ເສິງຕູ ເປີດຕົວລະບົບບ່ອນຈອດລົດຖີບອັດສະລິຍະ

122 18 ມ.ສ. 2019 ຫົວຂໍ້ຂ່າວອື່ນໆ

    ນະ­ຄອນ​ເສິງ​ຕູ ເມືອງ​ເອກ​ຂອງ​ມົນ­ທົນ​ເສ​ສວນ ກຽມ​ເລີ່ມ​ໃຫ້​ບໍ­ລິ­ການ​ສະ­ຖານ­ທີ່​ຈອດ​ລົດ­ຖີບ​ແບບ​ອັດ​ສະ​ລິ​ຍະ ຈັດ​ລະ­ບົບ​ການ​ຈອດ​ລົດ­ຖີບ​ແບ່ງ​ໃຫ້​ເປັນ​ລະ­ບຽບ.

    ລາຍ​ງານ​ລະ­ບຸ​ວ່າ ລະ­ບົບ​ບ່ອນ​ຈອດ​ລົດ­ຖີບ​ອັດ​ສະ​ລິ​ຍະ ໃຊ້​ພື້ນ​ທີ່​ເທິງ​ໜ້າ­ດິນ 6,8 m2 ໂດຍ​ມີ​ພື້ນ​ທີ່​ເກັບ​ລົດ­ຖີບ​ໄວ້​ໃຕ້​ດິນ​ຂະ­ໜາດ 50 m2 ເລິກ​ລົງ​ໄປ​ໃຕ້​ດິນ 9,6 m2 ສາ­ມາດ​ຮອງ​ຮັບ​ລົດ­ຖີບ​ໄດ້ 224 ຄັນ ຈາກ​ເດີມ​ທີ່​ຈຳ­ເປັນ​ຕ້ອງ​ໃຊ້​ພື້ນ​ທີ່​ເທິງ​ດິນ​ຫຼາຍ​ກວ່າ 300 m2.

    ຄະ­ນະ​ກຳ­ມະ­ການ​ດ້ານ​ການ​ຈະ­ລາ­ຈອນ​ຂອງ​ນະ­ຄອນ​ເສິງ​ຕູ ລະ­ບຸ​ວ່າ ລະ­ບົບ​ຈອດ​ລົດ­ຖີບ​ອັດ​ສະ​ລິ​ຍະ​ນີ້ ຖືກ​ຕິດ​ຕັ້ງ​ຢູ່​ໃກ້​ທາງ​ອອກ​ໝາຍ​ເລກ 2 ຂອງ​ສະ­ຖາ­ນີ​ລົດ­ໄຟ​ຟ້າ​ໃຕ້​ດິນ​ເສິງ​ຕູ ໂດຍ​ໄດ້​ເລີ່ມ​ໃຫ້​ບໍ­ລິ­ການ​ຢ່າງ​ເປັນ​ທາງ​ການ​ເມື່ອ​ທ້າຍ​ເດືອນ​ພະ­ຈິກ​ທີ່​ຜ່ານ​ມາ​ນີ້.

    ຜູ້​ໃຊ້​ງານ​ສາ­ມາດ​ເກັບ​ລົດ­ຖີບ​ດ້ວຍ​ການ​ສຳ­ຜັດ​ໜ້າ​ຈໍ ໂດຍ​ລະ­ບົບ​ຈະ​ນຳ​ລົດ­ຖີບ​ໄປ​ເກັບ​ມ້ຽນ​ໃນ​ຊັ້ນ​ໃຕ້​ດິນ​ໂດຍ​ໃຊ້​ເວ­ລາ​ບໍ່​ເຖິງ 1 ນາ­ທີ.

