ເບິ່ງບ້ານເຂົາເອົາບົດຮຽນ 18/04/2019

567 18 ມ.ສ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ ມາ​ເລ​ເຊຍ ວາງ​ເປົ້າ​ໝາຍ​ພັດ­ທະ­ນາ​ແຮງ​ງານ​ພາຍ​ໃນ​ປະ­ເທດ ເລື່ອງ​ກູ​ບາ ວາງ​ແນວ­ທາງ​ກ່ຽວ​ກັບ​ຄ່າ​ແຮງ​ງານ​ຄືນ­ໃໝ່ ແລະ ເລື່ອງ​ອາ​ຊຽນ​ວາງ​ແຜນ​ໃຊ້​ສະ­ກຸນ​ເງິນ​ພາຍ​ໃນ ເພື່ອ​ສົ່ງ­ເສີມ​ການ​ຄ້າ​ການ​ລົງ­ທຶນ.

    ທີ່ ມາ​ເລ​ເຊຍ: ໃນ​ໂອ­ກາດ​ວັນ​ກຳ­ມະ­ກອນ​ສາ­ກົນ (1 ພຶດ​ມະ​ພາ) ປະ­ຈຳ​ປີ​ນີ້ ທີ່​ພວມ​ຫຍັບ​ຈໍ້​ມໍ່​ມາ​ນີ້ ຈຶ່ງ​ຂໍ​ເລີ່ມ​ຄືນ​ຂ່າວ​ເກົ່າໆ ແຕ່​ທ້າຍ​ປີ 2015 ກ່ຽວ​ກັບ​ເປົ້າ​ໝາຍ​ຂອງ​ມາ​ເລ​ເຊຍ ທີ່​ຈະ​ສ້າງ​ໃຫ້​ໄດ້​ກຳ­ມະ­ກອນ​ສີ­ມື​ຈຳ­ນວນ 35% ຂອງ​ແຮງ​ງານ​ທັງ​ໝົດ ທີ່​ມີ​ໃນ​ປະ­ເທດ​ພາຍ​ໃນ​ປີ 2020 ຖ້າ​ເຮັດ​ໄດ້​ຕາມ​ເປົ້າ​ໝາຍ ມາ​ເລ​ເຊຍ ກໍ​ຈະ​ກາຍ­ເປັນ​ປະ­ເທດ​ພັດ­ທະ­ນາ​ຢ່າງ​ສົມ­ບູນ ພາຍ​ໃນ​ປີ 2020 ສະ­ຖິ­ຕິ ປີ 2015 ຊີ້​ໃຫ້​ເຫັນ​ວ່າ ມາ​ເລ​ເຊຍ ມີ­ແຮງ​ງານ​ສີ​ມີ​ພຽງ 28% ຂອງ​ຈຳ­ນວນ​ທັງ​ໝົດ 14,3 ລ້ານ​ຄົນ ນອກ­ຈາກ​ເປົ້າ​ໝາຍ​ສ້າງ ມາ​ເລ​ເຊຍ ໃຫ້​ກາຍ­ເປັນ​ປະ­ເທດ​ພັດ­ທະ­ນາ​ຢ່າງ​ສົມ­ບູນ​ແລ້ວ ແຮງ​ງານ​ສີ­ມື​ທີ່​ກວມ​ເອົາ 35% ນັ້ນ ຍັງ​ຈະ​ຊ່ວຍ​ຫຼຸດ­ຜ່ອນ​ການ​ອີງ​ອາ­ໄສ​ແຮງ​ງານ​ຕ່າງ­ປະ­ເທດ ໃນ­ຕໍ່­ໜ້າ ມາ​ເລ​ເຊຍ ຕ້ອງ­ການ​ປ່ຽນ​ແທນ​ແຮງ​ງານ​ຕ່າງ­ປະ­ເທດ ທີ່​ວ່າງ​ລົງ​ດ້ວຍ​ແຮງ​ງານ​ຄົນ​ມາ​ເລ​ເຊຍ ເອງ ທ່ານ ນາ​ສຣູ​ດິນ ຮັດ​ຊານ (Nasrudin Hassan) ຕົວ​ແທນ​ຈາກ​ພັກ PAS ໄດ້​ໃຫ້​ຄຳ​ເຫັນ​ວ່າ ການ​ເພີ່ມ​ຂຶ້ນ​ຂອງ​ແຮງ​ງານ​ຕ່າງ­ປະ­ເທດ ໃນ ມາ​ເລ​ເຊຍ ນັ້ນ​ເຮັດ​ໃຫ້​ເງິນ­ຕາ​ໄຫຼ​ອອກ​ນອກ​ປະ­ເທດ ຕົວ­ຢ່າງ ໃນ​ປີ 2019 ເງິນ​ທີ່​ໄຫຼ​ອອກ​ຕ່າງ­ປະ­ເທດ​ນັ້ນ ມີ​ສູງ​ເຖິງ 28 ຕື້​ຣິງ​ກິດ (ເກືອບ 9 ຕື້​ໂດ​ລາ​ສະ­ຫະ­ລັດ) ສະ­ຖິ­ຕິ​ເມື່ອ 5 ປີ ຫຼັງ​ບອກ​ວ່າ ຢູ່​ມາ​ເລ​ເຊຍ​ນັ້ນ ມີ­ແຮງ​ງານ​ຕ່າງ­ປະ­ເທດ ປະ­ມານ 7 ລ້ານ​ຄົນ ໃນ​ນັ້ນ ມີ​ພຽງ 2,2 ລ້ານ​ຄົນ ທີ່​ເປັນ​ແຮງ​ງານ​ຖືກ​ກົດ­ໝາຍ.

