ທູດລາວ ຍື່ນສານຕາຕັ້ງຕໍ່ປະທານາທິບໍດີອາເມຣິກາ

316 12 ມ.ສ. 2019 ຂ່າວໜ້າ​ໜຶ່ງ
ທູດລາວ ຍື່ນສານຕາຕັ້ງຕໍ່ປະທານາທິບໍດີອາເມຣິກາ

    ວັນ​ທີ 8 ເມ­ສາ 2019 ນະ­ຄອນ­ຫຼວງ​ວໍ​ຊິງ​ຕັນ​ດີ​ຊີ ທ່ານ ຄຳ​ພັນ ອັ່ນ​ລາ​ວັນ ໄດ້​ເຂົ້າ​ຍື່ນ​ສານ​ຕາ​ຕັ້ງ​ຕໍ່​ທ່ານ ໂດ​ນັນ ທຣຳ ປະ­ທາ­ນາ­ທິ­ບໍ­ດີ ແຫ່ງ​ສະ­ຫະ­ລັດ​ອາ​ເມ​ຣິ​ກາ ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ອາ​ເມ​ຣິ​ກາ.

    ໂອ­ກາດ​ນີ້ ທ່ານ​ທູດ​ໄດ້​ສະ­ແດງ​ຄວາມ​ຂອບ­ໃຈ​ເປັນ​ຢ່າງ​ຍິ່ງ ທີ່​ທ່ານ​ປະ­ທາ­ນາ­ທິ­ບໍ­ດີ​ໃຫ້​ກຽດ​ເຂົ້າ​ຍື່ນ​ສານ​ຕາ​ຕັ້ງ​ຄັ້ງ​ນີ້ ຖື​ເປັນ​ກຽດ​ຢ່າງ​ສູງ​ທີ່​ຕົນ​ໄດ້​ຖືກ​ແຕ່ງ­ຕັ້ງ​ຈາກ​ລັດ­ຖະ­ບານ ກໍ​ຄື ປະ­ທານ​ປະ­ເທດ​ລາວ ໃຫ້​ດຳ­ລົງ​ຕຳ­ແໜ່ງ​ເປັນ​ທູດ​ລາວ ປະ­ຈຳ​ອາ​ເມ​ຣິ​ກາ ໂດຍ​ທ່ານ​ທູດ​ໄດ້​ນຳ​ເອົາ​ຄວາມ​ຢ້ຽມ­ຢາມ​ຖາມ​ຂ່າວ​ອັນ​ອົບ​ອຸ່ນ ແລະ ພອນ​ໄຊ​ອັນ​ປະ­ເສີດ​ຈາກ​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ເຖິງ​ທ່ານ​ປະ­ທາ­ນາ­ທິ­ບໍ­ດີ ທຣຳ ຈົ່ງ​ມີ​ພະ​ລາ​ນາ​ໄມ​ສົມ­ບູນ ມີ​ຄວາມ​ຜາ​ສຸກ​ໃນ​ຊີ­ວິດ​ສ່ວນ​ຕົວ ແລະ ຄອບ­ຄົວ ແລະ ໄດ້​ຮັບ​ຜົນ­ສຳ­ເລັດ​ໃນ​ພາ­ລະ​ໜ້າ­ທີ່​ອັນ​ມີ​ກຽດ​ຂອງ​ທ່ານ ພ້ອມ​ດຽວ​ກັນ​ທ່ານ​ທູດ​ໄດ້​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ລາວ ສະ­ແດງ​ຄວາມ​ຂອບ­ໃຈ​ຕໍ່​ລັດ­ຖະ­ບານ ແລະ ປະ­ຊາ­ຊົນ​ອາ​ເມ​ຣິ​ກາ​ທີ່​ໄດ້​ໃຫ້­ການ​ຊ່ວຍ­ເຫຼືອ​ລາວ​ໃນ​ໄລ­ຍະ​ຜ່ານ​ມາ ອັນ​ໄດ້​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ການ​ພັດ­ທະ­ນາ ແລະ ສ້າງ­ສາ​ປະ­ເທດ ແລະ ຫວັງ​ວ່າ​ຈະ​ໄດ້​ຮັບ​ການ​ຊ່ວຍ­ເຫຼືອ​ໃນ​ຊຸມ​ປີ​ຕໍ່­ໜ້າ ໃນ​ຖາ­ນະ​ເປັນ​ຄູ່​ຮ່ວມ​ຍຸດ​ທະ​ສາດ​ແບບ​ກວມ​ລວມ​ນັບ​ແຕ່​ປີ 2016 ເປັນ­ຕົ້ນ​ມາ ນອກ​ນີ້ ຍັງ​ໄດ້​ລາຍ​ງານ​ຫຍໍ້​ການ​ພົວ­ພັນ​ຮ່ວມ​ມື​ສອງ​ຝ່າຍ ກໍ​ຄື ໃນ​ຂອບ​ຫຼາຍ​ຝ່າຍ​ລວມ​ທັງ​ຂອບ​ການ​ຮ່ວມ​ມື​ອື່ນໆ ພ້ອມ​ທັງ​ຈະ​ຕັ້ງ­ໜ້າ​ປະ­ຕິ­ບັດ​ໜ້າ­ທີ່ ເພື່ອ​ຊຸກ­ຍູ້​ສົ່ງ­ເສີມ​ການ​ຮ່ວມ​ມື​ສອງ​ຝ່າຍ​ລະ­ຫວ່າງ ລາວ-ອາ​ເມ​ຣິ​ກາ ໃຫ້​ຂະ­ຫຍາຍ­ຕົວ​ຍິ່ງ​ຂຶ້ນ.

