ອະດີດປະທານາທິບໍດີເປຣູ ຖືກຈັບກຸມ

299 12 ມ.ສ. 2019 ຂ່າວຕ່າງປະເທດ
ອະດີດປະທານາທິບໍດີເປຣູ ຖືກຈັບກຸມ

   ວັນ​ທີ 10 ເມສາ​ນີ້ ຕຳຫຼວດ​ໃນ​ເປ​ຣູ ໄດ້​ປະຕິບັດ​ຄຳ​ສັ່ງ​ການ​ຈັບ​ກຸມ​ອະດີດ​ປະທານາທິບໍດີ ເປ​ຣູ ເປ​ໂດຣ ປາບ​ໂລ ຄຸກ​ຊິນ​ສະ​ກີ ເພື່ອ​ສືບສວນ​ສອບ​ສວນ​ກ່ຽວ​ກັບ​ການ​ກ່າວ​ຫາ​ຮັບ​ສິນ​ບົນ ຂອງ​ກຸ່ມ​ບໍລິສັດ​ກໍ່ສ້າງ Odebrecht ຂອງ​ບຣາ​ຊີ​​ລ ເພື່ອ​ແລກ​ເອົາ​ສັນຍາ​ການ​ກໍ່ສ້າງ​ກິດຈະການ ສາທາລະນະ ກໍ​ຄື​ການເຄື່ອນໄຫວ​ທີ່​ພົວພັນ​ເຖິງ​ການ​ຟອກ​ເງິນ.

    ທ່ານ ໂຈກ ລຸຍ​ອິ​​ສ ຈາ​ເວ​​ສ ຜູ້​ພິພາກສາ​ຈາກ​ສານ​ສືບສວນ​ສອບ​ສວນ​ສະເພາະ ກ່ຽວ​ກັບ​ອາ​ສະ​ຍາ​ກຳ​ສໍ້​ລາດ​ບັງ​ຫຼວງ ໄດ້​ລົງ​ນາມ​ໃນ​ຄຳ​ສັ່ງ​ກັກ​ຕົວ​ເປັນ​ການ​ຊົ່ວຄາວ ຕໍ່​ທ່ານ ຄຸກ​ຊິນ​ສະ​ກີ ພ້ອມ​ດ້ວຍ​ຄົນ​ຂັບ​ລົດ​ສ່ວນ​ຕົວ ແລະ​ເລຂາ​ສ່ວນ​ຕົວ​ຂອງ​ເຂົາ ຕາມ​ການ​ສະເໜີ​ຂອງ ອົງການ​ໄອ​ຍະ​ການ. ໃນ​ຂະນະ​ດຽວ​ກັນ ທ່ານ ຈາ​ເວ​​ສ ກໍ​ອະນຸຍາດ​ໃຫ້​ກວດ​ຄົ້ນ​ບ່ອນຢູ່ ແລະ ບ່ອນ​ເຮັດ​ວຽກ​ຂອງ​ຜູ້​ຖືກ​ຫາ ເພື່ອ​ເກັບ​ກຳ​ຫຼັກ​ຖານ ຮັບ​ໃຊ້​ໃຫ້​ແກ່​ການ​ສືບສວນ​ສອບ​ສວນ.

    ໃນ​ສະເພາະ​ໜ້າ ອະດີດ​ປະທານາທິບໍດີ ຄຸກ​ຊິນ​ສະ​ກີ ຈະ​ຖືກ​ກັກ​ຂັງ​ຊົ່ວຄາວ ເປັນ​ເວລາ 10 ວັນ ແລະ ອາດ​ຈະ​ແກ່ຍາວ​ຮອດ 36 ເດືອນ ຖ້າ​ຫາ​ກວ່າ​ມີ​ຄວາມ​ຈຳເປັນ.

    ທ່ານ ຄຸກ​ຊິນ​ສະ​ກີ ຕ້ອງ​ໄດ້​ລາ​ອອກ​ຈາກ​ຕຳແໜ່ງ​ປະທານາທິບໍດີ ໃນ​ເດືອນ​ມີນາ ປີ 2018 ເພື່ອ​ຫຼີກເວັ້ນ​ຕໍ່​ການ​ຖືກ​ສະພາ​ແຫ່ງ​ຊາດ​ລົງ​ຄະແນນ​ສຽງ​ຂັບ​ໄລ່ ຍ້ອນ​ຂໍ້​ມູນ​ຕ່າງໆ ທີ່​ພົວພັນ​ເຖິງ​ຄະດີ ຂອງ​ກຸ່ມ​ບໍລິສັດ Odebrecht.

ຂ່າວທີ່ກ່ຽວຂ້ອງ