານ​ໂດ​ລາ ຫຼື​ປະ­ມານ 12 ຕື້​ກີບ ມູນ​ຄ່າ​ກໍ່­ສ້າງ​ເສັ້ນ­ທາງ 2,2 ລ້ານ​ໂດ​ລາ ຫຼື ປະ­ມານ 18 ຕື້​ກີບ ເຊິ່ງ​ໄດ້​ເລີ່ມ​ຕົ້ນ​ເດືອນ​ກຸມ­ພາ ເຊິ່ງ​ຈະ​ໃຫ້​ສຳ­ເລັດ ແລະ ໄຂ​ນຳ​ໃຊ້​ໃນ​ເດືອນ​ພຶດ­ສະ­ພາ 2019 ປັດ­ຈຸ­ບັນ​ໂຄງ­ການ​ມີ​ຄວາມ​ຄືບ​ໜ້າ 90% ຍັງ​ແຕ່​ການ​ປະ­ດັບ​ປະ­ດາ ເປັນ­ຕົ້ນ​ແຕ້ມ​ເສັ້ນ ແລະ ປ້າຍ​ຈະ­ລາ­ຈອນ ໄຟ​ອຳ­ນາດ ໄຟ​ເຍືອງ​ທາງ ປູກ​ດອກ​ໄມ້ ແລະ ປູກ​ຕົ້ນ­ໄມ້ 2 ຂ້າງ​ທາງ.

    ເມື່ອ​ທາງ​ເສັ້ນ​ນີ້​ສຳ­ເລັດ ຈະ​ມີ​ຜົນ​ດີ​ຫຼາຍ​ຢ່າງ​ຕໍ່​ຜູ້​ພັດ­ທະ­ນາ ແລະ ປະ­ຊາ­ຊົນ ໂດຍ​ສະ­ເພາະ ຊາວ ນວ ທີ່​ຈະ​ໄດ້​ຊົມ­ໃຊ້ ໂດຍ​ບໍ່​ໄດ້​ເສຍ​ຄ່າ ອັນ​ສຳ­ຄັນ​ແມ່ນ​ເປັນ​ການ​ລະ­ບາຍ​ການ​ສັນ­ຈອນ​ແອ​ອັດ​ຊ່ວຍ​ເສັ້ນ­ທາງ​ອື່ນ ເປັນ­ຕົ້ນ ເສັ້ນ­ທາງ​ທາດ­ຫຼວງ-ຫົວ​ຂົວ ເສັ້ນ­ທາງ​ດອນ​ນົກ​ຂຸ້ມ-ຊຽງ​ດາ ແລະ ເສັ້ນ­ທາງ​ດົງ​ຄຳ​ຊ້າງ-ໜອງ​ໄຮ ທັງ​ເປັນ​ເສັ້ນ­ທາງ​ເຊື່ອມ​ຕໍ່​ໃສ່​ຫຼາຍ​ເສັ້ນ­ທາງ ເຊັ່ນ: ເຊື່ອມ​ຕໍ່​ຫາ​ເຂດ​ພັດ­ທະ­ນາ​ອະ­ສັງ­ຫາ­ລິ­ມະ​ຊັບ​ຂອງ​ບໍ­ລິ­ສັດ​ນ້ຳ​ທາ​ກໍ່­ສ້າງ ເຊື່ອມ​ຕໍ່​ໃສ່​ເສັ້ນ­ທາງ​ດ້ານ​ຫຼັງ​ຂອງ​ສູນ​ການ​ຄ້າ​ລາວ-ໄອ​ເຕັກ ແລະ ປົກ­ຄອງ​ເມືອງ​ໄຊ​ເຊດ​ຖາ ໂດຍ​ລວມ​ແລ້ວ​ການ​ກໍ່­ສ້າງ​ທາງ​ດັ່ງ­ກ່າວ ເພື່ອ​ຊ່ວຍ​ລັດ­ຖະ­ບານ ກໍ​ຄື ນວ ລະ­ບາຍ​ລົດ​ເຂົ້າ-ອອກ​ຈາກ​ຕົວ​ເມືອງ ຖື​ວ່າ​ເປັນ​ໂຄງ­ການ​ໜຶ່ງ​ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ຜູ້​ພັດ­ທະ­ນາ​ໂຄງ­ການ​ບຶງ​ທາດ­ຫຼວງ ເຊິ່ງ​ຈະ​ໄດ້​ສະ­ເໜີ​ໃຫ້​ລັດ­ຖະ­ບານ​ຍ້ອງ­ຍໍ​ຢ່າງ​ສົມ​ກຽດ ແລະ ສະ­ເໜີ​ໃສ່​ຊື່​ຖະ­ໜົນ “ທາດ­ຫຼວງ” ເພື່ອ​ເປັນ​ສັນ­ຍະ­ລັກ.

ຂ່າວທີ່ກ່ຽວຂ້ອງ