    ລະ­ບົບ​ດັ່ງ­ກ່າວ ໄດ້​ຮັບ​ການ​ພັດ­ທະ­ນາ​ໂດຍ​ບໍ­ລິ­ສັດ Tianjin Yuanzhuo Tech Development ເພື່ອ​ທົດ​ລອງ​ໃຫ້​ບໍ­ລິ­ການ​ໃນ​ນະ­ຄອນ​ເສິງ​ຕູ ຊຶ່ງ​ມີ​ຜູ້​ໃຊ້​ລົດ­ຖີບ​ແບບ​ແບ່ງ­ປັນ​ກັນ​ໃຊ້ 1,45 ລ້ານ​ຄັນ​ເທິງ​ທ້ອງ​ຖະ­ໜົນ.

    ຕັ້ງ­ແຕ່​ປີ 2017 ຈີນ​ໄດ້​ເລີ່ມ​ເຂົ້າ​ມາ​ຄວບ​ຄຸມ​ການ​ປະ­ກອບ​ທຸ­ລະ​ກິດ​ລົດ­ຖີບ​ແບບ​ແບ່ງ­ປັນ​ຢ່າງ​ຈິງ​ຈັງ ເພື່ອ​ພະ­ຍາ­ຍາມ​ຫຼຸດ​ຈຳ­ນວນ​ລົດ­ຖີບ ທີ່​ມີ​ຈຳ­ນວນ​ຫຼາຍ​ເກີນ​ຄວາມ​ຕ້ອງ­ການ​ຂອງ​ຕະ­ຫຼາດ ແລະ ຫຼຸດ​ບັນ­ຫາ​ການ​ຈະ­ລາ­ຈອນ​ທີ່​ເກີດ​ຂຶ້ນ ໂດຍ​ການ​ຄວບ​ຄຸມ​ບໍ່​ໃຫ້​ມີ​ການ​ເພີ່ມ​ຈຳ­ນວນ​ລົດ­ຖີບ​ແບບ​ແບ່ງ­ປັນ​ເທິງ​ທ້ອງ​ຖະ­ໜົນ ແລະ ບັງ­ຄັບ​ໃຫ້​ບໍ­ລິ­ສັດ​ເຈົ້າ​ຂອງ​ລົດ­ຖີບ ນຳ​ລົດ­ຖີບ​ທີ່​ເປ່​ເພ ຫຼື​ບໍ່​ໄດ້​ໃຊ້​ງານ​ອອກ​ຈາກ​ທ້ອງ​ຖະ­ໜົນ​ເປັນ​ປະ­ຈຳ.

    ທັ້ງ​ນີ້ ຍານ­ພາ­ຫະ­ນະ​ແບ່ງ­ປັນ ຢ່າງ​ເຊັ່ນ ລົດ­ຖີບ​ແບບ​ແບ່ງ­ປັນ ໄດ້​ຕິດ​ລະ­ບົບ​ນຳ​ທາງ ຫຼື GPS ໄວ້​ທີ່​ລົດ­ຖີບ ກຳ­ລັງ​ເປັນ​ທີ່​ນິ­ຍົມ ແລະ ຖືກ​ໃຊ້​ສັນ­ຈອນ​ໄປ​ມາ​ໃນ​ຖະ­ໜົນ​ຫົນ­ທາງ​ໃນ​ປະ­ເທດ​ຈີນ ຊຶ່ງ​ຄາດ​ວ່າ​ປັດ­ຈຸ­ບັນ ມີ​ລົດ­ຖີບ​ໃນ​ລັກ­ສະ­ນະ​ນີ້​ກວ່າ 10 ລ້ານ​ຄັນ ຈາກ​ບໍ­ລິ­ສັດ​ລົດ­ຖີບ​ແບບ​ແບ່ງ­ປັນ 30 ບໍ­ລິ­ສັດ​ທົ່ວ​ປະ­ເທດ​ຈີນ ຊຶ່ງ Mobike ແລະ Ofo ສອງ​ບໍ­ລິ­ສັດ​ຜູ້­ນຳ​ທຸ­ລະ​ກິດ​ລົດ­ຖີບ​ແບບ​ແບ່ງ­ປັນ ຄອງ​ອັດ­ຕາ​ສ່ວນ 90% ຂອງ​ທຸ­ລະ​ກິດ​ນີ້.

ຂ່າວທີ່ກ່ຽວຂ້ອງ