    ທີ່ ກູ​ບາ: ໃນ​ທ້າຍ​ປີ 2014 ລັດ­ຖະ­ບານ ກູ​ບາ ໄດ້​ຮັບ­ຮອງ​ເອົາ​ລະ­ບຽບ​ການ​ໃໝ່ ກ່ຽວ​ກັບ​ຄ່າ​ຈ້າງ​ທີ່​ຕ້ອງ​ໄດ້​ຮັບ​ສຳ­ລັບ​ຄົນ​ກູ​ບາ ທີ່​ເຮັດ​ວຽກ​ຢູ່​ນຳ​ບໍ­ລິ­ສັດ​ຂອງ​ຕ່າງ­ປະ­ເທດ ເຊິ່ງ​ລວມ​ມີ​ເງິນ​ຄ່າ​ແຮງ​ງານ ແລະ ເງິນ​ສະ­ຫວັດ­ດີ​ການ-ສັງ­ຄົມ ລະ­ບຽບ​ການ​ໃໝ່ ໄດ້​ກຳ­ນົດ​ໃຫ້​ໜ່ວຍ​ງານ​ຂອງ​ລັດ​ທີ່​ຮັບ­ຜິດ­ຊອບ​ວຽກ​ເຮັດ​ງານ​ທຳ ເຮັດ​ໜ້າ­ທີ່​ເຈລະ­ຈາ​ກັບ​ບໍ­ລິ­ສັດ​ຕ່າງ­ປະ­ເທດ ກ່ຽວ​ກັບ​ຄ່າ​ແຮງ​ງານ ການ​ວ່າ​ຈ້າງ ການ​ເຝິກ­ອົບ­ຮົມ​ວິ­ຊາ​ຊີບ ແລະ ການ​ປົກ​ປ້ອງ​ສິດ­ທິ​ຂອງ​ຜູ້​ອອກ­ແຮງ​ງານ ໃນ​ປີ 2013 ເງິນ­ເດືອນ​ສະ­ເລ່ຍ​ຂອງ​ພະ­ນັກ­ງານ ກູ​ບາ ແມ່ນ 471 ເປ​ໂຊ/ເດືອນ ປະ­ມານ 19 ໂດ​ລາ​ສະ­ຫະ­ລັດ ດັ່ງ­ນັ້ນ ເງິນ​ຄ່າ​ແຮງ​ງານ​ຂອງ​ຄົນ​ງານ ກູ​ບາ ທີ່​ເຮັດ​ວຽກ​ນຳ​ບໍ­ລິ­ສັດ​ຕ່າງ­ປະ­ເທດ ກໍ​ຕ້ອງ​ໄດ້​ຮັບ​ຄ່າ​ແຮງ​ງານ​ບໍ່​ຫຼຸດ​ນັ້ນ ການ​ເພີ່ມ​ອັດ­ຕາ​ຄ່າ​ແຮງ​ງານ​ນີ້ ຈະ​ຊ່ວຍ​ສົ່ງ­ເສີມ​ຜະ­ລິດ​ຕະ​ພາບ​ໃຫ້​ສູງ​ຂຶ້ນ ໂດຍ​ສະ­ເພາະ​ແມ່ນ​ໃນ​ຂະ­ແໜງ​ອຸດ­ສາ­ຫະ­ກຳ ຄາດ​ວ່າ​ແຮງ​ງານ​ກູ​ບາ​ກວ່າ 40.000 ຄົນ ທີ່​ເຮັດ​ວຽກ​ຢູ່​ນຳ​ບໍ­ລິ­ສັດ​ຕ່າງ­ປະ­ເທດ​ລົງ­ທຶນ ຫຼື ຮ່ວມ​ທຶນ​ຈະ​ໄດ້​ຮັບ​ຜົນ​ປະ­ໂຫຍດ​ຈາກ​ລະ­ບຽບ​ການ​ໃໝ່​ນີ້ ຂ່າວ​ໃຫ້​ຮູ້​ຕື່ມ​ວ່າ ກົດ­ໝາຍ​ການ​ລົງ­ທຶນ​ສະ­ບັບ​ໃໝ່​ຂອງ​ກູ​ບາ ໄດ້​ເລີ່ມ​ມີ​ຜົນ​ສັກ­ສິດ​ນັບ​ແຕ່​ເດືອນ​ມິ­ຖຸ­ນາ ປີ 2014 ເປັນ­ຕົ້ນ​ມາ.