    ທ່ານ​ປະ­ທາ­ນາ­ທິ­ບໍ­ດີ​ໄດ້​ສະ­ແດງ​ຄວາມ​ຍິນ​ດີ ແລະ ຊົມ­ເຊີຍ​ທ່ານ​ທູດ​ລາວ​ຜູ້​ໃໝ່ ທີ່​ໄດ້​ຖືກ​ແຕ່ງ­ຕັ້ງ​ເປັນ​ທູດ​ລາວ ປະ­ຈຳ​ອາ​ເມ​ຣິ​ກາ ເພື່ອ​ປະ­ຕິ­ບັດ​ໜ້າ­ທີ່​ອັນ​ມີ​ກຽດ ພ້ອມ​ທັງ​ອວຍ­ພອນ​ໃຫ້​ທ່ານ​ທູດ ຈົ່ງ​ປະ­ສົບ​ຜົນ­ສຳ­ເລັດ​ໃນ​ການ­ເຄື່ອນ­ໄຫວ​ວຽກ​ງານ​ການ​ທູດ​ຂອງ​ຕົນ ແລະ ຊຸກ­ຍູ້​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ປະ­ເທດ ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ລາວ ແລະ ອາ​ເມ​ຣິ​ກາ ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 10 ສິງ­ຫາ 1955 ເຊິ່ງ​ສາຍ​ພົວ­ພັນ​ດັ່ງ­ກ່າວ ໄດ້​ຂະ­ຫຍາຍ­ຕົວ​ຂຶ້ນ​ເລື້ອຍໆ​ລະ­ຫວ່າງ​ລັດ­ຖະ­ບານ ແລະ ປະ­ຊາ­ຊົນ​ສອງ​ຊາດ​ລາວ-ອາ​ເມ​ຣິ​ກາ ໂດຍ​ມີ​ການ​ແລກ­ປ່ຽນ​ການ​ຢ້ຽມ­ຢາມ​ຄະ­ນະ​ຜູ້​ແທນ​ຂັ້ນ​ຕ່າງໆ​ຂອງ​ສອງ​ປະ­ເທດ ການ​ຮ່ວມ​ມື​ກວມ​ເອົາ​ດ້ານ​ເສດ­ຖະ­ກິດ ການ​ຄ້າ ການ​ສຶກ​ສາ ວັດ­ທະ­ນະ­ທຳ-ສັງ­ຄົມ ແລະ ອື່ນໆ.

ຂ່າວທີ່ກ່ຽວຂ້ອງ