    ທີ່ ປະ­ເທດ​ໄທ: ໃນ​ຕົ້ນ​ເດືອນ​ເມ­ສາ​ປີ​ນີ້ ໄດ້​ມີ​ກອງ​ປະ­ຊຸມ​ຜູ້​ວ່າ­ການ​ທະ­ນາ­ຄານ​ກາງ ຂອງ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ຈັດ​ຂຶ້ນ​ທີ່​ຊຽງ​ໃໝ່ ໂດຍ​ມີ​ຈຸດ­ປະ­ສົງ​ສົ່ງ­ເສີມ​ການ​ຄ້າ ແລະ ການ​ລົງ­ທຶນ ດ້ວຍ​ສະ­ກຸນ​ເງິນ​ຂອງ​ບັນ​ປະ­ເທດ​ໃນ​ອາ​ຊຽນ​ເອງ ເຊິ່ງ​ຈະ​ຊ່ວຍ​ປະ­ຢັດ​ຕົ້ນ​ທຶນ​ໃນ​ການ​ເຮັດ​ທຸ­ລະ​ກຳ ແລກ­ປ່ຽນ​ເງິນ­ຕາ​ຕ່າງ­ປະ­ເທດ ສຳ­ລັບ​ພວກ​ທຸ­ລະ​ກິດ ຂ່າວ​ບອກ​ວ່າ ທະ­ນາ­ຄານ​ກາງ­ຂອງ​ໄທ ອິນ​ໂດ​ເນ​ເຊຍ ມາ​ເລ​ເຊຍ ແລະ ຟີ​ລິບ​ປິນ ໄດ້​ລົງ​ນາມ​ສະ­ແດງ​ຄວາມ​ພ້ອມ ແລະ ເຈດ​ຈຳ­ນົງ​ໃນ​ການ​ສະ­ໜັບ­ສະ­ໜູນ ການ​ໃຊ້​ສະ­ກຸນ​ເງິນ​ທ້ອງ­ຖິ່ນ​ພາຍ​ໃນ​ອາ​ຊຽນ ເພື່ອ​ເປົ້າ​ໝາຍ​ທີ່​ກ່າວ​ມາ​ຂ້າງ​ເທິງ​ນັ້ນ.

ຂ່າວທີ່ກ່ຽວຂ້ອງ